សុន វុត
រហ្សនាម: 2-TCCP-1016
សំណុំរឿង: សំណុំរឿង ០០២/០២
ប្រភេទ: ដើមបណ្តឹងរដ្ឋប្បវេណី
សាវតារ និងតួនាទី
លោក សុន វុត បានចូលកងទ័ពខ្មែរក្រហមក្នុងឆ្នាំ១៩៧៤ នៅស្រុកពួក ខេត្តសៀមរាប
1
។ មុនពេលរំដោះភ្នំពេញក្នុងខែមេសា ឆ្នាំ១៩៧៥ គាត់ត្រូវបានបញ្ជូនទៅភ្នំពេញ និងបានចូលរួមក្នុងសមរភូមិជិតភ្នំបាសិត និងកប់ស្រូវ
2
។ ក្រោយឆ្នាំ១៩៧៥ គាត់ក្លាយជាប្រធានកងអនុសេនាធំ ក្នុងកងពល ៩២០ និងត្រូវបានបញ្ជូនទៅស្រុកកោះញែក តំបន់មណ្ឌលគិរី ឬ តំបន់ ១០៥ ដើម្បីការពារព្រំដែនកុំឲ្យវៀតណាមឈ្លានពាន
3
។ ក្រោយពេលចាប់ខ្លួនមេបញ្ជាការកងពល ៩២០ ក្នុងឆ្នាំ១៩៧៧ លោក សុន វុត ត្រូវបានចាប់ខ្លួន និងឃុំខ្លួននៅពន្ធនាគារនៅអូរច្បាររយៈពេលប្រហែលប្រាំមួយខែ រហូតដល់ពេលគាត់រត់គេចខ្លួន
4
។
ការបោសសម្អាតផ្ទៃក្នុងក្នុងកងពល ៩២០
កងពល ៩២០ មានវត្តមាននៅក្នុងតំបន់ ១០៥ ពីឆ្នាំ១៩៧៥ ហើយដំបូងឡើយស្ថិតក្រោមបញ្ជាការរបស់ ឈិន ដែលជាមេបញ្ជាការ និង សយ ជាអនុបញ្ជាការ
5
។ កងពល ៩២០ មានកងរវៈសេនាធំចំនួនបី រួមមានវរសេនាធំលេខ ៩១ និងវរសេនាធំលេខ ៩២ ដែលដឹកនាំដោយឈ្មោះ សឿន
6
។ ពួកគេត្រូវបានបញ្ជូនទៅមណ្ឌលគិរីដើម្បីល្បាត និងការពារព្រំដែនកុំឲ្យវៀតណាមឈ្លានពាន
7
។ មន្ទីរកងពល ៩២០ មានទីតាំងនៅស្រុកកោះញែក ចម្ងាយប្រហែល ៥០០ ម៉ែត្រពីអូរច្បារ
8
។ លោក សុន វុត ដើមឡើយជានិរសាររបស់ ឈិន បានពីរខែ មុនពេលទទួលបានការតែងតាំងជាប្រធានកងអនុសេនាធំ ក្នុងកងពល ៩២០
9
។ លោក សុន វុត ស្ថិតក្រោមការគ្រប់គ្រងរបស់កងពលផ្ទាល់ ហើយមិនស្ថិតក្រោមកងវរសេនាធំណាមួយឡើយ ដូច្នេះ “[គាត់] ដើរចល័តបានគ្រប់វរសេនាធំ ទាំងបីវរសេនាធំ”
10
។
ក្នុងឆ្នាំ១៩៧៧ មេបញ្ជការកងពល ៩២០ មានដូចជា ឈិន, សយ, កុល, ណុន និង យ៉េន ត្រូវបានហៅឲ្យទៅរៀនសូត្រ ហើយត្រូវបានយកទៅសម្លាប់នៅភ្នំពេញ ដោយចោទប្រកាន់ថាក្បត់អង្គការ និងសហការជាមួយវៀតណាម
11
។ ទាហានទាំងអស់ត្រូវបានប្រាប់ឲ្យប្រុងប្រយ័ត្ន ដោយសារពួកគេអាចត្រូវបានគេចោទថាជាប់ខ្សែបណ្តាញមេបញ្ជាការរបស់ខ្លួន
12
