សហព្រះរាជអាជ្ញានៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) ចេញសេចក្តីថ្លែងការណ៍ជាសាធារណៈនេះគឺដើម្បីជូនដំណឹងឲ្យបានជ្រាបអំពីកិច្ចដំណើរការនីតិវិធីក្នុងសំណុំរឿងលេខ ០០៣ ជាពិសេសទាក់ទិននឹងព័ត៌មានដែលបានផ្សាយនៅលើទំព័រសារព័ត៌មានដែលថា មានអង្គហេតុថ្មីៗដែលគេអះអាងថាមានការទាក់ទងទៅនឹងការស៊ើបសួរនៅក្នុងសំណុំរឿង ០០៣ គឺជាព័ត៌មានមិនត្រឹមត្រូវនិងដែលនាំឲ្យមានការយល់ច្រឡំកាន់តែខ្លាំងឡើង។ ដោយសារតែ សំណុំរឿង ០០៣ នេះកំពុងតែស្ថិតក្នុងកិច្ចស៊ើបសួរនៅឡើយ សហព្រះរាជអាជ្ញាបានស្វែងរកនិងបានទទួលសិទ្ធិអំណាចក្នុងការធ្វើសេចក្តីថ្លែងការណ៍នេះ។
សហព្រះរាជអាជ្ញាបានទទួលនិងពិនិត្យពិចាណាលើព័ត៌មាននៃការចោទប្រកាន់ថាមានអង្គហេតុថ្មីៗដែលគេអះអាងថាមានការទាក់ទងទៅនឹងការស៊ើបសួរនៅក្នុងសំណុំរឿងលេខ ០០៣។ សហព្រះរាជអាជ្ញាកត់សម្គាល់ថា អង្គហេតុនានាដែលទាក់ទងទៅនឹងការលុកលុយរបស់កងយោធាកម្ពុជាប្រជាធិបតេយ្យទៅក្នុងប្រទេសវៀតណាម ត្រូវបានស៊ើបសួររួចហើយជាផ្នែកនៃសំណុំរឿង ០០២។ លើសពីនេះទៀត អង្គហេតុថ្មីៗដែលបានចោទប្រកាន់ មិនមានការទាក់ទងទៅនឹងទីតាំងឧក្រិដ្ឋកម្មនានានៅក្នុងសំណុំរឿង ០០៣ ទេ ដែលកន្លងមក សហព្រះរាជអាជ្ញាធ្លាប់បានប្រកាសដល់សាធារណៈជនរួចហើយ និងបើតាមមតិរបស់ខ្លួន វាអាចពង្រីកវិសាលភាពនៃកិច្ចស៊ើបសួរបន្ថែមទៀតហួសពីអង្គហេតុចាំបាច់សម្រាប់ធ្វើការវាយតម្លៃលើបញ្ហានៃការទទួលខុសត្រូវចំពោះឧកិ្រដ្ឋកម្មទាំងឡាយដែលបានចោទប្រកាន់នៅក្នុងសំណុំរឿង ០០៣ នៃដីកាសន្និដ្ឋានបញ្ជូនរឿងឲ្យស៊ើបសួរ។ មានសេចក្តីរាយការណ៍សារព័ត៌មានជាច្រើនទាក់ទងនឹងអត្តសញ្ញាណរបស់បុគ្គលនានាថាជាមុខសញ្ញានៃកិច្ចស៊ើបសួរ គឺជាការខុសឆ្គងនិងធ្វើឲ្យមានការយល់ច្រឡំ។ ផ្ទុយទៅនឹងការចុះផ្សាយទាំងនោះ អតីតសហចៅក្រមស៊ើបអង្កេតអន្តរជាតិមិនមានមតិឬសេចក្តីសន្និដ្ឋានណាមួយដែលថា បុគ្គលទាំងនោះស្ថិតនៅក្នុងយុត្តាធិការរបស់ អ.វ.ត.ក ទេ។
អាស្រ័យហេតុដូច្នេះ សហព្រះរាជអាជ្ញាបដិសេធមិនប្ដឹងទៅសហចៅក្រមស៊ើបអង្កេត អំពីអង្គហេតុថ្មីដែលបានចោទប្រកាន់ទាំងអស់នោះទេ។ ការសម្រេចនេះគឺសហព្រះរាជអាជ្ញាបានពិចារណាអំពី៖ ទម្ងន់នៃឧក្រិដ្ឋកម្មដែលបានចោទប្រកាន់ទាំងនេះនៅក្នុងដីកាសន្និដ្ឋានបញ្ជូនឲ្យស៊ើបសួរ វិសាលភាពនៃការស៊ើបសួរបច្ចុប្បន្នដែលបានបង្កើតឡើងយ៉ាងច្បាស់លាស់ អំពីសារៈសំខាន់នៃការដាក់អាទិភាពលើការបញ្ចប់ការស៊ើបសួរដែលកំពុងប្រព្រឹត្តទៅដ៏មានប្រសិទ្ធិភាព និងកិច្ចដំណើរការនីតិវិធីសវនាការនៅចំពោះមុខ អ.វ.ត.ក ព្រមទាំងអំពីគោលជំហររបស់សហព្រះរាជអាជ្ញាអន្តរជាតិដែលថា មិនផ្តួចផ្តើមឲ្យមានសំណុំរឿងបន្ថែមទៀតឡើយបន្ទាប់ពីសំណុំរឿងលេខ ០០៣ និង ០០៤៕