ថាន់ ធីម
រហ្សនាម: 2-TCCP-288
សំណុំរឿង: សំណុំរឿង ០០២/០២
ប្រភេទ: ដើមបណ្តឹងរដ្ឋប្បវេណី
លោក ថាន់ ធីម ជាប្រជាជនថ្មីដែលត្រូវបានបញ្ជូនពីស្រុកគិរីវង់ ខេត្តតាកែវ មកឃុំត្រពាំងធំខាងជើង ស្រុកត្រាំកក់ ក្នុងរដូវប្រាំងឆ្នាំ១៩៧៧ ឲ្យមកធ្វើការនៅភូមិត្រពាំងត្រាវក្នុងកងដឹកជញ្ជូន ឬកងរទេះគោ។ ចំណែកប្រពន្ធរបស់គាត់ត្រូវបានចាត់ឱ្យដាំដុះ
1
។ ក្រោយមក គាត់ត្រូវបានចាប់ខ្លួន និង ឃុំខ្លួននៅមន្ទីរសន្តិសុខអង្គរកាក្នុងឆ្នាំ១៩៧៨ បន្ទាប់ពីជាប់ពាក់ព័ន្ធជាមួយអតីតទាហានរបបសាធារណរដ្ឋខ្មែរដោយសារកូនស្រីរបស់គាត់បានឆ្លើយដាក់
2
។ គាត់បានផ្តល់សក្ខីកម្មក្នុងនាមជាដើមបណ្តឹងរដ្ឋប្បវេណីនៅចំពោះមុខអង្គជំនុំជម្រះសាលាដំបូងអំពីការចាប់ខ្លួន និង ការឃុំខ្លួនគាត់
3
។ អង្គជំនុំជម្រះសាលាដំបូងបានអនុញ្ញាតឱ្យភាគីសាកសួរលោក ថាន់ ធីម ដោយសង្ខេបអំពីកន្លែងឃុំខ្លួនអង្គរកា ដែលមិនត្រូវបានកំណត់ថា ជាទីតាំងឧក្រិដ្ឋកម្មនៅក្នុងដីកាដំណោះស្រាយនោះទេ ដោយផ្អែកលើមូលដ្ឋានថា វាជាផ្នែកមួយនៃអង្គហេតុដែលជាទូទៅទាក់ទងនឹងស្រុកត្រាំកក់ និង ក្រាំងតាចាន់
4
។ លោក ថាន់ ធីម បានរៀបរាប់ថាគាត់ត្រូវបានចាប់ខ្លួននៅម៉ោងប្រហែល ៧ ឬ ៨ យប់ ក្រោយពីត្រឡប់មកកងវិញ។ គេប្រាប់ថាគាត់ត្រូវបានកោះហៅឲ្យទៅប្រជុំ ប៉ុន្តែត្រូវគេនាំទៅកន្លែងកងឈ្លប ហើយពួកឈ្លបចេញមកវាយគាត់ រួចដឹកគាត់យកទៅអង្គការ
5
។ “គេៗហូតដែករនុកហ្នឹងបាន គេហូតដែលរនុកហ្នឹងចេញទៅ បញ្ចេញអ្នកមុនហ្នឹងទៅធ្វើការ នៅតែម្នាក់ឯងគត់។ ដល់គេបញ្ចូលមកវិញ គេមិនបុកដែកខ្នោះហ្នឹងមកវិញ បុកទៅខុសរន្ធហ្នឹង ខ្ញុំតម្រង់មិនទាន់ត្រូវជើងឈាមល្ហាច រហូតដល់ដំបៅរលួសរលួយជើងទៅទៀត អត់មានថ្នាំអីព្យាបាលទេ។ ខ្ញុំលាត់ឲ្យមើលស្នាមទាល់តែឥឡូវ។ ព្រោះថាឈឺចាប់អាផ្នែកផ្លូវកាយហ្នឹងវាឈឺហើយ ផ្លូវចិត្តហ្នឹងក៏វាពិបាកណាស់ទៅទៀត។ បត់ដៃ បត់ជើងអីហ្នឹងមិនងាយទេ ខ្ញុំថា ខ្ញុំតាំងពីខ្ញុំកើតមកខ្ញុំមិនដែលជួបប្រទះទេ ទើបមកក្នុងជំនាន់បីឆ្នាំហ្នឹង ខ្ញុំជួបប្រទះធ្ងន់ធ្ងរយ៉ាងនេះ”
6
។ លោក ថាន់ ធីម ត្រូវបានឃុំខ្លួនក្នុងកន្លែងសមមិត្ត ម៉េង អស់រយៈពេល ៣ ខែ
7
