ចៅក្រម Phillip Rapoza
លោកចៅក្រម Phillip Rapoza គឺជាអតីតប្រធានសាលាឧទ្ធរណ៍រដ្ឋ Massachusetts។ គាត់បានទទួលសញ្ញាបត្របរិញ្ញាបត្រនិទ្ទេសឆ្នើម (B.A.degree magna cum laude) ពីសាកលវិទ្យាល័យ Yale និងសញ្ញាបត្រ J.D. (juris doctor) ពីមហាវិទ្យា ល័យនីតិសាស្រ្តនៃសាកលវិទ្យាល័យ Cornell។
គាត់បានប្រកបវិជ្ជាជីវៈច្បាប់អស់រយៈពេលជាង ៤៥ ឆ្នាំ។ ក្រោយពេលបំពេញការងារជារដ្ឋអាជ្ញារយៈពេល ១៦ ឆ្នាំ និងបន្ទាប់មកជាមេធាវីការពារក្តី នៅឆ្នាំ១៩៩២ គាត់បានទទួលការតែងតាំងជាចៅក្រមជំនុំជម្រះ។
នៅឆ្នាំ១៩៩៨ គាត់បានទទួលការតែងតាំងជាចៅក្រមសាលាឧទ្ធរណ៍ ហើយនៅឆ្នាំ២០០៦ គាត់បានទទួលការតម្លើងឋានៈជាប្រធានសាលាឧទ្ធរណ៍ រហូតដល់ឆ្នាំ២០១៥។ គាត់ក៏បានបំពេញការងារយ៉ាងសកម្មផងដែរ នៅក្នុងវិស័យយុត្តិធម៌អន្តរជាតិ។
ពីឆ្នាំ២០០៣ ដល់ឆ្នាំ២០០៥ គាត់បានបំពេញការងារជាចៅក្រមអន្តរជាតិ និងជាមន្រ្តីសម្របសម្រួលនៃអង្គជំនុំជម្រះពិសេសទទួលបន្ទុកឧក្រិដ្ឋកម្មធ្ងន់ធ្ងរនៅប្រទេសទីម័រខាងកើត ដោយផ្តោតទៅលើឧក្រិដ្ឋកម្មប្រឆាំងមនុស្សជាតិ និងបទល្មើសធ្ងន់ធ្ងរផ្សេងទៀត ដែលបានកើតឡើងមុនពេលប្រទេសនេះបានទទួលឯករាជ្យ។ ចាប់តាំងពីពេលនោះមក គាត់បានវិលត្រឡប់ទៅប្រទេសទីម័រខាងកើតជាច្រើនលើកច្រើនសា ដើម្បីជួយដល់កិច្ចខិតខំប្រឹងប្រែងរបស់ អសប ក្នុងការអភិវឌ្ឍវិស័យយុត្តិធម៌របស់ប្រទេសនេះ។
គាត់ក៏បានដឹកនាំក្រុមទីប្រឹក្សាយុត្តិធម៌ផ្នែកព្រហ្មទណ្ឌរបស់ អសប នៅប្រទេសហៃទី និងបានចូលរួមក្នុងកម្មវិធី និងការបណ្តុះបណ្តាលនានានៅកម្ពុជា ពាក់ព័ន្ធនឹង អវតក។ នាពេលថ្មីៗនេះ គាត់បានបញ្ចប់អាណត្តិរយៈពេល ៥ ឆ្នាំលើកទីពីរ ក្នុងនាមជាប្រធានមូលនិធិព្រហ្មទណ្ឌអន្តរជាតិ និងនីតិសម្បទា ដែលមានទីស្នាក់ការនៅប្រទេសស្វីស។
លោកចៅក្រម Rapoza ដែលមានដើមកំណើតជាជនជាតិព័រទុយហ្កាល់ បានទទួលមេដាយពីប្រធានាធិបតីព័រទុយហ្កាល់ និងមានឋានន្តស័ក្តិជាមេបញ្ជាការនៃ Order of Prince Henry the Navigator។ គាត់ក៏បានទទួលមេដាយកិត្តិយសអន្តរជាតិនៃប្រទេសប្រេស៊ីលផងដែរ។ គាត់បានទទួលពានរង្វាន់ជាច្រើនទៀត ពាក់ព័ន្ធនឹងការងាររបស់គាត់ផ្នែកតុលាការ និងបានទទួលសញ្ញាបត្រកិត្តិយសជាច្រើន៕
- សញ្ជាតិ : អាមេរិក
- ការិយាល័យ : អង្គជំនុំជម្រះតុលាការកំពូល,
- តួនាទី :