។ ប្រហែលជាខែវិច្ឆិកា ឬខែធ្នូ ឆ្នាំ១៩៧៧ លោក សុន វុត ត្រូវបានចាប់ខ្លួន និងសួរចម្លើយដោយរងការធ្វើទារុណកម្ម នៅក្នុងគុកមួយនៅអូរច្បារ ដែលស្ថិតនៅខាងត្បូងមន្ទីរកងពល ៩២០ ចម្ងាយប្រហែលប្រាំរយម៉ែត្រ
13
។ គាត់មិនដែលមានគំនិតក្បត់អង្គការ ឬឮថាមេបញ្ជាការរបស់គាត់និយាយអំពីការបះបោរណាមួយប្រឆាំងនឹងអង្គការនោះទេ
14
។
កងពល ៨០១ ដឹកនាំដោយ សារឿន ឬ តា០៥ បានមកចាប់ខ្លួនមនុស្សក្នុងកងពល ៩២០ ហើយក្រោយមកបានគ្រប់គ្រងកងពល ៩២០
15
។ តាសាន ឬ បង០៦ ដែលដើមឡើយមកពីក្រចេះ និង តាឡឺ ដែលជាជនជាតិភាគតិចចារាយ មកពីកងពល ៨០១ បានជំនួស ឈិន និង សយ ក្នុងកងពល ៩២០
16
។
ដោយដកស្រង់សក្ខីកម្មរបស់លោក សុន វុត បន្ថែមលើភ័ស្តុតាងផ្សេងទៀត អង្គជំនុំជម្រះសាលាដំបូងបានរកឃើញថា៖ (i) លោក សុន វុត មិនបានជាប់ឃុំនៅគុកភ្នំក្រោលទេ
17
និង (ii) សមាជិកកងពល ៩២០ ត្រូវបានបោសសម្អាត ដោយសារជាប់សង្ស័យថាជាខ្មាំង
18
។
ជម្លោះប្រដាប់អាវុធជាមួយវៀតណាម
ក្នុងកងពល ៩២០ ការងារចម្បងរបស់លោក សុន វុត គឺល្បាតតាមបណ្តោយព្រំដែន ធ្វើចម្រូងចាក់ ជីកលានដ្ឋានដាក់មីន និងធ្វើឲ្យប្រាកដថាកងទ័ពវៀតណាមមិនអាចចូលមកក្នុងទឹកដីកម្ពុជាបាន
19
។ ការងារទាំងអស់នេះគឺអនុវត្តតាមផែនការការពារបូរណភាពទឹកដីរបស់ប្រទេស
20
។ ភាគីកម្ពុជាមិនឯកភាពជាមួយភាគីវៀតណាម ដែលអះអាងថា អូរដាក់ដាំ មិនមែនជាបន្ទាត់ព្រំដែន ហើយទឹកដីរបស់ពួកគេមកដល់ម្រើច ឬកោះញែក
21
។ របាយការណ៍ត្រូវបានបញ្ជូនទៅថ្នាក់លើ ដែលណែនាំត្រឡប់មកវិញឲ្យគាត់ប្រយុទ្ធនៅតាមព្រំដែន ដើម្បីការពារបន្ទាត់ព្រំដែនពិតប្រាកដ
22
។
អាពាហ៍ពិពាហ៍ដោយបង្ខំ
លោក សុន វុត ត្រូវបានរៀបចំឲ្យរៀបការជាមួយយុទ្ធនារីម្នាក់នៅស្រុកកោះញែក
23
។ យ៉ាងណាមិញ ការរៀបការនោះមិនបានធ្វើឡើងទេ ក្រោយពីការជំទាស់របស់គាត់ “ប្រហែល” ជាដោយសារតែគាត់ “នៅក្មេងពេក” ពេលនោះ
24
។ ជាធម្មតា ការរៀបអាពាហ៍ពិពាហ៍ត្រូវបានរៀបចំឡើងសម្រាប់យុទ្ធជន ដែលមានវ័យ ៣០ ឬ ច្រើនជាងនេះ និងសម្រាប់យុទ្ធនារីដែលមានវ័យ ២៩ ឬ ៣០ ឆ្នាំ
25
។ ខ្មែរក្រហមបានផ្គូផ្គងយុទ្ធជនឲ្យរៀបការ ដោយគូស្រករទាំងនោះមិនបានស្គាល់គ្នាជាមុននោះទេ