។ លោក ថាន់ ធីម ត្រូវបានឈ្លបតាមដានបន្ទាប់ពីគាត់មកដល់ស្រុកត្រាំកក់រហូតដល់គាត់ត្រូវបានចាប់ខ្លួនប៉ុន្មានខែក្រោយមក
8
។ ក្រុមគ្រួសាររបស់គាត់មិនដឹងអ្វីពីការចាប់ខ្លួនគាត់ទេ។ ពួកគេគ្រាន់តែកត់សម្គាល់ការបាត់ខ្លួនរបស់គាត់ ហើយគិតថាគាត់បានស្លាប់ហើយ
9
។ អង្គជំនុំជម្រះសាលាដំបូងទទួលយកការរៀបរាប់របស់លោក ថាន់ ធីម ដែលថាការចាប់ខ្លួនរបស់គាត់បានធ្វើឡើងបន្ទាប់ពីកូនស្រីរបស់គាត់ត្រូវបានគេវាយដំ ដែលបណ្តាលឱ្យឆ្លើយដាក់គាត់
10
។ អង្គជំនុំជម្រះសាលាដំបូងយល់ឃើញថាការចាប់ខ្លួនលោក ថាន់ ធីម មានសារៈសំខាន់ណាស់ ដោយសារតែបានរួចផុតជីវិត ទោះជាគាត់ត្រូវបានឆ្លើយដាក់ដោយកូនស្រីរបស់គាត់ក្តី ក៏គ្រួសាររបស់គាត់មិនអាចដឹងថាគាត់ក្លាយជាបែបណា ក្នុងអំឡុងពេលបីខែ ដែលគាត់ត្រូវបានឃុំខ្លួននៅកន្លែងលោក ម៉េង
11
។ លោក ថាន់ ធីម បានរំឮកពីរបៀបដែលគ្រួសារនៅក្នុងឃុំរបស់គាត់ ត្រូវបានបំបែកចេញពីគ្នា ឲ្យទៅនៅតាមកងបុរស កងស្ត្រី និង កងកុមារ ដើម្បីធ្វើការងារផ្សេងៗ ដូចជា ភ្ជួរស្រែ ឬដឹកជញ្ជូនជាដើម
12
។ គាត់ត្រូវបានអង្គការអនុញ្ញាតឲ្យទៅជួបកូននៅថ្ងៃទី ដប់ ទីម្ភៃ ឬទីសាមសិប ក្នុងខែ នៅពេលល្ងាច បន្ទាប់ពីពួក គេបញ្ចប់ការងារ ។ ហើយពេលខ្លះគាត់បានទៅមើលកូនៗរបស់គាត់ ប៉ុន្តែជាធម្មតាគាត់មិនបានជួបពួកគេទេដោយសារពួកគេដេកលក់ ឬដើររើសអាហារ
13
។ នេះជាស្ថានភាពទូទៅរបស់គ្រួសារទាំងអស់ក្នុងរបបនោះ
14
។ លោក ថាន់ ធីម បានផ្តល់សក្ខីកម្មថា ការបំបែកចេញពីក្រុមគ្រួសារនៅស្រុកត្រាំកក់ បានជះឥទ្ធិពលផ្លូវចិត្តយ៉ាងខ្លាំងដល់ឪពុកម្តាយ និង កូនៗជាច្រើននាក់
15
។ ពួកគេក៏បានរងទុក្ខដោយសារតែការចាប់ខ្លួន និងការបាត់សមាជិកគ្រួសារ ដោយសារតែពួកគេមិនបានដឹងពីជោគវាសនារបស់មនុស្សជាទីស្រលាញ់របស់ពួកគេ ឬគិតថាពួកគេបានបាត់បង់ជីវិតហើយ
16
។ អង្គជំនុំជម្រះសាលាដំបូងបានផ្អែកលើសក្ខីកម្មរបស់លោក ថាន់ ធីម និង ដើមបណ្តឹងរដ្ឋប្បវេណីចំនួន ១៣ រូប ទៀត
17
ក្នុងការកំណត់ថា ប្រជាជនត្រូវបានបំបែកចេញពីក្រុមគ្រួសារ បង្ខំឱ្យធ្វើការ ដាក់ទណ្ឌកម្មដោយសារការព្យាយាមមកជួបសមាជិកគ្រួសាររបស់ពួកគេ ត្រូវចាប់ខ្លួន និង បាត់ខ្លួន
18
។
វីដេអូ
