វន វ៉េត

ឈ្មោះក្រៅ : ពេញ ធួក ហៅ សុក,¹ តេ, មៀន, គួន, វេត, វ៉ន, វន វ៉េត,² “បង វ៉ន”,³ វ៉ន,⁴ “អ៊ុំវ៉ន”⁵

វន វ៉េត (១៩៣១-១៩៧៨) គឺជាសមាជិកគណៈមជ្ឈិម និង គណៈអចិន្រ្តៃយ៍ បក្សកុម្មុយនីស្តកម្ពុជា (“ប.ក.ក”) ឧបនាយករដ្ឋមន្រ្តីសេដ្ឋកិច្ច និងទទួលខុសត្រូវឧស្សាហ៍កម្ម ផ្លូវដែក និងនេសាទ។ គាត់ត្រូវបានឃុំនៅ ស-២១ និងក្រោយមកសម្លាប់ចោលតាមបញ្ជារបស់ នួន ជា។

ស្វែងយល់ពីឋានានុក្រមខ្មែរក្រហម ដើម្បីយល់ដឹងអំពីតួនាទីរបស់គាត់នៅក្នុងប្រព័ន្ធសម្ងាត់។

ការរកឃើញសំខាន់ៗ

អង្គជំនុំជម្រះសាលាដំបូងនៅក្នុងសំណុំរឿង ០០២/០១ និងសំណុំរឿង ០០២/០២ បានរកឃើញថា វន វ៉េត:

ជាសមាជិកសហឧក្រិដ្ឋកម្មរួម ជាមួយមេដឹកនាំ ប.ក.ក ដោយមានគោលបំណងរួម “បង្កើតបដិវត្តន៍សង្គមនិយមយ៉ាងឆាប់រហ័សតាមរយៈមធ្យោបាយចាំបាច់តាម ‘សន្ទុះមហាលោតផ្លោះ’ និងដើម្បីការពារបក្សប្រឆាំងនឹងសត្រូវផ្ទៃក្នុង ក៏ដូចជាសត្រូវខាងក្រៅ” ²⁰ ។
មានវត្តមាន និងចូលរួមកិច្ចប្រជុំសំខាន់ៗ ដែលមានការពិភាក្សា និងសម្រេចអំពីមាគ៌ាបក្ស ជាពិសេស ពាក់ព័ន្ធនឹងសេដ្ឋកិច្ច ²¹ ។
ទទួលខុសត្រូវឧស្សាហកម្ម ផ្លូវដែក និងនេសាទ ²² ។
កាន់កាប់គណៈកម្មាធិការចំនួន ៦ ក្នុងនាមជាឧបនាយករដ្ឋមន្រ្តី ទទួលសេដ្ឋកិច្ច ²³ ។
មានវត្តមានក្នុងពេលប្រជុំ ដែលមានការពិភាក្សា និងសម្រេចផែនការកាន់កាប់ក្រុងភ្នំពេញ និងផែនការ ប.ក.ក ជម្លៀសក្រុងភ្នំពេញ ²⁴ ។
គ្រប់គ្រងអង្គភាពយោធាដោយផ្ទាល់ក្នុងពេលជម្លៀសក្រុងភ្នំពេញ ²⁵ ។
ចុះពិនិត្យជនបទជាមួយ នួន ជា, ខៀវ សំផន, អៀង សារី និង សុន សេន និងចុះពិនិត្យសហករណ៍ ²⁶ ។

កំណត់សម្គាល់

វន វ៉េត មិនមែនជាជនសង្ស័យ ជនត្រូវចោទ ឬ ជនជាប់ចោទនៅក្នុងកិច្ចដំណើរការនីតិវិធីចំពោះមុខ អ.វ.ត.ក។ ដូច្នេះ សំអាងហេតុរបស់អង្គជំនុំជម្រះវិសាមញ្ញមិនអាចចាត់ទុកជាសំអាងហេតុនៃពិរុទ្ធភាពប្រឆាំងនឹងគាត់នោះឡើយ។

ព័ត៌មានខ្លះអាចយកចេញពីចម្លើយសារភាពដែលទទួលបានក្រោមទារុណកម្ម។ ដូច្នេះ ភាពអាចទុកចិត្តបាននៃព័ត៌មានបែបនេះគួរពិនិត្យដោយប្រុងប្រយ័ត្ន។ សូមមើលសេចក្តីសម្រេចស្តីពីភស្តុតាងទទួលបានតាមរយៈទារុណកម្ម។

