នៅថ្ងៃទី២៥ ខែមេសា ឆ្នាំ២០២៤ ថ្នាក់ដឹកនាំ និងប្រតិភូនៃក្រុមប្រឹក្សាអ្នកច្បាប់កម្ពុជាប្រមាណ ៤៨រូប បានអញ្ជើញមកបំពេញទស្សនកិច្ចសិក្សានៅមជ្ឈមណ្ឌលធនធានរបស់ អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក.) ដើម្បីសិក្សាស្វែងយល់អំពីសមិទ្ធផល កេរដំណែល និងមុខងារសេសសល់របស់ អ.វ.ត.ក.។
ឯកឧត្តម ក្រាញ់ តូនី រដ្ឋលេខាទីស្ដីការគណៈរដ្ឋមន្ដ្រី និងប្រធានរដ្ឋបាលស្តីទីនៃ អ.វ.ត.ក. បានទទួលស្វាគមន៍ និងបានជម្រាបគណៈប្រតិភូថា បន្ទាប់ពីបញ្ចប់ការជំនុំជម្រះក្ដីលើឧក្រិដ្ឋកម្មដែលកើតមានឡើងនៅក្នុងរបបខ្មែរក្រហមក្នុងឆ្នាំ២០២២ រាជរដ្ឋាភិបាលកម្ពុជា និងអង្គការសហប្រជាជាតិបានតម្រូវឱ្យ អ.វ.ត.ក. អនុវត្តមុខងារសេសសល់រយៈពេល ៣ឆ្នាំបន្ថែមទៀត។ ឯកឧត្តម តូនី មានប្រសាសន៍ថា “មុខងារសេសសល់ទាំងនោះរួមមាន ការថែទាំង រក្សាទុក និងគ្រប់គ្រងបណ្ណសារ ការធ្វើចំណាត់ថ្នាក់ឯកសារឡើងវិញ ការការពារសាក្សី និងជនរងគ្រោះ ការតាមដានការអនុវត្តទោសរបស់ទណ្ឌិត ការពិនិត្យមើលការផ្ដល់សំណងដែលត្រូវបានផ្ដល់ជូនដើមបណ្ដឹងរដ្ឋប្បវេណី និងការផ្សព្វផ្សាយឱ្យបានទូលំទូលាយដល់សាធារណៈជន ការប្រព្រឹត្តទៅនៃការជំនុំជម្រះក្ដី សមិទ្ធផល និងកេរដំណែល របស់ អ.វ.ត.ក.។”
ឯកឧត្តមប្រធានបន្ថែមថា “នៅក្នុងមជ្ឈមណ្ឌលធានធានរបស់ អ.វ.ត.ក. ដែលទើបត្រូវបានបង្កើតឡើងនៅក្នុងឆ្នាំ២០២៣ ហើយត្រូវបានដាក់សម្ពោធកាលពីដើមឆ្នាំ២០២៤ កន្លែងទៅនេះ មានសមាសភាពចំនួន៦ គឺ បណ្ណាល័យ និហិដ្ឋានបណ្ណាសារ មជ្ឈមណ្ឌលធនធានចល័ត អ.វ.ត.ក. ការតាំងពិពរណ៌តាមជណ្តើរ គេហទំព័រថ្មី សួនសន្តិភាព និងការចងចាំ និងសាលពហុបំណង ដែលអាចប្រើប្រាស់ សម្រាប់សវនាការនានាដូចជា មជ្ឈត្តកម្ម តុលាការនិម្មិត សន្ធានកម្ម សិក្ខាសាលា បញ្ចាំងភាពយន្ត ធ្វើបទបង្ហាញ និងកិច្ចប្រជុំផ្សេងៗ។”
ឯកឧត្តម ក្រាញ់ តូនី បន្ថែមទៀតថា «ខ្ញុំសង្ឈឹមថាទស្សកិច្ចសិក្សាក្រុមប្រឹក្សាអ្នកច្បាប់នេះ នឹងបានជាប្រយោជន៍ដល់ឯកឧត្តម លោកជំទាវ លោក លោកស្រី ជាពិសេសការយល់ដឹងជាច្រើនអំពីផ្នែកផ្សេងៗនៃសាលាក្តីខ្មែរក្រហម និងអាចមានឱកាសសហការគ្នានាពេលខាងមុខ ដើម្បីរួមចំណែកក្នុងការកសាងនិងអភិវឌ្ឈន៍ព្រះរាជាណាចក្រកម្ពុជា ឱ្យកាន់តែបានឆាប់រហ័ស។
