ការិយាល័យរដ្ឋបាលនៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) មានក្តីសោមនស្សរីករាយសូមជូនដំណឹងអំពីការតែងតាំងលោក Isaac Endeley ជាប្រធានថ្មីនៃអង្គភាពគាំពារការការពារក្តី។ លោក Isaac Endeley បានចូលកាន់តំណែងនេះកាលពីថ្ងៃទី១៧ ខែមេសា ឆ្នាំ២០១២។
ចាប់ពីឆ្នាំ ២០០៥ រហូតដល់ពេលផ្ទេរការងារមក អ.វ.ត.ក នេះ លោក Isaac Endeley បានបំពេញការងារជាមន្រ្តីច្បាប់នៅផ្នែកគាំពារអង្គជំនុំជម្រះ (Chambers Support) និងនៅផ្នែកមេធាវីការពារក្តី (Defence Counsel) និងការគ្រប់គ្រងមន្ទីរឃុំឃាំង (Detention Management) នៅតុលាការឧក្រិដ្ឋកម្មអន្តរជាតិរបស់អង្គការសហប្រជាជាតិសម្រាប់ប្រទេសរ្វ៉ាន់ដា (UNICTR) ដែលមានមូលដ្ឋាននៅទីក្រុងអារុស្សា (Arusha) ប្រទេសតង់សានី។ ក្នុងឋានៈជាមន្រ្តីច្បាប់ គាត់បានគ្រប់គ្រងកម្មវិធីជំនួយផ្នែកច្បាប់ (Legal Aid Programme) ដ៏ស្មុគ្រស្មាញរបស់ UNICTR។ មុនពេលបំពេញការងារនៅអង្គការសហប្រជាជាតិ លោក Isaac Endeley បានបំពេញការងារជាមេធាវី-និពន្ធនាយក (Attorney-Editor) នៅក្រុមហ៊ុន WestLaw (ដែលបច្ចុប្បន្នមានឈ្មោះថា Thomson/Reuters) ជាក្រុមហ៊ុនស្រាវជ្រាវនិងបោះពុម្ពផ្សាយផ្នែកច្បាប់ដែលមានមូលដ្ឋាននៅទីក្រុងមីនីសូតា (Minnesota) សហរដ្ឋអាមេរិក។ មុនកាន់តំណែងនោះ លោកជាសាស្ត្រាចារ្យផ្នែកវិទ្យាសាស្រ្តនយោបាយនិងទំនាក់ទំនងអន្តរជាតិនៅសាកលវិទ្យាល័យមួយចំនួននៅសហរដ្ឋអាមេរិកនិងកាណាដា។
លោក Isaac Endeley មានដើមកំណើតមកពីប្រទេសកាមេរូន។ លោកទទួលបានសញ្ញាប័ត្របរិញ្ញាប័ត្រនិងវិញ្ញាបនប័ត្រផ្នែកអប់រំពីសាកលវិទ្យាល័យ Keele University នៅចក្រភពអង់គ្លេស សញ្ញាប័ត្រអនុបណ្ឌិតនិងបណ្ឌិតពីសាកលវិទ្យាល័យ Université de Montréal នៅទីក្រុងកេបិច (Québec) ប្រទេសកាណាដា និងបានទទួលសញ្ញាប័ត្រ Juris Doctor ពីមហាវិទ្យាល័យច្បាប់ William Mitchell College of Law នៅក្រុងមីនីសូតា សហរដ្ឋអាមេរិក។ ថ្មីៗនេះ លោក Isaac Endeley ក៏បាននិពន្ធសៀវភៅពីរក្បាលស្តីពីកិច្ចការអន្តរជាតិផងដែរ។