ការិយាល័យសហព្រះរាជអាជ្ញា

ការិយាល័យសហព្រះរាជអាជ្ញា (ក.ស.ព) គឺជា​ការិយាលយ័​ឯករាជ្យ​មួយ​នៅក្នុង​អង្គជំនុំជម្រះ​វិសាមញ្ញ​ក្នុង​តុលាការ​កម្ពុជា(អ.វ.ត.ក)។ ក.ស.ព អនុវត្ត​កាតព្វកិច្ច​របស់​ខ្លួន​ដោយ​គ្មាន​ការ​ជ្រៀតជ្រែក​ពី​រដ្ឋាភិបាល​ឬ​ស្ថាប័ន​ណាមួយ​ឡើយ។ តួនាទី​របស់ ក.ស.ព គឹ​ដើម្បី​ចោទ​ប្រកាន់មេដឹកនាំ​​ជាន់ខ្ពស់​ខ្មែរក្រហម និង​ជន​ទាំងឡាយ​ដែល​ទទួល​ខុសត្រូវ​ខ្ពស់​បំផុត​ចំពោះ​ឩក្រិដ្ឋកម្ម​ដែល​បាន​ប្រព្រឹត្ត​ឡើង​នៅក្នុង​រយៈកាល​នៃ​កម្ពុជា​ប្រជាធិបតេយ្យ។ ក.ស.ព បើក​ការ​ស៊ើបអង្កេត​បឋម ធ្វើការ​ចោទ​ប្រកាន់ ចាត់ការ​លើ​បណ្ដឹង​របស់​ជនរងគ្រោះ ចូលរួម​នៅ​ក្នុង​កិច្ច​ស៊ើបសួរ​របស់​សហ​ចៅក្រម​ស៊ើបអង្កេត​ដំណាក់​កាល​អង្គ បុរេជំនុំជម្រះ អង្គជំនុំជំនុំជម្រះ​សាលា​ដំបូង និង​តុលាការ​កំពូល។ ក.ស.ព មាន​សហប្រធាន​ដឹកនាំ​ដោយ​សហ​ព្រះរាជអាជ្ញា​កម្ពុជា​មួយ​រូប​និង​សហ ព្រះរាជអាជ្ញា​អន្តរជាតិ​មួយរូប​ និង​មាន​បុគ្គលិក​ជាតិ​និង​អន្តរជាតិ​មួយចំនួន​ រួមទាំង​កម្មសិក្សា​ការី​ផង។

សហព្រះរាជអាជ្ញា

កិច្ច​ព្រមព្រៀង​រវាង​អង្គការ​សហ​ប្រជាជាតិ និង​រាជរដ្ឋាភិបាល​កម្ពុជា (ដែល​បាន​បង្កើត អ.វ.ត.ក) យល់ព្រម​ឲ្យ​មាន​ព្រះរាជអាជ្ញា​ខ្មែរ​មួយរូប​និង​ព្រះរាជអាជ្ញា​អន្តរជាតិ​មួយ​រូប ​ដែល​បំពេញ​តួនាទី​ជា​សហ​ព្រះរាជអាជ្ញា។ សហ​ព្រះរាជអាជ្ញា​កម្ពុជា​ត្រូវបាន​ជ្រើសតាំង​ដោយ​ឩត្ដម​ក្រុមប្រឹក្សា​នៃ​អង្គចៅក្រម​កម្ពុជា ហើយ​សហ​ព្រះរាជអាជ្ញា​អន្តរជាតិ​ត្រូវបាន​ជ្រើសតាំង​ដោយ​ឩត្តម​ក្រុមប្រឹក្សា​នៃ​អង្គចៅក្រម​កម្ពុជា​ ក្រោយ​ពី​ការ​ជ្រើសរើស​ឲ្យ​ឈរឈ្មោះ​ដោយ​អគ្គ​លេខាធិការ​អង្គការ​សហ​ប្រជាជាតិ។

លោកស្រី ជា លាង បាន​កើតនិង​ធំ​ពេញវ័យ​នៅ​ក្នុង​ប្រទេស​កម្ពុជា។ លោកស្រី​បាន​ទទួល​ការ​បណ្ដុះបណ្ដាល​ផ្នែក​ច្បាប់​នៅ​ប្រទេស​អាល្លឺម៉ង់​ក្នុង​រវាងឆ្នាំ១៩៨៨ និង​ ១៩៩៥ បាន​ទទួល​សញ្ញាប័ត្រ​អនុបណ្ឌិត​ច្បាប់​ពី​មហាវិទ្យាល័យ ម៉ាទីន លូថឺ (Martin Luther University) នៃទីក្រុង Halle-Wittenberg នៅក្នុង​រដ្ឋ​សហពន័្ធ Sachen-Anhalt។ លោកស្រី ជា លាង បាន​ត្រឡប់​មក​ប្រទេស​កម្ពុជា​វិញ​នៅ​ឆ្នាំ១៩៩៥ ដោយ​បាន​ចូល​បម្រើ​ការងារ​ជា​អនុប្រធាន​ការិយាល័យ​បណ្ដុះបណ្ដាល​ច្បាប់​នៃ​ក្រសួង​យុត្តិធម៌ អស់​រយៈពេល​ប្រាំពីរ​ឆ្នាំ។ នៅក្នុង​អាណត្តិ​អចិន្ត្រៃយ៍​នៃមុខតំណែង​របស់ខ្លួន លោកស្រី​ ជា លាង គឺជា​សមាជិក​មួយរូប​នៃ​គណៈ​កម្មការ​​បង្កើត​ក្រម​ព្រហ្មទណ្ឌ​កម្ពុជា។ នៅ​ខែមករា ឆ្នាំ២០០២ លោកស្រី​ត្រូវបាន​តែងតាំង​ជា​ព្រះរាជ​អាជ្ញា​អម​សាលា​ឧទ្ធរណ៍​កម្ពុជា។ នៅថ្ងៃទី០៧ ខែឧសភា ឆ្នាំ២០០៦ លោកស្រី​ត្រូវបាន​តែងតាំង​ជា​សហ​ព្រះរាជ្ញា​ខ្មែរ​នៃ អ.វ.ត.ក។លោកស្រី ចេះបីភាសាគឺ ៖ ខ្មែរ អាល្លឺម៉ង់ និង អង់គ្លេស។

