សេង ឃុយ
រហ្សនាម: 2-TCW-832
សំណុំរឿង: សំណុំរឿង ០០២/០២
ប្រភេទ: សាក្សី
សាវតារ និងតួនាទី
លោក សេង ឃុយ ជាកសិករខ្មែរនៅភូមិអង្គរបាន ២ ឃុំអង្គរបាន ស្រុកកងមាស ខេត្តកំពង់ចាម មុនខែ មេសា ឆ្នាំ១៩៧៥ រហូតដល់ខែមករា ឆ្នាំ១៩៧៩
1
។ យោងតាមលោក សេង ឃុយ “នៅពេលខ្មែរក្រហមចូលមកគ្រប់គ្រងភូមិរបស់ខ្ញុំ គឺខ្ញុំហ្នឹងជាទាសករមួយរូប គេឲ្យខាងភ្ជួររាស់ស្រែចម្ការហ្នឹងដដែល រហូតពេលទាល់តែដាច់របប ប៉ុល ពត ហ្នឹង”
2
។
គាត់បានផ្តល់សក្ខីកម្មនៅចំពោះមុខអង្គជំនុំជម្រះសាលាដំបូង ក្នុងនាមជាសាក្សីក្នុងសំណុំរឿង ០០២/០២ អំពីការប្រព្រឹត្តលើប្រជាជនចាម ការចាប់ខ្លួននិងការសម្លាប់ប្រជាជនចាម នៅក្នុងតំបន់របស់គាត់ ក្នុងអំឡុងពេលរបបខ្មែរក្រហម
3
។
ការប្រព្រឹត្តលើប្រជាជនចាម
យោងតាមលោក សេង ឃុយ ប្រជាជនចាមបានរក្សាជាតិពន្ធុ វប្បធម៌ អត្តសញ្ញាណសាសនាដាច់ដោយឡែករាប់សតវត្សរ៍មកហើយ ចាប់តាំងពីការមកដល់និងការតាំងទីលំនៅក្នុងប្រទេសកម្ពុជា
4
។ មុនឆ្នាំ១៩៧៥ ជនជាតិចាមប្រតិបត្តិសាសនាអ៊ិស្លាម និងស្លៀកសម្លៀកបំពាក់ប្រពៃណីដាច់ដោយឡែកខុសពីជនជាតិខ្មែរ
5
។ ស្ត្រីចាមទទូរក្រមាពណ៌ភ្លឺៗលើក្បាល និងស្លៀករ៉ូបវែង ចំណែកឯបុរសចាមវិញជាទម្លាប់ពាក់មួកកាតឹប ស្លៀកសារុង និងពាក់អាវវែង
6
។ ពួកគេមិនហូបសាច់ជ្រូកទេ ខុសពីប្រជាជនខ្មែរ
7
។
លោក សេង ឃុយ បានផ្តល់សក្ខីកម្មថា នៅពេលខ្មែរក្រហមកាន់កាប់ឃុំអង្គរបាន ក្នុងខែមេសា ឆ្នាំ១៩៧៥
8
ពួកគេបានហាមឃាត់ប្រជាជនចាមនៅទីនោះមិនឲ្យប្រតិបត្តិសាសនា និងប្រើភាសារបស់ខ្លួន និងបានកំណត់ឲ្យប្រជាជនចាមរស់នៅតាមបែបខ្មែរ រួមទាំងការហូបសាច់ជ្រូកផង
9
។
គាត់បានរៀបរាប់បន្ថែមទៀតអំពីការផ្លាស់ទីលំនៅប្រជាជនចាមប្រមាណពី ១៥ ទៅ ១៦ នាក់ពីភូមិផ្សេងនៅក្នុងឃុំនោះ មកភូមិអង្គរបាន ២ ក្នុងឆ្នាំ១៩៧៦
10
។ គាត់អាចដឹងថាជាជនជាតិចាម ដោយសារតែគាត់បានឮពួកគេនិយាយភាសាចាមដាក់គ្នា
11
។
ការចាប់ខ្លួន និងការសម្លាប់ប្រជាជនចាម
លោក សេង ឃុយ បានរៀបរាប់ពីការឃើញផ្ទាល់នូវការចាប់ខ្លួនស្រ្តី បុរស និងកុមារជនជាតិចាមចំនួន ១៥ នាក់នៅក្នុងភូមិរបស់គាត់ដូចខាងក្រោម
12
៖