អូស

១៩៣១

ថ្ងៃខែឆ្នាំកំណើត⁶។

១៩៦០

ថ្ងៃទី៣០ ខែកញ្ញា ដល់ថ្ងៃទី២ ខែតុលា

តែងតាំងទៅក្នុងគណៈមជ្ឈិម នៅសមាជបក្សលើកទី១។⁷

១៩៦៣

ចាត់តាំងចូលគណៈកម្មាធិការក្រុងរបស់បក្ស នៅក្នុងក្រុងភ្នំពេញ រួមជាមួយ នួន ជា⁸។

១៩៧១

ខែកក្កដា ឆ្នាំ១៩៧១ ដល់ពាក់កណ្តាលឆ្នាំ១៩៧៣

ដឹកនាំមន្ទីរសន្តិសុខ ម-១៣ មន្ទីរសន្តិសុខភូមិភាគពិសេស ដែលក្រោយមកក្លាយជា ស-២១⁹។

១៩៧៤

មិថុនា

ជួបជាមួយមេដឹកនាំ ប.ក.ក នៅភូមិមាឃ ឃុំព្រែកកុក ពិភាក្សាផែនការវាយសម្រុកចុងក្រោយ និងជម្លៀសក្រុងភ្នំពេញ និងទីប្រជុំជនផ្សេងទៀត¹⁰។

១៩៧៥

ដើមខែមេសា ឆ្នាំ១៩៧៥

ជួបជាមួយមេដឹកនាំ ប.ក.ក ដើម្បីសម្រេចចុងក្រោយការជម្លៀសក្រុង និងធ្វើជាសហប្រធានគណៈកម្មាធិការ ចាត់ចែងការជម្លៀសក្រុងភ្នំពេញ¹¹។

១៧-២៥ មេសា

ក្លាយជាលេខាភូមិភាគពិសេស ទទួលបន្ទុកកងពលធំដែល គ្រប់គ្រងក្រុងភ្នំពេញដោយផ្ទាល់¹²។

តុលា

មានឈ្មោះទទួលខុសត្រូវ “ឧស្សាហកម្ម ផ្លូវថ្នល់ និងនេសាទ” ដោយគណៈអចិន្រ្តៃយ៍¹³។

១៩៧៦

៣០ មីនា

តែងតាំងជាឧបនាយករដ្ឋមន្រ្តីសេដ្ឋកិច្ច និងហិរញ្ញវត្ថុដោយគណៈមជ្ឈិម¹⁴។

មេសា

ជាផ្លូវការបានដឹកនាំក្រសួងសេដ្ឋកិច្ច ដែលមើលការខុសត្រូវគណៈកម្មាធិការពាណិជ្ជកម្ម ទំនាក់ទំនង និងដឹកជញ្ជូន និងជាសមាជិកគណៈកម្មាធិការទទួលបន្ទុក “ពិនិត្យ និងត្រៀមទំនិញ ដែលត្រូវទិញ” ពីចិន¹⁵។

៣ សីហា

មានវត្តមាននៅកិច្ចប្រជុំគណៈកម្មាធិការយោធាជាមួយមេដឹកនាំ ប.ក.ក ផ្សេងទៀត¹⁶។

១៩៧៧

ទទួលរបាយការណ៍ពីទូតកម្ពុជាប្រជាធិបតេយ្យ នៅហាណូយ អំពីការតវ៉ារបស់វៀតណាមចំពោះសកម្មភាពឈ្លានពានប្រព្រឹត្តដោយកងកម្លាំងកម្ពុជាប្រជាធិបតេយ្យ នៅលើទឹកដីវៀតណាម អមគណៈប្រតិភូសេដ្ឋកិច្ចចិន ចុះពិនិត្យការដ្ឋានការងារជាមួយមេដឹកនាំ ប.ក.ក ផ្សេងទៀត និងថ្លែងសុន្ទរកថាស្វាគមន៍អំពីទំនាក់ទំនងល្អរវាងសាធារណរដ្ឋប្រជាមានិតចិន និង កម្ពុជាប្រជាធិបតេយ្យ¹⁷។

១៩៧៨

មេសា

នួន ជា បញ្ជូនទៅធ្វើការជាមួយ ឌុច នៅ ស-២១¹⁸។

វិច្ឆិកា

ចាប់ខ្លួននៅមន្ទីរមជ្ឈិមបក្ស តាមបញ្ជារបស់តាម៉ុក នាំមក ស-២១ និងសួរចម្លើយ “ចំពោះសកម្មភាពក្បត់បម្រើ សេអ៊ីអា និងយួន” និងក្រោយមក សម្លាប់ចោលតាមបញ្ជារបស់ នួន ជា¹⁹។