ព័ត៌មាន​លម្អិត​សម្រាប់​សាធារណជន​ដែល​មក​តាមដាន​សវនាការ

សាលសវនាការ​របស់ អ.វ.ត.ក មាន​កៅអី​ចំនួន ៤៨២ សម្រាប់​សាធារណជន​ទូទៅ មន្ត្រីអង្គទូត និង​តំណាង​សារព័ត៌មាន (តំណាង​សារព័ត៌មាន​ត្រូវមាន​ប័ណ្ណព័ត៌មាន​ដែល​ចេញ​ដោយ អ.វ.ត.ក)។ នៅថ្ងៃ​សវនាការ​ធម្មតា ការ​បែងចែក​កៅអី​គឺ​អនុវត្ត​តាម​គោលការណ៍​មកមុន​បានមុន លើកលែងតែការ​មក​ជា​ក្រុម​ដែល​មាន​សមាជិក​លើសពី​៥នាក់​ដែល​ត្រូវតែ​ចុះ​ឈ្មោះ​ជាមុន

សូម​កត់​សម្គាល់​ថា នៅថ្ងៃ​ដែល​មាន​សវនាការ​ពិសេស ឧទាហរណ៍ ថ្ងៃប្រកាស​បើក​សវនាការ​លើ​សំណុំរឿង​ថ្មី ថ្ងៃធ្វើ​សេចក្តី​សន្និដ្ឋាន​លើការ​ជជែក​តវ៉ា ឬ​ថ្ងៃ​ប្រកាស​សាលក្រម សាធារណជន​ត្រូវតែ​ចុះ​ឈ្មោះ​ជាមុន​ដើម្បី​បាន​កន្លែង​អង្គុយ។

សវនាការ​ចាប់ផ្តើម​នៅ​ម៉ោង ៩:០០ព្រឹក។ សាធារណជន​គួរតែ​មកដល់​ទីកន្លែង​ឲ្យបាន​យ៉ាង​តិច ៤៥នាទី មុនពេល​សវនាការ​ចាប់ផ្តើម ដើម្បី​ទុក​ពេលវេលា​គ្រប់គ្រាន់​សម្រាប់​ការ​ចុះឈ្មោះ​និង​ការ​ត្រួតពិនិត្យ​សន្តិសុខ។ ដើម្បី​អាចចូល​ក្នុង​សាលសវនាការ​បាន សាធារណជន​ត្រូវតែ​បង្ហាញ​អត្តសញ្ញាណប័ណ្ណ​ដែល​មាន​បិទ​រូបថត និង​ឆ្លងកាត់​ការ​ត្រួតពិនិត្យ​របស់​មន្ត្រី​សន្តិសុខ។

អ្នកចូលរួម​ត្រូវតែ​រក្សា​សេចក្តី​ថ្លៃថ្នូរ​និងមាន​អាកប្បកិរិយា​សមរម្យ​នៅក្នុង​បរិវេណ​សាលសវនាការ និង​ត្រូវមាន​សម្លៀកបំពាក់​សមរម្យ (មិនអនុញ្ញាត​ឲ្យ​ពាក់​ស្បែកជើងផ្ទាត់ ខោខ្លី សម្លៀកបំពាក់​សម្រាប់​ទៅ​សមុទ្រ ឬ​សម្លៀកបំពាក់​ណា​ដែល​បញ្ចេញ​ឲ្យ​ឃើញ​សាច់​ហួសហេតុ)។ មិនអនុញ្ញាត​ឲ្យ​ពាក់​អាវ​ដែល​មាន​ផ្លាកសញ្ញា​ណាមួយ​ដែល​បង្ហាញ​ការគាំទ្រ​ឬ​ប្រឆាំង​ភាគី​ណាមួយ​នៅក្នុង​សវនាការ​ឡើយ។ សូម​បញ្ជាក់​ថា កុមារ​ដែល​មាន​អាយុ​ក្រោម ១៦ឆ្នាំ មិនត្រូវបាន​អនុញ្ញាត​ឲ្យ​ចូល​សាលសវនាការ​ទេ ហើយ​អ្នកដែល​មាន​អាយុ ១៦-១៨ឆ្នាំ អាច​ចូលបាន​លុះត្រាតែ​មាន​មនុស្សចាស់​មក​ជាមួយ។ មិន​អនុញ្ញាត​ឲ្យ​យក​ទូរស័ព្ទដៃ កុំទ្យូទ័រយួរដៃ ម៉ាស៊ីនថតរូប ឧបករណ៍ថតសំឡេង កាបូបធំៗ អាហារ ឬភេសជ្ជៈ ចូលក្នុង​សាលសវនាការ​ទេ។

ភាសា​ដែល​ប្រើប្រាស់​នៅក្នុង​សវនាការ
អ.វ.ត.ក ផ្តល់​ការ​បកប្រែ​ប្រដេញ​ជាបី​ភាសា​នៅក្នុង​សវនាការ គឺភាសាខ្មែរ អង់គ្លេស និងបារាំង។

សេវាកម្ម
​បន្ទប់ទឹក​សម្រាប់​សាធារណជន​ស្ថិត​នៅ​ខាងក្រោម​សាល​សវនាការ និង​នៅក្បែរ​កន្លែង​ចតរថយន្ត។ អ.វ.ត.ក មាន​ទីធ្លា​សម្រាប់​ឲ្យ​សាធារណជន​ចត​រថយន្តក្រុង​ឬ​យាន្តជំនិះ​ផ្ទាល់ខ្លួន និង​មាន​ផ្តល់​កៅអីរុញ​សម្រាប់​ជនពិការ​ផងដែរ។

ទីតាំង​របស់ អ.វ.ត.ក
អ.វ.ត.ក មានទីតាំង​នៅ​ខាងឆ្វេងដៃ​នៃ​ផ្លូវជាតិ​លេខ៤ ក្នុង​សង្កាត់​ចោមចៅ ខ័ណ្ឌ​ពោធិ៍សែនជ័យ ចម្ងាយ​១៦គីឡូម៉ត្រ​ពីវត្តភ្នំ។ តំណាង​សារព័ត៌មាន​និង​សាធារណជន​ត្រូវ​ចូល​តាម​ច្រក​ខាងកើត។
ដើម្បីមកដល់ អ.វ.ត.ក សូម​ធ្វើដំណើរ​តាម​ផ្លូវ​សហព័ន្ធ​រុស្ស៊ី​ឆ្ពោះ​មកកាន់​អាកាសយានដ្ឋាន​អន្តរជាតិ​ភ្នំពេញ បន្ទាប់មក​បន្តដំណើរ​ហួស​អាកាសយានដ្ឋាន​តាម​ផ្លូវជាតិ​លេខ៤​ប្រមាណ​៤គីឡូម៉ត្រ។ ប្រសិនបើគ្មាន​​យាន្តជំនិះផ្ទាល់ខ្លួនទេ សាធារណជន​អាច​ជិះ​តាក់ស៊ី​ឬ​រ៉ឺម៉ក​កង់បី។

ប្រសិនបើ​មាន​ចម្ងល់​ពាក់ព័ន្ធនឹង​ការ​ចូលរួម​សវនាការ​នៅ អ.វ.ត.ក សូមទាក់ទង​មក​ផ្នែក​កិច្ចការ​សាធារណៈ​តាម​សារអេឡិកត្រូនិកៈ pas@eccc.gov.kh

 


View Larger Map