អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) បានរៀបចំកម្មវិធីទស្សនកិច្ចសិក្សាជូនសិស្សានុសិស្សប្រមាណ ១៦០ នាក់ ដែលកំពុងសិក្សាថ្នាក់ទី ១២ នៃវិទ្យាល័យឧដុង្គ ស្រុកឧដុង្គ ខេត្តកំពង់ស្ពឺ ទៅសិក្សាស្វែងយល់នៅវិមានឈ្នះ ឈ្នះ សារៈមន្ទីរឧក្រិដ្ឋកម្មប្រល័យពូជសាសន៍ទួលស្លែង និងមជ្ឈមណ្ឌលប្រល័យពូជសាសន៍ជើងឯក។ ការរៀបចំដំណើរទស្សនកិច្ចសិក្សានៅថ្ងៃទី ១០ ខែ ឧសភា ឆ្នាំ ២០២៣ នេះ គឺដើម្បីជួយឱ្យសិស្សានុសិស្សទាំងនោះបានយល់ដឹងបន្ថែម និងចងចាំអំពីសោកនាដកម្មរបស់ប្រជាជនកម្ពុជានៅក្នុងរបបខ្មែរក្រហម ការតស៊ូក្នុងការរំដោះប្រទេសជាតិរបស់រាជរដ្ឋាភិបាលកម្ពុជាពីរបបប្រល័យពូជសាសន៍ និងការជំនុំជម្រះក្ដីលើឧក្រិដ្ឋកម្មក្នុងរបបឃោរឃៅនោះ។
ក្នុងដំណើរទស្សនកិច្ចសិក្សានៅថ្ងៃនេះ សិស្សទាំងអស់ទទួលបានការស្វាគមន៍ និងពន្យល់យ៉ាងក្បោះក្បាយពីមគ្គុទ្ទេសន៍អំពីអត្ថន័យ និងសារៈសំខាន់នៃវិមានឈ្នះ ឈ្នះ សារៈមន្ទីរឧក្រិដ្ឋកម្មប្រល័យពូជសាសន៍ទួលស្លែង មជ្ឈមណ្ឌលប្រល័យពូជសាសន៍ជើងឯក និងមានបទបង្ហាញរបស់មន្ដ្រីមកពីសាលាក្ដីខ្មែរក្រហម អំពីសមិទ្ធផលនៃការជំនុំជម្រះក្ដីលើអតីតមេដឹកនាំជាន់ខ្ពស់នៃរបបខ្មែរក្រហមផងដែរ។
លោកគ្រូ សំ ចេក ដែលបានចូលរូមក្នុងកម្មវិធីនេះដែរ បានបញ្ជាក់ថា ដំណើរទស្សនកិច្ចនេះ ពិតជាមានសារៈសំខាន់ណាស់សម្រាប់យុវជនជំនាន់ក្រោយ ដើម្បីឱ្យពួកគាត់បានចងចាំ និងយល់ដឹងកាន់តែច្បាស់នូវភាពសាហាវឃោរឃៅរបស់របបខ្មែរក្រហមបានប្រព្រឹត្តិមកលើប្រជាជនកម្ពុជា។ លោកគ្រូបន្ដថា សិស្សានុសិស្ស ក៏បានយល់ដឹងអំពីរឿងរ៉ាវពិតរបស់ប្រមុខរាជរដ្ឋាភិបាលកម្ពុជា ក្នុងការពលីដើម្បីសង្គ្រោះប្រទេសជាតិពីរបបប្រល័យពូជសាសន៍ ហើយបាននាំយកសុខសន្ដិភាពជូនប្រជាជនកម្ពុជា និងបានផ្ដល់យុត្តិធម៌ជូនជនរងគ្រោះនៃរបបវាលពិឃាតនោះតាម រយៈនាំយកមេដឹកនាំរបបប្រល័យពូជសាសន៍មកជំនុំជម្រះក្ដីនៅក្នុងសាលាក្ដីខ្មែរក្រហម។
លោកបន្ថែមថា រូបលោកតំណាងឱ្យយុវជនដែលចូលរួមក្នុងដំណើរទស្សនកិច្ចសិក្សានៅក្នុងថ្ងៃនេះ សូមថ្លែងនូវការកោតសរសើរ និងដឹងគុណដល់គោលនយោបាយឈ្នះឈ្នះរបស់រាជរដ្ឋាភិបាលកម្ពុជា ដែលបានដឹកនាំប្រទេសនាំមកនូវសុខសន្ដិភាព និងស្ថេរភាពសង្គម។ ហើយលោកក៏សូមអរគុណដល់ អ.វ.ត.ក ដែលបានរៀបចំកម្មវិធីនេះឡើង ដើម្បីឲ្យពួកគាត់បានយល់ដឹង បានទស្សនាទីតាំងឧក្រិដ្ឋកម្មដែលបន្សល់ទុកពីរបបខ្មែរក្រហម និងបានមកឃើញការអភិវឌ្ឍន៍នៅក្នុងរាជធានីភ្នំពេញនាពេលបច្ចុប្បន្ននេះផងដែរ។
លោកគ្រូក៏បានសំណូមពរដល់សាលាក្ដីខ្មែរក្រហម ឱ្យបន្ដរៀបចំទស្សនកិច្ចសិក្សានេះជូនសិស្សនៅក្នុងវិទ្យាល័យឧដុង្គ ក៏ដូចជាយុវជនជំនាន់ក្រោយផ្សេងៗទៀតឱ្យបានច្រើនដើម្បីឱ្យពួកគេបានយល់ដឹងកាន់តែច្បាស់អំពីប្រវត្តិសាស្ដ្រដ៏ជូចត់របស់កម្ពុជា។
សូមបញ្ជាក់ថា អ.វ.ត.ក បានរៀបចំរៀងទស្សនកិច្ចសិក្សារៀងរាល់សប្ដាហ៍ ជូនសិស្សានុសិស្ស និស្សិត យុវជន និងពលរដ្ឋទូទៅ ដើម្បីជួយជម្រុញដល់ការចងចាំ និងការចូលរួមទប់ស្កាត់ការវិលត្រឡប់មកវិញនូវអំពើឃោរឃៅ ដូចក្នុងរបបខ្មែរក្រហមមកលើទឹកដីកម្ពុជាសាជាថ្មី។ ចាប់តាំងពីតុលាការដំណើការដំបូង រហូតមកដល់ឆ្នាំ២០២៣ នេះ សាធារណជនជាតិ និងអន្តរជាតិជាងកន្លះលាននាក់ហើយ បានចូលរួមក្នុងដំណើរទស្សនកិច្ចសិក្សា ក្រោមការសម្របសម្រួល និងរៀបចំដោយផ្នែកកិច្ចការសាធារណៈនៃសាលាក្តីខ្មែរក្រហម៕