សូ សារឿន

ឈ្មោះក្រៅ : សារឿន, រឿន, តា ០៥¹

សូ សារឿន (មិនដឹងថ្ងៃខែ -១៩៩៧) ជាមេបញ្ជាការកងពល ៨០១ របស់មជ្ឈិម និងសមាជិកអចិន្រ្តៃយ៍ នៃគណៈកម្មាធិការសេនាធិការយោធា។ គាត់ត្រូវបានសម្លាប់ចោលនៅក្នុងពេលប្រជុំមហាជនក្នុង ឆ្នាំ១៩៩៧។

ស្វែងយល់ពីឋានានុក្រមខ្មែរក្រហម ដើម្បីយល់ដឹងអំពីតួនាទីរបស់គាត់នៅក្នុងប្រព័ន្ធសម្ងាត់។

ការរកឃើញសំខាន់ៗ

អង្គជំនុំជម្រះសាលាដំបូងនៅក្នុងសំណុំរឿង ០០២/០២ បានរកឃើញថា សូ សារឿន:

បញ្ជូនចម្លើយសារភាពពីក្រុងភ្នំពេញ ទៅ ឆោម សែ ប្រធានមន្ទីរសន្តិសុខ អូរកន្សែង ដែលរួមមានឈ្មោះបុគ្គលដែលត្រូវបានគេឆ្លើយដាក់ ⁶ ។
បញ្ជូនបញ្ជាពី សុន សេន ទៅ ឆោម សែ ដើម្បីសម្លាប់អ្នកជាប់ឃុំ ⁷ ។
រាយការណ៍ជូន សុន សេន អំពីបញ្ហាយោធា ស្ថានភាពព្រំដែន សុខភាព និងការផ្គត់ផ្គង់ថ្នាំពេទ្យ និងការស្វែងរក “ខ្មាំង” និង “ខ្សែខ្មាំង” ⁸ ។
ពី ១៩៧៨ ទទួលរបាយការណ៍ដោយផ្ទាល់អំពីគ្រប់មន្ទីរសន្តិសុខ ⁹ ។

កំណត់សម្គាល់

សូ សារឿន មិនមែនជាជនសង្ស័យ ជនត្រូវចោទ ឬ ជនជាប់ចោទនៅក្នុងកិច្ចដំណើរការនីតិវិធីចំពោះមុខ អ.វ.ត.ក។ ដូច្នេះ សំអាងហេតុរបស់អង្គជំនុំជម្រះវិសាមញ្ញមិនអាចចាត់ទុកជាសំអាងហេតុនៃពិរុទ្ធភាពប្រឆាំងនឹងគាត់នោះឡើយ។

ព័ត៌មានខ្លះអាចយកចេញពីចម្លើយសារភាពដែលទទួលបានក្រោមទារុណកម្ម។ ដូច្នេះ ភាពអាចទុកចិត្តបាននៃព័ត៌មានបែបនេះគួរពិនិត្យដោយប្រុងប្រយ័ត្ន។ សូមមើលសេចក្តីសម្រេចស្តីពីភស្តុតាងទទួលបានតាមរយៈទារុណកម្ម។

អូស

១៩៧៥

មុនខែមេសា ឆ្នាំ១៩៧៥

ជាលេខាកងពល ៨០១ របស់មជ្ឈិម ដែលជាអតីតកងពល ១៤ នៃភូមិភាគពិសេស²។

ពីឆ្នាំ១៩៧៥ ដល់ឆ្នាំ១៩៧៨

ដឹកនាំកងពល ៨០១ របស់មជ្ឈិម ក្នុងអំឡុងរបបកម្ពុជាប្រជាធិបតេយ្យ³។

១៩៧៨

វិច្ឆិកា

ជាសមាជិកអចិន្រ្តៃយ៍នៃគណៈកម្មាធិការយោធា នៅក្នុងសមាជបក្សលើកទី៥។

១៩៧៩

ក្រោយខែមករា ឆ្នាំ១៩៧៩

បន្តបម្រើខ្មែរក្រហម⁴។

១៩៩៧

ចុងខែកក្កដាឆ្នាំ១៩៩៧

ត្រូវបានសម្លាប់ក្នុងពេលប្រជុំមហាជន នៅជិត
សាង៉ាំ ជាទីដែលកងកម្លាំងខ្មែរក្រហមកាត់ទោស ប៉ុល ពត ដាក់ពន្ធនាគារអស់មួយជីវិត⁵។