ការកសាងសមត្ថភាព

បច្ចុប្បន្ន នេះក.ស.ពមានសមាជិកជាបុគ្គលិកជាតិនិងអន្តរជាតិចំនួន២៧នាក់ដែល កំពុងបំរើការងារទៅតាមសមត្ថកិច្ចផ្សេងៗគ្នារួមមានសហព្រះរាជ អាជ្ញារង ជំនួយការ អ្នកស៊ើបអង្កេត អ្នកវិភាគ អ្នកស្រាវជ្រាវ ក្រឡាបញ្ជី បុគ្គលិកគ្រប់គ្រងផ្នែកព័ត៌មាន និង អ្នកបកប្រែភាសា។ ការិយាលយ័នេះក៏បានទទួលយកអ្នកហាត់ការអន្តរជាតិចំនួន៨នាក់ និងអ្នកហាត់ការជាតិចំនួន៤នាក់ផងដែរ ដើម្បីឲជួយកិច្ចប្រតិបត្តិនូវអាណត្តិរបស់ខ្លួន។លើសពីនេះទៀតចៅ ក្រមមកកម្មសិក្សា ដែលមកពីសាលាភូមិន្ទចៅក្រម នៃរាជបណ្ឌិតសភា វិជ្ជាជីវៈតុលាការបាននិងកំពុងបំពេញការងារជាអ្នកហាត់ការ ដោយផ្លាស់ប្ដូរវេនក្នុងរយៈពេលខ្លីនៅក្នុង ក.ស.ព។សមាជិកទាំងអស់នៃ ក.ស.ព ចូលរួមនៅក្នុងវគ្គបណ្ដុះបណ្ដាលជាទៀងទាត់ ដើម្បីកសាងសមត្ថភាពរបស់ខ្លួន ក្នុងវិសយ័ផ្សេងៗដែលពាក់ពន្ធ័ទៅនឹងកិច្ចការរបស់ខ្លួន។ឩទា ហរណ៍ នៅខែសីហា ឆ្នាំ២០០៧ និង ខែកក្កដា ឆ្នាំ២០០៨ ក.ស.ព បានចូលរួមនៅក្នុងសិក្ខាសាលានានា ស្ដីពីច្បាប់ព្រហ្មទណ្ឌអន្តរជាតិ ដែលបានដឹកនាំធ្វើដោយអ្នកមានបទពិសោធន៍ល្បីៗមួយចំនួនក្នុងការ ប្រកបមុខវិជ្ជាជីវៈ ដែលមកពីជុំវិញពិភពលោក។

ការអនុម័តវិធានផ្ទៃក្នុង

ក.ស.ព បានចូលរួមយ៉ាងសកម្មក្នុងការធ្វើសេចក្ដីព្រាងវិធានផ្ទៃក្នុង ដែលនាំឱ្យមានការអនុម័តដោយកិច្ចប្រជុំពេញអង្គ នៅថ្ងៃទី១២ ខែមិថុនា ឆ្នាំ២០០៧ ។ ជាបន្ដបន្ទាប់ ក.ស.ព បានផ្ដល់យោបល់ដ៏ទូលំទូលាយដល់គណៈកម្មាធិការនីតិវិធី និងវិធានផ្ទៃក្នុង ដើម្បីធ្វើវិសោធនកម្មបន្ថែមលើវិធានផ្ទៃក្នុងដោយផ្អែកលើបទពិសោធន៍ ផ្សេងៗទទួលបាននៅក្នុង ការអនុវត្ដន៍របស់ខ្លួនតាំងពីកិច្ចប្រជុំពេញអង្គនៅ ខែមិថុនា ឆ្នាំ២០០៧ ។ យោបល់ទាំងនោះត្រូវបានលើកមក ពិចារណានៅក្នុងកិច្ចប្រជុំពេញអង្គ នៅខែមករា និង ខែកញ្ញា ឆ្នាំ២០០៨ កន្លងមក ។


Related news

Persons

អ.វ.ត.ក​ លើ​ប្រព័ន្ធ​ព័ត៌មាន​សង្គម


Youtube
Twitter
Flickr

Instagram

Latest news