ឯកឧត្តមបណ្ឌិត ស៊ា ម៉ៅ អនុប្រធាន និងជាអគ្គលេខាធិការនៃក្រុមប្រឹក្សាអ្នកច្បាប់ ដែលបានដឹកនាំគណៈប្រតិភូមកទស្សនកិច្ចសិក្សានេះ បានថ្លែងអំណរគុណ និងបានកោតសរសើរដល់ថ្នាក់ដឹកនាំ អ.វ.ត.ក. ចំពោះការរៀបចំឱ្យមានដំណើរទស្សនកិច្ចដ៏មានសារៈសំខាន់បែបនេះដល់ក្រុមប្រឹក្សាអ្នកច្បាប់ និងអង្គភាពផ្សេងៗទៀតចំណុះទីស្តីការគណៈរដ្ឋមន្រ្តី ដើម្បីមកបំពេញសិក្សាស្វែងយល់អំពីសិមទ្ធផល និងកេរដំណែលរបស់អ.វ.ត.ក. ជាពិសេសនៅក្នុងអាណត្តិមុខងារសេសសល់ក្នុងរយៈពេលបីឆ្នាំដំបូងនេះ។
ឯកឧត្តម បានលើកឡើងថា «ខ្ញុំបាទសង្ឃឹមថា អ.វ.ត.ក. នឹងធ្វើការផ្សព្វផ្សាយអំពីសមិទ្ធផល កេរដំណែល និងប្រវត្តិសាស្ត្រខ្មែរក្រហមដល់សាធារណជន ជាពិសេសដល់ក្មេងជំនាន់ក្រោយឲ្យបានគ្រប់ទីកន្លែងទូទាំងប្រទេស ហើយក៏សូមលើកទឹកចិត្តឱ្យបានគ្រប់ទីកន្លែងទូទាំងប្រទេស ហើយក៏សូមលើកទឹកចិត្តឱ្យមានការពិភាក្សាអន្តរជំនាន់ឱ្យបានទូលំទូលាយ ដើម្បីទប់ស្កាត់កុំឱ្យរបបនេះកើតឡើងសារជាថ្មី» ។ ឯកឧត្តម បានបន្ថែមទៀតថា «សម្រាប់ថ្ងៃខាងមុខដ៏ខ្លីនេះ ខ្ញុំបាទសង្ឃឹមថា ក្រុមប្រឹក្សាអ្នកច្បាប់មានកម្មវិធីសិក្ខាសាលា វគ្គបណ្តុះបណ្តាលអំពីច្បាប់ ទស្សនវិជ្ជានយោបាយ និងរដ្ឋបាល ដែលអាចចូលរួមចែករំលែកនូវចំណេះដឹង និងបទពិសោធន៍រួមគ្នាជាមួយ អ.វ.ត.ក. ស្របតាមយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល នីតិកាលទី៧ នៃរដ្ឋសភា»។
សូមបញ្ជាក់ថា នៅក្នុងដំណើរទស្សនកិច្ចសិក្សានេះ ប្រតិភូទាំងអស់ទទួលបានការធ្វើបទបង្ហាញពីឯកឧត្តម ថោង សុជាតិ មន្ត្រីគ្រប់គ្រងជាន់ខ្ពស់នៃ អ.វ.ត.ក. អំពី «សមិទ្ធផល កេរដំណែល និងការងាររបស់ អ.វ.ត.ក. នៅក្នុងដំណាក់កាលមុខងារសេសសល់» និង ឯកឧត្តម ពេជ អង្គ មេធាវីនាំមុខជាតិតំណាងដើមបណ្តឹងរដ្ឋប្បវេណី នៃសំណុំរឿង០០២ អំពីទិដ្ឋភាពទូទៅនៃការចូលរួមរបស់ដើមបណ្តឹងរដ្ឋប្បវេណីក្នុងអំឡុងពេលសវនាការក្តី។ នៅចុងបញ្ចប់នៃកម្មវិធីដំណើរទស្សនកិច្ចនេះ គណៈគ្រប់គ្រងនៃអ.វ.ត.ក. បានអញ្ជើញគណៈប្រតិភូក្រុមប្រឹក្សាអ្នកច្បាប់ ទៅ ទស្សនា និងពិនិត្យមើល បណ្ណាល័យ និហិតដ្ឋានបណ្ណសារ មជ្ឈមណ្ឌលធនធានចល័ត (រថយន្តក្រុង) និងបន្ទប់ពហុបំណងដែលអាចប្រើប្រាស់ជាសាលសវនាការតុលាការតា្រប់។
