ចាន់ វឿន - អ.វ.ត.ក.

សាវតារ

លោក ចាន់ វឿន បានផ្តល់សក្ខីកម្មក្នុងនាមជាសាក្សីក្នុងសំណុំរឿង ០០១ អំពីបទពិសោធន៍របស់គាត់ធ្វើការនៅក្រោម ឌុច នៅមន្ទីរសន្តិសុខ ម-១៣ ។ អង្គជំនុំជម្រះសាលាដំបូងមិនបានផ្អែកលើសក្ខីកម្មរបស់គាត់ នៅក្នុងសាលក្រមរបស់ខ្លួនឡើយ។

ស្ថានភាពនៅក្នុងមន្ទីរសន្តិសុខ ម-១៣

មន្ទីរសន្តិសុខ ម-១៣ ស្ថិតនៅអមលាំង ស្រុកថ្ពង ខេត្តកំពង់ស្ពឺ ចន្លោះឆ្នាំ១៩៧១ និង ១៩៧៥ ។ លោក ចាន់ វឿន បានធ្វើការនៅទីនោះបានមួយឆ្នាំ តែមិនចាំកាលបរិច្ឆេទជាក់លាក់ទេ ។ ពេលខ្លះគេចាត់តាំងគាត់ឲ្យយកអាហារទៅឲ្យអ្នកទោស ពីកងសេដ្ឋកិច្ច ហើយគាត់មិនដឹងថាតើកងនេះជាផ្នែកមួយរបស់ ម-១៣ ឬយ៉ាងណាទេ។ គាត់បានទៅ ម-១៣ ម្តងក្នុងមួយសប្តាហ៍ ឬ មួយខែម្តង ហើយយូរៗម្តងគេប្រើគាត់ឲ្យយាមនៅទីនោះ ។ ឆ្មាំយាម ម-១៣ គឺជាកុមារ (អាយុចន្លោះពី ១២ ទៅ ១៣ ឆ្នាំ) និងមនុស្សពេញវ័យ ។ គេសង់គុកនៅក្នុងរណ្តៅក្នុងដី ដោយមានអាគារពីរ ហើយក្នុងមួយជួរមានគុកចំនួនបី ។ រណ្តៅគុកជីកក្នុងដី/គុកនីមួយៗមានជម្រៅប្រហែល ពីរម៉ែត្រ និងទទឹងបួនម៉ែត្រការេ ។ ក្នុងរណ្តៅគុកជីកក្នុងដីមួយមានអ្នកទោសចំនួនប្រាំ ឬប្រាំមួយនាក់ ។ ជាទូទៅ លោក ចាន់ វឿន ឃើញមានអ្នកទោសលើសពី ១០នាក់ ប៉ុន្តែនៅពេលដែលគាត់ត្រឡប់ពីធ្វើការវិញ ម្តងម្កាលគាត់ឃើញមានតិចជាងនេះ ។ គាត់មិនដឹងថាមានអ្វីបានកើតឡើងចំពោះពួកអ្នកទោសទាំងនោះទេ។ អ្នកទោសទាំងនោះជាស្ត្រី បុរស និងកុមារ (អាយុ ៣-៤ ឆ្នាំ) ហើយពេលខ្លះប្តី និងប្រពន្ធ ដែលគេបញ្ជូនពីឃុំអមលាំង និងកន្លែងផ្សេងទៀត ។ អ្នកទោសត្រូវគេ “ដាក់កងច្រវ៉ាក់នៅក្នុងដី” ។ ក របស់ពួកគេជាប់ច្រវ៉ាក់ នៅពេលគេយកមកលើ ។ លោក ចាន់ វឿន ប៉ាន់ស្មានថា អ្នកដែលត្រូវគេឃុំទាំងនោះ គេចោទថាជាគិញ ។ ឌុច មានសិទ្ធិអំណាចបញ្ជាឲ្យអ្នកយាមនាំអ្នកទោសទៅ ម-១៣ ក៏ដូចជាឲ្យសួរចម្លើយពួកគេ ។ ក្នុងពេលសួរចម្លើយ ឌុច ធ្វើទារុណកម្មអ្នកទោស ។ គាត់បានឃើញ ឌុច ចង ព្យួរ និងវាយអ្នកទោសក្នុងពេលសួរចម្លើយ ដែលធ្វើឡើងនៅខាងក្នុង និងខាងក្រៅគុក ។ ឌុច ប្រើដំបងវាយអ្នកទោស ហើយថែមទាំងដុតអ្នកទោសម្នាក់ទាំងរស់ផង ។ មានពេលមួយ គាត់បានឃើញ ឌុច ប្រើចន្លុះដុតដោះអ្នកទោសស្រី ចំណែកឯអ្នកទោសម្នាក់ទៀត ត្រូវគេជ្រមុជចូលទៅក្នុងទឹក ។ គាត់ក៏បានឃើញ ឌុច បាញ់សម្លាប់ពូរបស់គាត់ផងដែរ ។ នៅពេលមេឃភ្លៀង អ្នកទោសខ្លះលង់ទឹកក្នុងរណ្តៅគុកជីកក្នុងដី ។ លោក ចាន់ វឿន ត្រូវជាប់ឃុំ ដោយសារនៅពេលធ្វើជាអ្នកយាម គាត់បានអនុញ្ញាតឲ្យអ្នកទោសរត់ចេញ ។ ទាំងអ្នកទោស និងអ្នកយាម មិនមានអាហារហូបគ្រប់គ្រាន់ទេ ។ កង្វះអាហារនេះធ្វើឲ្យអ្នកយាម និងមនុស្សផ្សេងទៀតអស់កម្លាំងធ្វើការ ។ អ្នកទោសហូប “បបររាវៗ” ចំណែកឯអ្នកយាមវិញហូប “បបរខាប់” ។ អ្នកទោសខ្លះស្លាប់ដោយអត់អាហារ និងខ្វះជាតិទឹក ។ កំណត់ហេតុនៃការស្តាប់ចម្លើយរបស់ លោក ចាន់ វឿន មិនមានភាពស៊ីចង្វាក់គ្នាទៅនឹងសក្ខីកម្មផ្ទាល់មាត់របស់គាត់ទេ។ ឌុច ក៏បានបដិសេធថា លោក ចាន់ វឿន មិនមែនជាបុគ្គលិក ម-១៣ ផងដែរ ។

វីដែអូ៖

វីដេអូ

សក្ខីកម្ម

កាលបរិច្ឆេទ	កំណត់ហេតុជាលាយលក្ខណ៍អក្សរនៃកិច្ចដំណើរការនីតិវិធីជំនុំជម្រះ	លេខប្រតិចារិក
ថ្ងៃទី២០ ខែមេសា ឆ្នាំ២០០៩	E1/12	E1/12.1

ឯកសារពាក់ព័ន្ធ

ចំណងជើងឯកសារជាភាសាខ្មែរ	ចំណងជើងឯកសារជាភាសាអង់គ្លេស	ចំណងជើងឯកសារជាភាសាបារាំង	លេខឯកសារ D	លេខឯកសារ E3
កំណត់ហេតុនៃការស្តាប់ចម្លើយសាក្សី ចាន់ វឿន	Written Record of Interview CHAN Voeun	Procès-verbal de l’entretien de CHAN Voeun	D78/1	E3/8