អ៊ូ សាវរិទ្ធ
រហ្សនាម: E2/26
សំណុំរឿង: សំណុំរឿង ០០១
ប្រភេទ: ដើមបណ្តឹងរដ្ឋប្បវេណី
លោក អ៊ូ សាវរិទ្ធ មានសញ្ជាតិបារាំង កើតនៅខេត្តកំពង់ចាម ប្រទេសកម្ពុជា។ គាត់បានផ្តល់សក្ខីកម្មតាមរយៈប្រព័ន្ធសោទស្សន៍ក្នុងសំណុំរឿង ០០១ ក្នុងនាមជាដើមបណ្តឹងរដ្ឋប្បវេណី ស្តីពីការស្លាប់របស់បងប្រុសគាត់ អ៊ូ វិនឌី នៅមន្ទីរសន្តិសុខមួយដែលគេស្គាល់ថាជា ស-២១
1
។ លោក អ៊ូ សាវរិទ្ធ បានផ្តល់សក្ខីកម្មជំនួសបងថ្លៃស្រី ក្មួយស្រី និងសាច់ញាតិផ្សេងទៀតរបស់គាត់ ទាក់ទងនឹងការស្លាប់របស់បងប្រុសគាត់ អ៊ូ វិនឌី នៅ ស-២១
2
។ អង្គជំនុំជម្រះសាលាដំបូង បានអនុញ្ញាតឲ្យលោក អ៊ូ សាវរិទ្ធ ធ្វើជាដើមបណ្តឹងរដ្ឋប្បវេណីក្នុងរឿងនេះ ដោយសារលោក អ៊ូ សាវរិទ្ធ បានបញ្ជាក់ពីអត្ថិភាពនៃទំនាក់ទំនងទៅនឹងជនរងគ្រោះផ្ទាល់ពី ស-២១ គឺ អ៊ូ វិនឌី និងបានបញ្ជាក់ថា ការស្លាប់របស់ អ៊ូ វិនឌី គឺជាបច្ច័យផ្ទាល់ពីឧក្រិដ្ឋកម្មដែល កាំង ហ្កេកអ៊ាវ ហៅ ឌុច ត្រូវផ្តន្ទាទោស
3
។
សាវតារ
ចន្លោះខែមេសា ឆ្នាំ១៩៧៥ និង ថ្ងៃទី៧ ខែមករា ឆ្នាំ១៩៧៩ លោក អ៊ូ សាវរិទ្ធ រស់នៅប្រទេសបារាំង
4
។ ឪពុករបស់គាត់ អ៊ូ គឹមសាន ទទួលមរណភាពក្នុងឆ្នាំ១៩៧២។ ម្តាយគាត់ ណៃ ស៊ីដូនី បានបាត់បង់ជីវិតក្នុងប្រទេសកម្ពុជា ក្នុងរបបកម្ពុជាប្រជាធិបតេយ្យ។ គាត់មិនដឹងថាម្តាយគាត់ស្លាប់នៅពេលណាទេ
5
។ គាត់មានបងប្រុសពីរនាក់ ដែលបានស្លាប់ក្នុងប្រទេសកម្ពុជា ចន្លោះឆ្នាំ១៩៧៥ និង ១៩៧៩ និងបងប្អូនស្រីពីរនាក់ អ៊ូ ជុំម៉ាក់ និង អ៊ូ ណាក់ប៊េត រស់នៅប្រទេសបារាំង
6
។ លោក អ៊ូ វិនដី បានបញ្ចប់ការសិក្សាសាលាភូមិន្ទរដ្ឋបាលនៅភ្នំពេញ។ ក្នុងឆ្នាំ១៩៧៥ គាត់ជាមន្ត្រីនៅក្រសួងការបរទេស ធ្វើការនៅខុទ្ទការល័យនាយករដ្ឋមន្ត្រី ឡុង បូរ៉េត
7
។ គាត់មានគ្រួសារ និងមានកូនបីនាក់។ គាត់មានទំនាក់ទំនងជិតស្និទ្ធនឹងសម្តេច នរោត្តម សីហនុ
8
។ លោក អ៊ូ វិនឌី គឺជាគម្រូល្អសម្រាប់លោក អ៊ូ សាវរិទ្ធ ពួកគេមានទំនាក់ទំនងល្អនឹងគ្នា
9
