លោក Wayne Jordash (សហមេធាវីអន្ដរជាតិ)

Photo

លោក Wayne Jordash (សហមេធាវីបរទេស) ជាមេធាវី (barrister) មានមូលដ្ឋាននៅទីក្រុងឡុងដ្រ៍ ដែលមានជំនាញឯកទេសផ្នែកឧក្រិដ្ឋកម្មអន្តរជាតិ និងបទល្មើសព្រហ្មទណ្ឌកម្រិតធ្ងន់ផ្សេងៗទៀត។ គាត់បានក្លាយជាសមាជិកគណៈមេធាវីអង់គ្លេស និងវេលស៍ នៅឆ្នាំ ១៩៩៥ និងក្លាយជាមេធាវីជាន់ខ្ពស់(Queen’s Counsel) ចាប់តាំងពីឆ្នាំ ២០១៤ មក។ លោក Jordash មានបទពិសោធន៍ជាច្រើនឆ្នាំក្នុងដំណើរការជំនុំជម្រះនៅតុលាការអន្តរជាតិ បានធ្វើជាតំណាងឲ្យជនជាប់ចោទ នៅតុលាការព្រហ្មទណ្ឌអន្តរជាតិសម្រាប់អតីតប្រទេសយូហ្គោស្លាវី តុលាការព្រហ្មទណ្ឌអន្តរជាតិសម្រាប់ប្រទេសរវ៉ាន់ដា និងតុលាការពិសេសសម្រាប់ប្រទេសសៀរ៉ាឡេអូន។ គាត់ក៏បានបំពេញការងារនៅ អ.វ.ត.ក ផងដែរ ក្នុងនាមជាអ្នកពិគ្រោះយោបល់ផ្នែកច្បាប់ប្រចាំអង្គភាពគាំពារការការពារក្តីក្នុងឆ្នាំ ២០០៨-២០០៩។ មុនពេលផ្តោតការងារលើផ្នែកនីតិអន្តរជាតិ លោក Jordash ធ្លាប់បានប្រកបវិជ្ជាជីវៈជាមេធាវីការពារក្តីក្នុងរឿងព្រហ្មទណ្ឌនៅតុលាការចក្រភពអង់គ្លេសជាច្រើនឆ្នាំមកហើយ។ ទន្ទឹមនឹងការបំពេញការងារជាមេធាវីការពារក្តីក្នុងរឿងព្រហ្មទណ្ឌ គាត់ក៏ផ្តល់យោបល់ផ្នែកច្បាប់ជាប្រចាំផងដែរ លើវិស័យសិទ្ធិមនុស្សអន្តរជាតិ ច្បាប់មនុស្សធម៌ និង ច្បាប់ព្រហ្មទណ្ឌ ដល់បណ្តារដ្ឋ អង្គការអន្តរជាតិ និងអង្គការសង្គមស៊ីវិល ដែលមានបំណងធ្វើកំណែទម្រង់ប្រព័ន្ធច្បាប់ជាតិ ឬ ទាមទារឲ្យមានការទទួលខុសត្រូវចំពោះឧក្រិដ្ឋកម្មឃោរឃៅជាទ្រង់ទ្រាយធំ។ គាត់ក៏បានបង្រៀន និងបោះពុម្ពផ្សាយស្នាដៃជាច្រើនលើវិស័យទាំងនេះផងដែរ។