“ខ្ញុំបានឃើញផ្ទាល់នឹងភ្នែក […] ប្រហែលជាអំឡុងឆ្នាំ១៩៧៧ ប្រហែលជាម៉ោងប្រាំបីយប់ហ្នឹង បងប្អូនអ្នកស្រុកហ្នឹង ទាំងខ្មែរ ទាំងចាមហ្នឹងឡើងពីធ្វើស្រែចម្ការ ដកស្ទូង ហូបបាយនៅរោងបាយៗបាយរួមគ្នាហ្នឹង។ ហើយនៅយប់នោះ គឺមានសន្តិសុខគេមកចាប់ចាមហ្នឹង។ ចាប់ហ្នឹងគឺមិនមែនម្នាក់ទេ គឺចាប់ចាមដែលរស់នៅក្នុងភូមិទី ២ ប៉ុន្មានហ្នឹង គឺគេចាប់ទាំងអស់ ហើយចាប់ហ្នឹងគឺនៅក្នុងរោងបាយ កំពុងតែហូបបាយជុំគ្នា ជាមួយបងប្អូនខ្មែរហ្នឹង ហើយពេលនោះបានជាខ្ញុំបានឃើញ ខ្ញុំកំពុងតែអង្គុយហូបបាយនៅជាមួយក្បែរគ្នាហ្នឹងដែរ”
13
។
លោក សេង ឃុយ បាននិយាយថា បន្ទាប់ពីការចាប់ខ្លួន អនុប្រធានភូមិបានបញ្ជាគាត់ឲ្យដឹកប្រជាជនចាមទៅវត្តអូរត្រកួននៅពេលយប់ ដឹកតាមរទេះគោរួមជាមួយរទេះគោប្រាំឬប្រាំមួយរទេះផ្សេងទៀត
14
។ បុរសម្នាក់បានមកទទួលយកប្រជាជនចាមទាំងនោះ ហើយគាត់ប្រហែលជាសន្តិសុខស្រុក
15
។ លោក សេង ឃុយ មិនបានឃើញពួកគេត្រឡប់មកវិញទេ បន្ទាប់ពីត្រូវបានយកទៅវត្តអូរត្រកួន
16
។
បន្ទាប់ពីបានឮប្រធានសន្តិសុខឃុំស្តីបន្ទោសប្រជាជនចាមថាក្បត់អង្គការ លោក សេង ឃុយ យល់ថានេះជា “មូលហេតុដែលគេបោសសម្អាតចាម”
17
។ គាត់និយាយថា ខ្មែរក្រហមចង់ឲ្យមានពូជសាសន៍ខ្មែរតែមួយប៉ុណ្ណោះ
18
។
លោក សេង ឃុយ បានលើកឡើងថា ប្រជាជនចាមដែលត្រូវបានចាប់ខ្លួនទាំងនោះមិនបានធ្វើអ្វីខុសនោះទេ និងជាជនស្លូតត្រង់
19
។ រុន ដែលមានតួនាទីនៅក្នុងសន្តិសុខឃុំ គឺជាអ្នកទទួលខុសត្រូវលើការចាប់ខ្លួន
20
។ ប្រជាជនហៅ រុន ថាជាពេជ្ឈឃាត ដោយសារតែគាត់សម្លាប់មនុស្សដោយមិនមានសួរនាំពួកគេទេ
21
។ ក្រោយរបបខ្មែរក្រហមដួលរលំក្នុងឆ្នាំ១៩៧៩ រុន ត្រូវ “ប្រជាពលរដ្ឋគេយកទៅកាប់ចិញ្ច្រាំសម្លាប់ចោល” នៅឃុំអង្គរបាន ដែលខឹងនឹងគាត់ ដោយសារ “ចាប់បងប្អូនគេយកទៅសម្លាប់ចោល”
22
។
លោក សេង ឃុយ បានផ្តល់សក្ខីកម្មថា ក្រោយរបបខ្មែរក្រហមដួលរលំ គាត់បានចូលរួមក្នុងការប្រជុំមួយ ដែលក្នុងអំឡុងពេលនោះ មានការពិភាក្សាអំពីចំនួនមនុស្សដែលស្លាប់នៅវត្តអូរត្រកួនក្នុងរបបនោះ និងបានប៉ាន់ប្រមាណថាមានចំនួន ៣០.០០០ នាក់
23
។
អង្គជំនុំជម្រះសាលាដំបូងបានផ្អែកលើសក្ខីកម្មរបស់លោក សេង ឃុយ ក្នុងចំណោមភ័ស្តុតាងផ្សេងទៀត ក្នុងការសន្និដ្ឋានថា៖ (i) បក្សកុម្មុយនីស្តកម្ពុជាបានដាក់ការរឹតត្បិតដោយបង្ខំលើការប្រតិបត្តិសាសនា និងវប្បធម៌ចាម នៅក្នុងទីតាំងផ្សេងៗក្នុងខេត្តកំពង់ចាម
24
(ii) ប្រជាជនចាមភាគច្រើនមិនប្រឆាំងទៅនឹងការហាមឃាត់នេះទេ ដោយសារខ្លាចគេយកទៅសម្លាប់
25
និង (iii) ប្រជាជនចាមមកពីភូមិផ្សេងៗនៅក្នុងស្រុកកងមាស ត្រូវបានចាប់ខ្លួនជាប្រព័ន្ធ និងនាំយកទៅសម្លាប់នៅវត្តអូរត្រកួនក្នុងឆ្នាំ១៩៧៧
26
។
វីដេអូ
