ក្រោយពីបានទទួលការចាត់តាំងពីលោក បាន គីមូន (Ban Ki-moon) អគ្គលេខាធិការអង្គការសហប្រជាជាតិ និងទទួលបានការតែងតាំងពីឧត្តមក្រុមប្រឹក្សានៃអង្គចៅក្រម សម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ទ្រង់បានតែងតាំងលោក Nicholas Koumjian (សញ្ជាតិអាមេរិក) ជា
សហព្រះរាជអាជ្ញាអន្តរជាតិថ្មីនៃអង្គជំនុំជម្រះវិសាមញ្ញក្នុងតុលាការកម្ពុជា (“អ.វ.ត.ក”)។
មុនទទួលបានការតែងតាំងនេះ លោក Koumjian បានធ្វើជាអគ្គរដ្ឋអាជ្ញាសាលាឧទ្ធរណ៍ដើម្បីធ្វើការចោទប្រកាន់លោក Charles Taylor អតីតប្រធានាធិបតីនៃប្រទេសលីបេរីយ៉ានៅតុលាការពិសេសសម្រាប់ប្រទេស Sierra Leone។ លោក Koumjian បានធ្វើជាមេធាវីការពារក្តីឲ្យ Abdallah Banda និង Saleh Jerbo នៅចំពោះមុខតុលាការព្រហ្មទណ្ឌអន្តរជាតិ ក្នុងរឿងក្តីដែលពាក់ព័ន្ធនិងស្ថានភាពក្នុងទីក្រុងដាហ្វួរ និងបានផ្តល់ជំនួយផ្នែកច្បាប់ដោយស្ម័គ្រចិត្តជូនជនរងគ្រោះដែលមកពីកូតឌីវ័រ។
មុនពេលបម្រើការងារខាងលើនេះ លោក Koumjian បានធ្វើជាអគ្គរដ្ឋអាជ្ញាក្នុងការជំនុំជម្រះលោក Charles Taylor។ លោកបានដឹកនាំអង្គភាពឧក្រិដ្ឋកម្មធ្ងន់ធ្ងរដែលទទួលថវិកាពីអង្គការសហប្រជាជាតិនៅទីម័រខាងកើត (East Timor) និងបានធ្វើជារដ្ឋអាជ្ញានៅតុលាការព្រហ្មទណ្ឌអន្តរជាតិសំរាប់អតីតប្រទេសយូហ្គោស្លាវី និងតុលាការរដ្ឋបូស្នី (Bosnia) និងហឺតហ្សីហ្គោវីណា (Herzegovina)។ មុនចូលបម្រើការងារក្នុងឆាកអន្តរជាតិ លោក Koumjian បានធ្វើជារដ្ឋអាជ្ញានៅទីក្រុង Los Angeles សហរដ្ឋអាមរិក អស់រយៈពេល ២០ឆ្នាំ។