កញ្ញា ម៉េត សោភា ប្រធានគណៈប្រតិភូដឹកនាំយុវជនស្រុកកោះសូទិន បានលើកឡើងថា “យុវជនអាចទទួលបានចំណេះដឹងច្រើនទាក់ទងនឹងភាពវេទនានៅក្នុងសម័យខ្មែរក្រហម ព្រោះថាកាលពីសម័យខ្មែរក្រហមនឹងគឺ វេទនាខ្លាំងណាស់ បង្អត់បាយបង្អត់ទឹក គ្មានអាហារគ្រប់គ្រាន់ គេងក៏មិនគ្រប់គ្រាន់ បង្ខំឱ្យធ្វើការ ហើយមានកាប់សម្លាប់ប្រជាពលរដ្ឋ ទុក្ខវេទនាប្រពន្ធព្រាត់ប្ដី ម្ដាយព្រាត់កូន ហើយមិនបាននៅជុំគ្រួសារដូចឥលូវទេ។” សោភា បន្ថែមថា យុវជនក៏បានដឹងរឿងរ៉ាវកាន់តែច្បាស់អំពីការពលីរបស់រាជរដ្ឋាភិបាលកម្ពុជាដើម្បីសង្គ្រោះប្រទេសជាតិចេញពីរបបប្រល័យពូជសាសន៍ និងកេរដំណែលនៃការជំនុំជម្រះក្ដីលើអតីតមេដឹកនាំជាន់ខ្ពស់នៃរបបខ្មែរក្រហម។
អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) បានរៀបចំកម្មវិធីទស្សនកិច្ចសិក្សាជូនសិស្សានុសិស្ស និងយុវជនប្រមាណ ១៥០ នាក់ មកពីវិទ្យាល័យ កោះសូទិន ក្នុងស្រុកកោះសូទិន ខេត្ដកំពង់ចាម នាថ្ងៃទី១៥ ខែមិថុនា ឆ្នាំ២០២៣ នេះ។ ក្នុងដំណើរទស្សនកិច្ចសិក្សារៀបចំដោយ អ.វ.ត.ក នៅថ្ងៃនេះ សិស្សានុសិស្ស និងយុវជនទាំងអស់បានទៅទស្សនកិច្ចសិក្សានៅវិមាន ឈ្នះ ឈ្នះ សារៈមន្ទីរឧក្រិដ្ឋកម្មប្រល័យពូជសាសន៍ទួលស្លែង មជ្ឈមណ្ឌលប្រល័យពូជសាសន៍ជើងឯក និងទទួលបានការបទបង្ហាញអំពីសមិទ្ធផលនៃការជំនុំជម្រះក្ដីលើអតីតមេដឹកនាំជាន់ខ្ពស់នៃរបបខ្មែរក្រហមផងដែរ។
សោភា បញ្ជាក់បន្ថែមថា បន្ទាប់ពីបានទស្សនកិច្ចនៅតាមទីតាំងនីមួយៗ កញ្ញាមានអារម្មណ៍សោកសង្រេងជាពន់ពេកនៅពេលបានស្ដាប់ការពន្យល់បកស្រាយរបស់មន្ដ្រីនៅតាមទីតាំងនីមួយៗ។ សម្រាប់កញ្ញា ដែលជាយុវជនកើតមិនទាន់របបខ្មែរក្រហមនោះ កញ្ញាមិនចង់ឃើញរបបបែបនោះកើតមានឡើងជាថ្មីម្ដងទៀតនៅក្នុងប្រទេសកម្ពុជានោះទេ ដោយកញ្ញាស្នើឱ្យយុវជនទាំងអស់ត្រូវជួយគ្នារំលឹក និងចងចាំជានិច្ចនូវភាពខ្លោចផ្សារទាំងនោះ។
កញ្ញា សោភា ក៏បានថ្លែងកោតសរសើរ និងដឹងគុណដល់រាជរដ្ឋាភិបាលកម្ពុជា ដែលបាននាំមកនូវសុខសន្ដិភាព ស្ថេរភាពសង្គម និងការអភិវឌ្ឍដល់ប្រទេសកម្ពុជា។ ហើយ កញ្ញា ក៏មិនភ្លេចថ្លែងអំណរគុណដល់ អ.វ.ត.ក ដែលបានរៀបចំកម្មវិធីនេះឡើង ដើម្បីឲ្យពួកគាត់បានយល់ដឹង បានទស្សនាទីតាំងឧក្រិដ្ឋកម្មដែលបន្សល់ទុកពីរបបខ្មែរក្រហម និងបានមកឃើញការអភិវឌ្ឍន៍នៅក្នុងរាជធានីភ្នំពេញនាពេលបច្ចុប្បន្ននេះ។
សូមបញ្ជាក់ថា កម្មវិធីទស្សនកិច្ចសិក្សានេះ ត្រូវបាន អ.វ.ត.ក រៀបចំឡើងរៀងរាល់សប្ដាហ៍ ជូនសិស្សានុសិស្ស និស្សិត យុវជន និងពលរដ្ឋទូទៅ ដើម្បីជួយជម្រុញដល់ការចងចាំ និងការចូលរួមទប់ស្កាត់ការវិលត្រឡប់មកវិញនូវអំពើឃោរឃៅ ដូចក្នុងរបបខ្មែរក្រហមមកលើទឹកដីកម្ពុជាសាជាថ្មី។ ចាប់តាំងពីឆ្នាំ ២០០៩ រហូតមកដល់ឆ្នាំ២០២៣ នេះ សាធារណជនជាតិ និងអន្តរជាតិជាងកន្លះលាននាក់ហើយ បានចូលរួមក្នុងដំណើរទស្សនកិច្ចសិក្សា ក្រោមការសម្របសម្រួល និងរៀបចំដោយផ្នែកកិច្ចការសាធារណៈនៃសាលាក្តីខ្មែរក្រហម៕