នៅថ្ងៃទី០៩ ខែឧសភា ឆ្នាំ២០២៤ ប្រតិភូចំនួន ៣១រូប មកពីក្រុមប្រឹក្សាសេដ្ឋកិច្ច សង្គមកិច្ច និងវប្បធម៌ នៃទីស្ដីការគណៈរដ្ឋមន្ដ្រី បានអញ្ជើញមកបំពេញទស្សនកិច្ចសិក្សានៅមជ្ឈមណ្ឌលធនធានរបស់ អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក.) ដើម្បីសិក្សាស្វែងយល់អំពីសមិទ្ធផល កេរដំណែល និងមុខងារសេសសល់របស់ អ.វ.ត.ក.។
ឯកឧត្តម ក្រាញ់ តូនី រដ្ឋលេខាទីស្ដីការគណៈរដ្ឋមន្ដ្រី និងប្រធានរដ្ឋបាលស្តីទីនៃ អ.វ.ត.ក. បានទទួលស្វាគមន៍ និងបានជម្រាបគណៈប្រតិភូថា ឯកឧត្តមមានកិត្តិយសយ៉ាងខ្លាំងចំពោះការអញ្ជើញមកបំពេញទស្សនកិច្ចរបស់គណៈប្រតិភូនៅទីតាំងថ្មីរបស់សាលាក្ដីខ្មែរក្រហមនៅថ្ងៃនេះ។ ឯកឧត្ដម បានជម្រាបប្រតិភូទាំងអស់ថា ការពិតណាស់ សាលាក្ដីខ្មែរក្រហមនេះ ជាយន្ដការមួយដែលរាជរដ្ឋាភិបាលកម្ពុជា និងអង្គការសហប្រជាជាតិត្រូវការ ដើម្បីរកយុត្តិធម៌ជូនជនរងគ្រោះនៅក្នុងរបបកម្ពុជាប្រជាធិបតេយ្យ។
ឯកឧត្តម ក្រាញ់ តូនី មានប្រសាសន៍ថា “ការឈឺចាប់ ការបាត់បង់ របស់ប្រជាពលរដ្ឋក្នុងរបប ៣ ឆ្នាំ ៨ខែ និង២០ថ្ងៃ គឺធំធេងក្រៃលែង ដែលត្រូវតែមានការដោះស្រាយជាចាំបាច់។ ការមិនដោះស្រាយជូនជនរងគ្រោះ គឺជាការបន្សល់ឱ្យការឈឺចាប់របស់ប្រជាជនកម្ពុជា កាន់តែឈឺចាប់គ្មានទីបញ្ចប់។”
ឯកឧត្តម បន្ថែមថា “ការគាំទ្ររបស់រាជរដ្ឋាភិបាលក្នុងការជំនុំជម្រះក្ដីលើអ្នកទទួលខុសត្រូវក្នុងរបបខ្មែរក្រហម គឺជាការយកចិត្តទុដាក់ និងខិតខំជាខ្លាំងក្នុងការស្វែងរកយុត្តិធម៌សម្រាប់ទាំងអស់គ្នាផង និងជាការអនុវត្តនយោបាយ ឈ្នះ ឈ្នះ របស់រាជរដ្ឋាភិបាលផង ដើម្បីបញ្ចប់ទាំងស្រុងនូវចលនាខ្មែរក្រហមទ។”
ឯកឧត្តមប្រធានរដ្ឋបាលស្ដីទីបានជម្រាបប្រតិភូបន្ថែមថា ការជំនុំជម្រះក្ដីលើអតីតមេដឹកនាំខ្មែរក្រហមត្រូវបានបញ្ចប់នៅចុងឆ្នាំ២០២២។ ឯកឧត្តមបន្ថែមថា ចាប់ពីឆ្នាំ២០២៣ មក អនុលោមតាមកិច្ចព្រមព្រៀងបន្ថែមរបស់រាជរដ្ឋាភិបាលកម្ពុជា និងអង្គការសហប្រជាជាតិ សាលាក្តីនេះ កំពុងអនុវត្តមុខងារសេសសល់ដែលរួមមាន ការជូនដំណឹងដល់ភាគីអំពីសាលដីការបស់អង្គជំនុំជម្រះ ការពិនិត្យលើការអនុវត្តទោសរបស់ទណ្ឌិត ខៀវ សំផន និងបណ្តឹងសើរើ បើមាន ការធ្វើចំណាត់ថ្នាក់ឯកសារឡើងវិញ ការផ្សព្វផ្សាយអំពីកេរដំណែលរបស់សាលាក្តីខ្មែរក្រម និងការបំពេញភារកិច្ចពាក់ព័ន្ធផ្សេងទៀតសម្រាប់សង្គមជាតិដើម្បីចូលរួមទប់ស្កាត់ការកើតឡើងនូវឧក្រឹដ្ឋកម្មធ្ងន់ធ្ងរ ទាំងនៅក្នុងតំបន់អាស៊ី និងពិភពលោក ដោយសហការគ្នាជាមួយស្ថាប័នប្រហាក់ប្រហែលដ៏ទៃទៀត ទាំងក្នុងស្រុក និងក្រៅស្រុក។
