អង្គភាពគាំពារជនរងគ្រោះនៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) នឹងរៀបចំវេទិកាថ្នាក់តំបន់លើកទី៣ ក្នុងឆ្នាំ២០១២នេះ នៅខេត្តសៀមរាប សម្រាប់ដើមបណ្តឹងរដ្ឋប្បវេណីចំនួន ២០០ នាក់ ក្នុងចំណោមដើមបណ្តឹងរដ្ឋប្បវេណីចំនួន ៣៨៦៤នាក់ នៃសំណុំរឿង០០២។ វេទិកាថ្នាក់តំបន់នេះនឹងធ្វើនៅសណ្ឋាគារ អលសិនអង្គរប៉ារ៉ាឌី នៅថ្ងៃសៅរ៍ ទី២៥ ខែសីហា ឆ្នាំ២០១២ វេលាម៉ោង ៨:០០ព្រឹក ដល់ ម៉ោង ៤:០០ រសៀល។ (អត្តសញ្ញាណរបស់ដើមបណ្តឹងរដ្ឋប្បវេណីនឹងត្រូវបានរក្សាជាសម្ងាត់) ។
វេទិកាថ្នាក់តំបន់នេះមានគោលបំណង៖ (១)ផ្តល់ព័ត៌មានថ្មីៗអំពីការវិវឌ្ឍរបស់ អ.វ.ត.ក ទាក់ទងនឹងសំណុំរឿង ០០២ ដល់ដើមបណ្តឹងរដ្ឋប្បវេណី (២) ដើម្បីឲ្យដើមបណ្តឹងរដ្ឋប្បវេណីទទួលបានការពន្យល់ពីមេធាវីរបស់ខ្លួន នូវដំណើការនៃការបំបែកនីតិវីធីសំណុំរឿង ០០២ ដែលកំពុងជម្រះក្តីជាផ្នែកតូចៗដាច់ពីគ្នា និង (៣) ដើម្បីឲ្យដើមបណ្តឹងរដ្ឋប្បវេណីទាំងនោះប្រើប្រាស់សិទ្ធិរបស់ខ្លួន។
ដើមបណ្តឹងរដ្ឋប្បវេណីទាំង ២០០នាក់ ធ្វើដំណើរមកពីខេត្តបន្ទាយមានជ័យនិងខេត្តសៀមរាប និងស្ថិតក្នុងចំណោមដើមបណ្តឹងរដ្ឋប្បវេណីទាំង ៣ ៨៦៤នាក់ ដែលមិនធ្លាប់បានចូលរួមស្តាប់សវនាការក្នុងសំណុំរឿង ០០២ ក្នុងឆមាសទី១ ឆ្នាំ២០១២ នេះទេ។ វេទិកាថ្នាក់តំបន់នេះនឹងផ្តល់ឱកាសពិសេសសម្រាប់មេធាវីដើមបណ្តឹងរដ្ឋប្បវេណី និងដើមបណ្តឹងរដ្ឋប្បវេណីទាំង ២០០ នាក់ បានជួបគ្នាដើម្បីពិភាក្សាពន្យល់អំពីការវិវឌ្ឍរបស់សំណុំរឿង ០០២ និងស្វែងយល់អំពីដំណាក់កាលដែលដើមបណ្តឹងរដ្ឋប្បវេណីទទួលរងគ្រោះដោយឧក្រិដ្ឋកម្មផ្សេងៗគ្នា ត្រូវរួមនៅក្នុងដំណើរការកាត់សេចក្តីជាផ្នែកៗដាច់ពីគ្នានេះ។
អង្គភាពគាំពារជនរងគ្រោះមានផែនការរៀបចំវេទិកាថ្នាក់តំបន់ចំនួន ៨ ក្នុងឆ្នាំ ២០១២-២០១៣ ដែលជាផ្នែកនៃគម្រោង “ការចូលរួមរបស់ជនរងគ្រោះប្រកបដោយអត្ថន័យក្នុងដំណើការនីតិវិធី អ.វ.ត.ក។ កាលពីឆ្នាំ ២០០៩- ២០១១ អង្គភាពគាំពារជនរងគ្រោះបានរៀបចំវេទិកាថ្នាក់តំបន់ចំនួន១៤ ស្ថិតក្នុងក្របខ័ណ្ឌគម្រោង “ការធ្វើឲ្យប្រសើរឡើងដល់ការចូលរួមរបស់ជនរងគ្រោះក្នុងដំណើការនីតិវិធី អ.វ.ត.ក”។