វីដេអូថ្មី ៖ សវនាការក្នុងសំណុំរឿង០០២​ - ផ្នែកទី ១

ផ្នែកកិច្ចការសាធារណៈបានផលិតវីដេអូឯកសារថ្មី ដែលមានចំណងជើងថា "សវនាការក្នុងសំណុំរឿង០០២ ផ្នែកទី១"។ វីដេអូឯកសារនេះបង្ហាញអំពីដំណាក់កាលដំបូងនៃដំណើរការនីតិវិធីក្នុងសំណុំរឿង០០២ ចាប់ពីខែវិច្ឆិកា ឆ្នាំ២០១១។

វីដេអូឯកសារនេះបង្ហាញអំពីបទចោទប្រកាន់ទៅលើជនជាប់ចោទទាំងបីរូប គឺ នួន ជា អៀង សារី និង ខៀវ សំផន និងអំពីការធ្វើសេចក្តីសន្និដ្ឋានលើបទចោទប្រកាន់របស់សហព្រះរាជអាជ្ញាកាលពីថ្ងៃទី២១ ខែវិច្ឆិកា ឆ្នាំ២០១១។ វីដេអូឯកសារនេះក៏រួមបញ្ចូលទាំងសេចក្តីថ្លែងការណ៍របស់ជនជាប់ចោទម្នាក់ៗ ព្រមទាំងប្រវិត្តិរូបនិងតួនាទីរបស់ជនជាប់ចោទក្នុងរបបកម្ពុជាប្រជាធិបតេយ្យផងដែរ។ តាំងពីការចាប់ផ្តើមនៃសវនាការក្នុងសំណុំរឿង០០២ រហូតដល់ខែកុម្ភៈ ឆ្នាំ២០១២ ដើមបណ្តឹងរដ្ឋប្បវេណីចំនួន២រូប និង សាក្សីចំនួន៤រូប បានផ្តល់សក្ខីកម្មនៅចំពោះមុខអង្គជំនុំជម្រះសាលាដំបូង។ ខ្សែវីដេអូឯកសារស្តីអំពីផ្នែកទី២នៃសវនាការក្នុងសំណុំរឿង០០២ នឹងត្រូវបានផ្សព្វផ្សាយក្នុងរយៈពេលប៉ុន្មានខែខាងមុខ។

វីដេអូឯកសារនេះនឹងត្រូវដាក់ឲ្យប្រើប្រាស់ជាសាធារណៈនៅតាមសាលារៀន អង្គការក្រៅរដ្ឋាភិបាល និង ស្ថាប័នផ្សេងៗ។ ប្រសិនបើលោកអ្នកចាប់អារម្មណ៍និងមានបំណងស្នើសុំវីដេអូឯកសារនេះសម្រាប់ដាក់ក្នុងបណ្ណាល័យឬក្នុងស្ថាប័នរបស់លោកអ្នក សូមទាក់ទងផ្នែកកិច្ចការសាធារណៈនៃ អ.វ.ត.ក តាមរយៈសារអេឡិចត្រូនិច ៖ pas@eccc.gov.kh