។ ក្នុងឆ្នាំ១៩៧៣ លោក អ៊ូ សាវរិទ្ធ បានទៅសិក្សានៅប្រទេសបារាំង។ នៅចុងឆ្នាំ១៩៧៩ គាត់បានឃើញឈ្មោះ អ៊ូ វិនឌី ក្នុងបញ្ជីឈ្មោះអ្នកដែលបានចាប់ខ្លួន។ គាត់បានរំលឹកថា ថ្ងៃទី១៣ ខែកុម្ភៈ ឆ្នាំ១៩៧៦ គឺជាថ្ងៃដែលបងប្រុសគាត់មានឈ្មោះនៅ ស-២១ និងថ្ងៃទី២៣ ខែមករា គឺជាថ្ងៃដែលគាត់ត្រូវសម្លាប់
10
។ លោក អ៊ូ សាវរិទ្ធ បានរៀបរាប់អំពីការឈឺចាប់ដែលភរិយា កូនស្រី និងបងប្អូនស្រីពីរនាក់របស់លោក អ៊ូ វិនឌី បានជួបប្រទះ។ គាត់បានអានការសរសេររៀបរាប់របស់ក្មួយស្រីគាត់ពីរបីបន្ទាត់ដូចខាងក្រោម៖
11
“ឈ្មោះរបស់ខ្ញុំ អ៊ុក កាមេឡា។ ឪពុករបស់ខ្ញុំ អ៊ូ វ៉ាន់ឌី គឺជាជនរងគ្រោះមួយរូបនៅក្នុងចំណោមជនរងគ្រោះនៅមន្ទីរ ស-២១។ ខ្ញុំមានអាយុបួនឆ្នាំ នៅពេលដែលឪពុកខ្ញុំត្រូវបានគេចាប់ខ្លួន ធ្វើទារុណកម្ម ហើយក្រោយមកសម្លាប់ចោល។ នៅវ័យបួនឆ្នាំនោះ គឺខ្ញុំនៅក្មេងណាស់ដែលដឹងអំពីភាពសាហាវយង់ឃ្នង ដែលឪពុករបស់ខ្ញុំប្រហែលជាត្រូវបានរងគ្រោះ។ នៅពេលដែលខ្ញុំមានអាយុបួនឆ្នាំ ខ្ញុំពិតជាក្មេងមែនទែនក្នុងការយល់ដឹងថា គាត់បានចាកឆ្ងាយពីរូបខ្ញុំ។ នៅពេលដែលខ្ញុំមានអាយុបួនឆ្នាំ ក៏នៅកុមារភាព ហើយមានវ័យក្មេងក្នុងការយល់ និងដឹងអំពីវិសាលភាពនៃការពុំមានឪពុកក្នុងជីវិតអនាគតរបស់ខ្ញុំ …”
12
“…ខ្ញុំជាកូនស្រីរបស់ជនរងគ្រោះមួយរូប ខ្ញុំសូមស្នើឲ្យការដាក់ទោសហ្នឹងសមល្មមទៅនឹងឧក្រិដ្ឋកម្មដែលបានកើតឡើងចំពោះការឈឺចាប់ ទុក្ខសោកទាំងឡាយ ហើយឲ្យវាត្រូវ និងស៊ីគ្នាទៅនឹងជីវិតរបស់ជនរងគ្រោះ ដែលត្រូវបានជនជាប់ចោទដកយកទៅ …”
13
ក្នុងឆ្នាំ១៩៩២ លោក អ៊ូ សាវរិទ្ធ បានត្រឡប់មកប្រទេសកម្ពុជាវិញជាលើកដំបូង។ គាត់បានទៅមើល ស-២១ ហើយចាប់តាំងពីពេលនោះមក គាត់ទួញយំចំពោះភាពអយុត្តិធម៌នៅទីនោះ និងមិនដឹងថាមានរឿងអ្វីកើតឡើងចំពោះបងប្រុសរបស់គាត់នៅ ស-២១ នោះទេ
14
។ សាច់ញាតិគាត់ និងគាត់ ចង់បានសំណងផ្លូវចិត្ត មិនចង់បានសំណងហិរញ្ញវត្ថុ ឬដំណោះស្រាយផ្នែកសម្ភារៈនោះទេ
15
។
ការស្វែងរកការបញ្ជាក់ពី ឌុច