26
។
គូស្រករត្រូវធ្វើការប្តេជ្ញាចិត្តថា ខ្លួននឹងស្មោះត្រង់និងស្រឡាញ់គ្នាទៅវិញទៅមក
27
។ ក្រោយពេលរៀបការ គូស្រករដែលរៀបការថ្មីថ្មោងត្រូវគេដាក់ឲ្យរស់នៅជាជួរតាមកូនខ្ទមតូចៗ ហើយមានទាហានមួយក្រុមពីរនាក់ដែលស្និទ្ធទៅនឹងមេបញ្ជាការ តាមដានអ្នករៀបការមើលថាតើបានរួមដំណេកក្រោយពេលរៀបការដែរឬទេ
28
។ ក្រោយមកគេធ្វើរបាយការណ៍ទៅថ្នាក់លើ
29
។ អ្នកដែលបដិសេធមិនព្រមរួមដំណេកក្រោយ អាពាហ៍ពិពាហ៍ត្រូវគេយកទៅអប់រំ
30
។ នារីណាដែលមិនស្រឡាញ់ប្តីត្រូវគេអប់រំឲ្យស្រឡាញ់ប្តីតាមការណែនាំរបស់អង្គការ
31
។
អង្គជំនុំជម្រះសាលាដំបូងបានផ្អែកលើភ័ស្តុតាងនេះក្នុងការសន្និដ្ឋានថា៖ (i) ជាទូទៅនារីមានអាយុ ២០ ឆ្នាំ ហើយបុរសមានអាយុ ២៥ ឆ្នាំ នៅពេលរៀបការ
32
(ii) ក្រោយពិធីរៀបការចប់ ជាធម្មតាប្តីប្រពន្ធត្រូវគេតាមដាន ដើម្បីឲ្យប្រាកដថាប្តីប្រពន្ធបានរួមដំណេកក្រោយអាពាហ៍ពិពាហ៍
33
និង (iii) ជាទូទៅ ពេលអាជ្ញាធរខ្មែរក្រហមរកឃើញថា ប្តីប្រពន្ធណាមិនបានរួមដំណេកទេនោះ មានដំណើរការតាមដានបន្ត ដោយក្នុងដំណើរការនេះ អាជ្ញាធរកោះហៅបុគ្គលទាំងនោះមកពិភាក្សារួមគ្នា ឬដាច់ដោយឡែកពីគ្នា
34
។ ប៉ុន្តែ អង្គជំនុំជម្រះសាលាដំបូងយល់ឃើញថា ករណីរបស់លោក សុន វុត ជាករណីលើកលែង និងថាមានភ័ស្តុតាងភាគច្រើនលើសលប់បង្ហាញថា ប្រជាជនមិនមានជម្រើសណាក្រៅពីធ្វើតាម និងរៀបការតាមការអនុវត្តដែលមានលក្ខណៈបង្ខំ ដែលកើតចេញពីបទបញ្ជារបស់បក្សកុម្មុយនីស្តកម្ពុជា ស្តីពីការរៀបអាពាហ៍ពិពាហ៍
35
។
នៅដំណាក់កាលសាទុក្ខ ខៀវ សំផន បានតវ៉ាថា អង្គជំនុំជម្រះសាលាដំបូងមានកំហុសក្នុងការផ្អែកលើសក្ខីកម្មរបស់លោក សុន វុត ដោយសារគាត់មិនបានផ្តល់សក្ខីកម្មថា មន្ត្រីជាន់ខ្ពស់នៅថ្នាក់លើបានដឹងអំពីការអនុវត្តការតាមដានអំពីការរួមដំណេកក្រោយអាពាហ៍ពិពាហ៍នោះទេ
36
និងមិនបានរៀបរាប់អំពីវិធានការណាមួយដែលធ្វើប្រឆាំងនឹងប្តីប្រពន្ធរៀបការថ្មីថ្មោង ដែលមិនបានរួមដំណេកនោះឡើយ
37
