អង្គជំនុំជម្រះសាលាដំបូងនៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) បានបង្គាប់ឲ្យភាគីទាំងអស់នៅក្នុងសំណុំ រឿង ០០២/០២ ត្រូវចូលរួមក្នុងសវនាការលើអង្គសេចក្តីដែលនឹងប្រព្រឹត្តចាប់ពីថ្ងៃទី១៧ ខែវិច្ឆិកា ឆ្នាំ ២០១៤ តទៅ។ អង្គជំនុំជម្រះសាលាដំបូងក៏បានជូនដំណឹងដល់ក្រុមមេធាវីការពារក្តីខៀវ សំផន និងនួន ជា ឲ្យបានដឹងជាមុនផងដែរថា អង្គជំនុំជម្រះនឹងចាត់វិធានការយ៉ាងម៉ឺងម៉ាត់ ប្រសិនបើក្រុមមេធាវីការពារក្តីណាមួយ ខកខានមិនបានគោរពតាមដីកាបង្គាប់ឱ្យចូលរួមក្នុងសវនាការនាពេលខាងមុខនេះ។
បន្ទាប់ពីក្រុមមេធាវី ខៀវ សំផន និងនួន ជា ត្រូវបានផ្តល់ឱកាសចុងក្រោយនៅក្នុងកិច្ចប្រជុំរៀបចំសវនាការកាលពីថ្ងៃទី២៨ ខែតុលា ឆ្នាំ ២០១៤ដើម្បីបង្ហាញពីមូលហេតុនានា ក្នុងការគាំទ្រគោលជំហររបស់ខ្លួនទាក់ទងនឹងការចូលរួមសវនាការលើអង្គសេចក្តីក្នុងសំណុំរឿង ០០២/០២ រួចមកហើយនោះ អង្គជំនុំជម្រះសាលាដំបូងបានចេញសេចក្តី
សម្រេចដោយមានសម្អាងហេតុពេញលេញមួយ បដិសេធចោលទឡ្ហីករណ៍នានាដែលបានលើកឡើងដោយមេធាវីការពារក្តីទាំងពីរក្រុមនេះ។