លោកតាយ គឹមហ៊ាន់

លោក តាយ គឹមហ៊ាន់ បានផ្តល់សក្ខីកម្មថា ផ្ទះរបស់គាត់នៅចំងាយ ៥០ម៉ែត្រពីវត្តអូរត្រកួន ជាកន្លែងដែលគាត់ឃើញមានមនុស្សច្រើននាក់ត្រូវបានគេនាំទៅបួនទៅប្រាំដងក្នុងមួយថ្ងៃ។ បុរស ស្ត្រី និងកុមារត្រូវបាននាំទៅវត្ត ដែលគេចាក់ភ្លេងខ្លាំងៗ។ មនុស្សចាស់ត្រូវបានចងនឹងខ្សែ ខណៈក្មេងតូចៗតាមពីក្រោយ។ សាក្សីមិនបានដឹងពីមូលហេតុដែលនាំមនុស្សទៅវត្តនោះទេ ប៉ុន្តែអ្នកភូមិផ្សេងទៀតប្រាប់គាត់ថា ពួកគេត្រូវបានគេសម្លាប់នៅខាងក្នុងខណៈពេលដែលកំពុងចាក់ភ្លេង។ សាក្សីមានភារកិច្ចច្រូតស្រូវ ហើយត្រូវបានកម្មាភិបាលគំរាមកំហែងដល់អាយុជីវិតពីរដង។ បន្ទាប់ពីរបបនេះត្រូវបានបញ្ចប់ លោក តាយ បានបញ្ជាក់ថា ជនជាតិចាមលែងនៅក្នុងភូមិរបស់លោកទៀតហើយ។