គួររម្លឹកថា អ.វ.ត.ក. បានបញ្ចប់ដំណើរការកាត់ក្តីទាំងស្រុងនៅឆ្នាំ២០២២ ហើយចាប់ពីខែមករា ឆ្នាំ២០២៣ អ.វ.ត.ក. បាននឹងកំពុងអនុវត្តមុខងារសេសសល់សម្រាប់រយៈពេលបីឆ្នាំ ពីឆ្នាំ២០២៣ ដល់២០២៥ ស្របតាមកិច្ចព្រមព្រៀងបន្ថែមរវាងរាជរដ្ឋាភិបាលកម្ពុជា និងអង្គការសហប្រជាជាតិ។ នៅក្នុងអាណត្តិមុខងារសេសសល់ នេះ អ.វ.ត.ក. បានបង្កើតមជ្ឈមណ្ឌលធនធាន ហើយបានដាក់សម្ពោធឱ្យប្រើប្រាស់ជាផ្លូវការកាលពីថ្ងៃទី២៧ ខែកញ្ញា ឆ្នាំ២០២៣ ក្រោមអធិបតីភាពឯកឧត្តម វង្សី វិស្សុត ឧបនាយករដ្ឋមន្ត្រីប្រចាំការរដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងជាប្រធានក្រុមការងារទទួលបន្ទុកការអនុវត្តមុខងារសេសសល់របស់ អ.វ.ត.ក.។
មជ្ឈមណ្ឌលធនធាន អ.វ.ត.ក. មានសមាសភាគសំខាន់ៗ ចំនួន៦ ដែលរួមមាន៖ (ទី១) បណ្ណាល័យ និងកន្លែងស្រាវជ្រាវ (ទី២) បន្ទប់ប្រើប្រាស់ពហុបំណងសម្រាប់រៀបចំសិក្ខាសាលា និងសម្រាប់ប្រកួតតុលាការប្រឌិត (ទី៣) និហិតដ្ឋានគ្រប់គ្រង់និងរក្សាទុកបណ្ណសារ ស្របតាមបទដ្ឋានអន្តរជាតិ ដែលបានសាងសង់រួច និងកំពុងដាក់ឱ្យដំណើរការ (ទី៤) គេហទំព័រទម្រង់ថ្មី មានបញ្ចូលបណ្ណាសារឌីជីថល ព័ត៌មានអំពីសំណុំរឿង និងឯកសារពាក់ព័ន្ធនឹង អ.វ.ត.ក. ជាមួយមុខងារអន្តរកម្មជាច្រើនដែលគ្រោងនឹងដាក់ឱ្យដំណើរពាក់កណ្តាលឆ្នាំ២០២៤ រីឯ គម្រោង (ទី៥) បន្ទប់ពិគ្រោះយោបល់របស់ដើមបណ្តឹងរដ្ឋប្បវេណីនិងតាំងពិព័រណ៍ស្តីពីដំណើរការជនុំជម្រះក្តី និង (ទី៦) ឧទ្យានសម្រាប់ការចងចាំ បាននិងកំពុងរៀបចំអនុវត្តនៅឆ្នាំ២០២៤ និងឆ្នាំ២០២៥ខាងមុខ។ បន្ថែមពីនេះ កាលពីថ្ងៃទី៣១ ខែមករា ឆ្នាំ២០២៣ អ.វ.ត.ក. បានប្រកាសដាក់ឱ្យដំណើរការមជ្ឈមណ្ឌលធនធានចល័ត ដែលគ្រោងនឹងចាប់ផ្តើមការងារផ្សព្វផ្សាយនៅសាកលវិទ្យាល សាលារៀន ទីតាំងឧក្រិដ្ឋកម្ម និងទីតាំងសាធារណៈផ្សេងទៀតនៅតាម បណ្តារាជធានី ខេត្តទាំងអស់៕