ផ្អែកលើប្រវត្តិរូបមន្ទីរ ស-២១ របស់លោក អ៊ូវ វិនឌី ដែលបានបង្ហាញនៅក្នុងតុលាការ លោក អ៊ូ សាវរិទ្ធ បានស្វែងរកការបញ្ជាក់ពីភាពមិនស៊ីចង្វាក់គ្នានៃជោគវាសនារបស់បងប្រុសគាត់ ទាក់ទងនឹងពេលគាត់ត្រូវចាប់ខ្លួននៅថ្ងៃទី១៣ ខែកុម្ភៈ ឆ្នាំ១៩៧៦ និងពេលដែលគាត់ត្រូវបានសម្លាប់នៅថ្ងៃទី២៣ ខែមករា ឆ្នាំ១៩៧៦ ដែលផ្អែកតាមកំណត់សម្គាល់ក្នុងប្រវត្តិរូប គាត់អះអាងថាធ្លាប់ជាភ្នាក់ងារ សេអ៊ីអា
16
។ ឌុច អះអាងថា បញ្ជីអ្នកទោសចូល ស-២១ មិនតែងតែត្រឹមត្រូវនោះទេ ដោយសារតែបុគ្គលពិសេសត្រូវដាក់ក្នុងគុកពិសេស ដែលអាចនាំឲ្យមានភាពមិនស៊ីចង្វាក់គ្នានៅក្នុងកាលបរិច្ឆេទចូល ស-២១
17
។ ទោះជាយ៉ាងណា គាត់អះអាងថា កាលបរិច្ឆេទចម្លើយសារភាពគឺថ្ងៃទី២៣ ខែមករា ឆ្នាំ១៩៧៦
18
។ លោក អ៊ូ សាវរិទ្ធ ក៏ចង់បញ្ជាក់អំពីចម្លើយសារភាពរបស់ អ៊ូ វិនឌី ដោយសារតែការសរសេរដោយដៃមានសភាពស្អាតល្អ និងស៊ីចង្វាក់គ្នា ដែលនាំឲ្យចោទជាបញ្ហាថាតើ ចម្លើយសារភាពនេះត្រូវបានសរសេរក្រោមទារុណកម្មឬយ៉ាងណា
19
។ ឌុច បានពន្យល់ថា ការធ្វើទារុណកម្មជៀសមិនផុតទេនៅ ស-២១ មនុស្សតែម្នាក់គត់ដែលមិនត្រូវបានធ្វើទារុណកម្មគឺ កុយ ធួន ទោះជាយ៉ាងណា បើផ្អែកលើការសរសេរដៃបានស្អាតរបស់ អ៊ូ វិនឌី វាអាចថាមិនមានប្រើទារុណកម្មលើគាត់
20
។
សក្ខីកម្មរបស់ លោក អ៊ូ សាវរិទ្ធ
លោក អ៊ូ សាវរិទ្ធ ស្គាល់ ជូឡុង រង្សី, លឹម គីម៉ារី និង លោក សួន កាសេត ដែលត្រូវបានចាប់ខ្លួនជាមួយបងប្រុសរបស់គាត់ ស្ថិតនៅក្នុងក្រុមជាមួយបងប្រុសគាត់ ហើយគ្រួសាររបស់ពួកគេស្គាល់គ្នាទៅវិញទៅមក
21
។ លោក សាវរិទ្ធ បានដឹងថា ក្រោយថ្ងៃ១៧ ខែមេសា ឆ្នាំ១៩៧៥ លោក អ៊ូ វិនឌី រួមជាមួយសមាជិកគ្រួសារ ១០ នាក់ ត្រូវជម្លៀសចេញពីភ្នំពេញ
22
។ គាត់ដឹងរឿងនេះពីប្អូនថ្លៃស្រីរបស់គាត់ នៅពេលដែលនាងមកពីជំរំជនភៀសខ្លួនក្នុងប្រទេសថៃ មកជួបគាត់ ហើយបានប្រាប់គាត់ថា លោក អ៊ូ វិនឌី ជាប់ឃុំនៅ ស-២១
23
។ លោក អ៊ូសាវរិទ្ធ សន្និដ្ឋានថា បងប្រុសរបស់គាត់ទំនងជាត្រូវចាប់ខ្លួន ដោយសារតែគាត់មានទំនាក់ទំនងជាមួយ ជូឡុង រស្ស៊ី ដែលត្រូវគណៈស្រុកចាប់ខ្លួន
24
។ ឌុច មិនបានផ្តល់សេចក្តីសង្កេតអ្វីទេ
25
។
វីដេអូ
