អង្គការ CPS/GIZ ដែលជាអង្គការរបស់ប្រទេសអាឡឺម៉ង់ បានរៀបចំកិច្ចពិភាក្សាស្ទាបស្ទង់គម្រោងជាមួយអង្គភាពគាំពារជនរងគ្រោះ (VSS) នៃអង្គជំនុំជម្រះវិសាមញ្ញក្នុងតុលាការកម្ពុជា(អ.វ.ត.ក) ពីថ្ងៃទី ២៧ ខែ មីនា ដល់ថ្ងៃទី ២៩ ខែ មីនា ឆ្នាំ ២០២៣ នៅអគារថ្មីនៃ អ.វ.ត.ក។ កិច្ចពិភាក្សាស្ទាបស្ទង់នេះ មានគោលបំណង ស្វែងយល់ពីភាពស្របគ្នាលើអាណតិ្ត គោលបំំណងរបស់អង្គភាពគាំពារជនរងគ្រោះ និងអង្គការ CPS ការពង្រឹងកិច្ចសហប្រតិបត្តិការឱ្យកាន់តែស៊ីជម្រៅ និងបង្កើតឱ្យមានមូលដ្ឋានសម្រាប់ការផ្ដល់ទីប្រឹក្សាអន្តរជាតិ ដល់អង្គភាពគាំពារជនរងគ្រោះ។
កិច្ចប្រជុំចាប់ផ្តើមឡើងនៅថ្ងៃទី២៧ ដោយមតិស្វាគមន៍ពីឯកឧត្តម ក្រាញ់ តូនី ប្រធានរដ្ឋបាលស្តីទីនៃ អ.វ.ត.ក។ បន្ទាប់មក លោក Knut Rosandhaug អនុប្រធានរដ្ឋបាលនៃ អ.វ.ត.ក ធ្វើបទបង្ហាញអំពីផែនការរយៈពេល៣ឆ្នាំរបស់ អ.វ.ត.ក និងចុងក្រោយលោក Martin Hennings អ្នកសម្របសម្រួលកម្មវិធីគម្រោងរបស់អង្គការ CPS/GIZ បានធ្វើបទបង្ហាញអំពីកម្មវិធីរបស់អង្គការ CPS ក្នុងប្រទេសកម្ពុជា មុនពេលកិច្ចពិភាក្សាបានចាប់ផ្តើម។
នៅថ្ងៃទី ២៨ និងថ្ងៃទី ២៩ ខែ មីនា ទីប្រឹក្សាអន្តរជាតិរបស់អង្គការ CPS ចំនួនពីររូបបានរៀបចំកិច្ចប្រជុំមួយនៅក្នុងការិយាល័យរបស់អង្គភាពគាំពារជនរងគ្រោះ នៃ អ.វ.ត.ក ក្នុងគោលបំណងធ្វើការកំណត់ដៃគូរសកម្មភាព កិច្ចសហការជាយុទ្ធសាស្រ្ត ស្វែងរកលទ្ធភាពតម្រូវការ និងការពិនិត្យមើលឲ្យកាន់តែស៊ីជម្រៅអំពីរបៀបនៃការគាំទ្រអង្គភាពគាំពារជនរងគ្រោះ (VSS) នាពេលអនាគត។