ឯកឧត្តម ក្រាញ់ តូនី បានគូសបញ្ជាក់បន្ថែមថា “ក្នុងដំណាក់កាលមុខងារសេសសល់ អង្គជំនុំជម្រះវិសាមញ្ញក្នុងតុលាការកម្ពុជា បានប្រែក្លាយខ្លួនពីយន្តការស្វែងរកយុត្តិធម៌ មកជាយន្តការផ្សព្វផ្សាយ ដែលនឹងមានប្រយោជន៍សម្រាប់បុគ្គលគ្រប់រូប រួមទាំងប្រជាជនខ្មែរ អ្នកស្រាវជ្រាវ សិស្ស និស្សិត ដោយសារសាលាក្តីនេះបានរៀបចំជាមជ្ឈមណ្ឌលធនធានមួយដ៏ពេញលេញសម្រាប់សាធារណៈជនទូទៅ។”
ឯកឧត្តមក្រាញ់ តូនី បន្ដថា តាមរយៈទស្សនកិច្ចសិក្សាថ្ងៃនេះ ឯកឧត្តម លោកជំទាវ លោក លោកស្រី នឹងបានឃើញពីសមិទ្ធផលនានារបស់ អ.វ.ត.ក. ហើយអាចប្រើប្រាស់អ្វីដែលមជ្ឈមណ្ឌលធនធាននេះមាន ដូចជាការស្វែងរកឯកសារ ការប្រើប្រាស់បណ្ណាល័យ ការយល់ដឹងអំពីយុទ្ធសាស្ត្ររបស់សាលាក្តី ទម្រង់ឯកសារនានា វិធីសាស្ត្រស្រាវជ្រាវ និងលទ្ធភាពប្រើប្រាស់បណ្ណាល័យ សាលពហុបំណងសម្រាប់កិច្ចប្រជុំ ការធ្វើបទបង្ហាញ តុលាការប្រឌិត និងមជ្ឈត្តកម្ម ជាដើម។
ជាការឆ្លើយតប ឯកឧត្តម ចែម ផល្លា អនុប្រធាន ក្រុមប្រឹក្សាសេដ្ឋកិច្ច សង្គម និងវប្បធម៌ បានថ្លែងអំណរគុណដល់ អ.វ.ត.ក. ចំពោះការរៀបចំឱ្យមានដំណើរទស្សនកិច្ចដ៏មានសារៈសំខាន់នេះឡើង ដល់ថ្នាក់ដឹកនាំ សមាជិក និងមន្ត្រីក្រុមប្រឹក្សាសេដ្ឋកិច្ច សង្គម និងវប្បធម៌ ដែលឯកឧត្តមយល់ថា វាជាឱកាសសិក្សាស្វែងយល់ពីបេសកកម្ម អាណត្តិ និងសិមិទ្ធផលការងាររបស់ អ.វ.ត.ក. ជាពិសេសនៅក្នុងអាណត្តិអនុវត្តមុខងារសេសសល់ក្នុងរយៈពេលបីឆ្នាំដំបូងនេះ។ ទន្ទឹមនឹងនេះ ឯកឧត្តមបានលើកឡើងថា៖ “អ្វីដែលយើងបានឆ្លងកាត់ [របបខ្មែរក្រហម] គឺត្រូវបាន អ.វ.ត.ក. ជួយរកយុត្តិធម៌ជូនយើងខ្ញុំ។ យើងខ្ញុំ សូមថ្លែងអំណរគុណមែនទែន ដល់ អ.វ.ត.ក. ”។
នៅក្នុងដំណើរទស្សនកិច្ចសិក្សានេះ ប្រតិភូទាំងអស់ក៏ទទួលបានការធ្វើបទបង្ហាញពីឯកឧត្តម ថោង សុជាតិ មន្ត្រីគ្រប់គ្រងជាន់ខ្ពស់នៃ អ.វ.ត.ក. អំពី «សមិទ្ធផល កេរដំណែល និងការងាររបស់ អ.វ.ត.ក. នៅក្នុងដំណាក់កាលមុខងារសេសសល់» និង ឯកឧត្តម ពេជ អង្គ មេធាវីនាំមុខជាតិតំណាងដើមបណ្តឹងរដ្ឋប្បវេណី នៃសំណុំរឿង០០២ អំពីទិដ្ឋភាពទូទៅនៃការចូលរួមរបស់ដើមបណ្តឹងរដ្ឋប្បវេណីក្នុងអំឡុងពេលសវនាការក្តី។ នៅចុងបញ្ចប់នៃកម្មវិធីដំណើរទស្សនកិច្ចនេះ គណៈគ្រប់គ្រងនៃអ.វ.ត.ក. បានអញ្ជើញគណៈប្រតិភូក្រុមប្រឹក្សាអ្នកច្បាប់ទៅទស្សនានិងពិនិត្យមើល បណ្ណាល័យ និហិតដ្ឋានបណ្ណសារ និងស្វែងយល់អំពីមជ្ឈមណ្ឌលធនធានចល័ត (រថយន្តក្រុង) ផងដែរ៕
