អង្គជំនុំជម្រះសាលាដំបូងនៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) បានបដិសេធសំណើសុំរបស់សហព្រះរាជអាជ្ញា ដើម្បីតែងតាំងជាបណ្តោះអាសន្ននូវក្រុមមេធាវីដែលជាមិត្តរបស់តុលាការ និងបានបង្គាប់ឱ្យអង្គភាពគាំពារការពារក្តីតែងតាំងក្រុមមេធាវីការពារក្តីប្រចាំការរបស់តុលាការជាជនជាតិកម្ពុជាម្នាក់ និងអន្តរជាតិម្នាក់សម្រាប់លោក ខៀវ សំផន។
អង្គជំនុំជម្រះសាលាដំបូងចាត់វិធានការនេះ ដោយសារតែលទ្ធផលនៃការរកឃើញថា ការប្រព្រឹត្តរបស់ ខៀវ សំផន និងមេធាវីការពារក្តីរបស់គាត់ក្នុងរយៈពេលពីរខែកន្លងទៅនេះបានខកខានចូលរួមសវនាការ រួមទាំងបានរារាំងកិច្ចដំណើរការ នីតិវិធីផ្សេងទៀត។ អង្គជំនុំជម្រះសាលាដំបូងបានចាត់វិធានការនេះដោយយល់ឃើញថាដើម្បីការពារកុំឲ្យមានការរារាំងកិច្ច
ដំណើរការនីតិវិធីកើតមានឡើងម្តងទៀត។
តួនាទីរបស់មេធាវីប្រចាំការគឺត្រូវត្រៀមខ្លួន និងធានាលទ្ធភាពក្នុងការទទួលកិច្ចការការពារក្តីឱ្យ ខៀវ សំផន បានគ្រប់
ពេលក្នុងករណីដែលអង្គជំនុំជម្រះសាលាដំបូងយល់ឃើញថា វាជាការចាំបាច់។ ក្រុមមេធាវីការពារក្តីប្រចាំការគឺជាក្រុម
មេធាវីដែលឯករាជ្យពីក្រុមមេធាវីការពារក្តីបច្ចុប្បន្ន ហើយពួកគាត់នឹងមិនធ្វើការប្រឹក្សាយោបល់ ឬទទួលការបង្គាប់បញ្ជា
ណាមួយពីជនជាប់ចោទ ខៀវ សំផន ទេ លុះត្រាតែអង្គជំនុំជម្រះសាលាដំបូងបង្គាប់ឲ្យធ្វើដូច្នោះ។ ក្រុមមេធាវីប្រចាំការ
ទាំងនេះត្រូវតែចូលរួមរាល់សវនាការទាំងអស់ក្នុងសំណុំរឿង ០០២/០២ ដើម្បីឲ្យពួកគាត់បានយល់ដឹងពីសំណុំរឿងនេះ។
ក្នុងករណីដែលអង្គជំនុំជម្រះសាលាដំបូងបង្គាប់ឲ្យក្រុមមេធាវីការពារក្តីប្រចាំការជំនួសមេធាវីបច្ចុប្បន្នសម្រាប់លោក ខៀវ សំផន ពួកគេនឹងបំពេញការងារក្នុងឋានៈជាក្រុមមេធាវីការពារក្តីដែលតែងតាំងដោយតុលាការ។ ក្រុមមេធាវីការពារក្តី
ទាំងនេះ ត្រូវស្តាប់ការបង្គាប់របស់តុលាការ ហើយអនុវត្តតាមក្របខ័ណ្ឌច្បាប់របស់ អ.វ.ត.ក។
សេចក្តីសម្រេចនេះអាចរកបាននៅលើគេហទំព័ររបស់ អ.វ.ត.ក
www.eccc.gov.kh/document/court/TC-5-December-2014