។ អង្គជំនុំជម្រះតុលាការកំពូលបានសម្រេចថា អង្គជំនុំជម្រះសាលាដំបូងមិនមានកំហុសនៅក្នុងការសន្និដ្ឋានរបស់ខ្លួនឡើយ ដោយពិចារណាថា សក្ខីកម្មរបស់លោក សុន វុត បានបង្ហាញថា ថ្នាក់លើបានរៀបចំគោលនយោបាយទាក់ទងនឹងការរួមដំណេកក្រោយការរៀបអាពាហ៍ពិពាហ៍
38
និងបានយល់ឃើញថា ភ័ស្តុតាងផ្សេងទៀតបង្ហាញពីគោលនយោបាយ “ការអប់រំកែប្រែឡើងវិញ” ដែលផ្ទុយទៅនឹង “ការផ្តល់ប្រឹក្សា”
39
។
សេចក្តីថ្លែងទុក្ខ
“គេចាប់ធ្វើការបម្រើកងទ័ពដើម្បីបម្រើជាតិ។ ហើយគេចាប់ខ្ញុំដាក់គុក ហើយខ្ញុំគួរឲ្យខ្ញុំឈឺចាប់ ដល់ពេលខ្ញុំឆ្លើយទៅថាមិនមែនជាសំណួររបស់ខ្ញុំ ៗអន់ចិត្ត ដោយខ្ញុំជាជនរងគ្រោះ។ ហើយដែលខ្ញុំបម្រើធ្វើកងទ័ពរាប់ឆ្នាំ សុខចិត្តលះបង់អាយុជីវិតដើម្បីជាតិ ដើម្បីមាតុភូមិជាមួយបក្ស ប៉ុន្ដែមូលហេតុអ្វី ខ្ញុំចង់សួរទៅលោកប្រធានឲ្យបំភ្លឺឲ្យជម្រាបទៅខាងលោកជនជាប់ចោទឲ្យជម្រាបប្រាប់ចែកខ្ញុំផងដែលជនរងគ្រោះបាទ។ ហើយឪពុកម្ដាយខ្ញុំក៏យកវ៉ៃចោល ហើយអស់បួនប្រាំនាក់។ ហើយឪពុកខ្ញុំ គាត់មិនមានធ្វើអីទេ ពីដើមគាត់ថាមិនមានទៅគាត់ធ្វើជំទប់លេខ១ មេឃុំ ពីសម័យសាធារណរដ្ឋ ហើយពីជំនាន់សម្ដេចឪផង។ គាត់បានជាប់មេឃុំយូរឆ្នាំណាស់ទៅហើយ។ ក៏គាត់ក៏ដាច់ភ្នំពេញ៧៥ ដែលខ្ញុំមិនបានដឹងដែរ ប៉ុន្ដែខ្ញុំអាល័យតែធ្វើការនៅដីរតនៈ -- មណ្ឌលគិរី នៅទាហាន។ ប៉ុន្ដែម៉ែឪដែលនៅឯណេះ ខ្ញុំអត់ដឹងទេ ប៉ុន្ដែខ្ញុំទៅតាំងពីនោះទៅ បម្រើកងទ័ពទៅ បញ្ជូនទៅដាច់ភ្នំពេញ៧៥ បញ្ជូនទៅមណ្ឌលគិរី។ ដល់ទៅឪពុកម្ដាយក៏មិនដឹងថាស្លាប់ មិនដឹងថារស់ទេ ប៉ុន្តែខ្ញុំអាល័យតែធ្វើការបម្រើ ដូចថាបម្រើអង្គការ បម្រើបក្សដើម្បីជាតិ ការពារទឹកដី។ ម្ល៉ោះហើយគេយកម៉ែឪខ្ញុំមកសម្លាប់ចោលអ៊ីចេះ តើឲ្យខ្ញុំវាឈឺចាប់ ឬមួយយ៉ាងណា? ហើយសូមនែ៎ ជនជាប់ចោទ សូមបំភ្លឺ ចែកខ្ញុំ ឲ្យខ្ញុំធូរអារម្មណ៍ខ្លះ។ ខ្ញុំមិនមែនប្រកាន់អីទៅៗចោទដែលថាជនជាប់ចោទអីចេះតែចោទខុសរឿងមិនមែនទេ គ្រាន់តែប្រាប់។ តើអ្នកណាដែលសម្លាប់ដែលជនស្មោះត្រង់ដូចជាឪពុកម្ដាយខ្ញុំ ជាស្មោះត្រង់មិនមែនធ្វើអ្វីទៅខុសពីអង្គការ ឬមួយយ៉ាងណា ក្បត់ ឬមួយយ៉ាងណាបានគេវ៉ៃ ចោល។ ខ្ញុំសូមឲ្យលោកប្រធានបំភ្លឺចែកផង ទៅលោកជនជាប់ចោទ ឲ្យខ្ញុំបានធូរអារម្មណ៍ខ្ញុំខ្លះ”
40
វីដេអូ
