អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក.) នៅល្ងាចថ្ងៃទី១៥ ខែឧសភា ឆ្នាំ២០២៤ បានបន្ដរៀបចំកម្មវិធីដាក់តាំងបង្ហាញមជ្ឈមណ្ឌលធនធាន អ.វ.ត.ក. ចល័ត (រថយន្តក្រុងចល័ត) ជូននិស្សិត និងសាធារណៈជន នៅក្នុងបរិវេណសាលមហោស្របចតុមុខ រាជធានីភ្នំពេញ ដើម្បីផ្សព្វផ្សាយអំពីសមិទ្ធផល និងកេរដំណែលរបស់ អ.វ.ត.ក.។
ឯកឧត្តម ក្រាញ់ តូនី រដ្ឋលេខាទីស្ដីការគណៈរដ្ឋមន្ដ្រី និងជាប្រធានរដ្ឋបាលស្តីទីនៃ អ.វ.ត.ក. បានលើកឡើងថា កម្មវិធីផ្សព្វផ្សាយតាមរយៈមជ្ឈមណ្ឌលធនធាន អ.វ.ត.ក. ចល័ត នៅថ្ងៃនេះ នឹងផ្ដល់ឱកាសឱ្យអ្នកសិក្សាស្រាវជ្រាវ និងសាធារណៈជនអាចយល់ដឹងអំពីដំណើរការជំនុំជម្រះក្ដីនាពេលកន្លងមក និងដឹងពីរបៀបចូលទៅពិនិត្យមើល អាន និងស្រាវជ្រាវឯកសារនៃការជំនុំជម្រះក្ដីនោះ។ ឯកឧត្តមបន្ថែមថា នៅក្នុងមជ្ឈមណ្ឌលធនធាន អ.វ.ត.ក. ចល័ត នេះក៏មានក្រុមមន្ដ្រីជំនាញមកពីសាលាក្ដីនៅប្រចាំការដើម្បីធ្វើបទបង្ហាញ ពន្យល់ណែនាំ និងបកស្រាយចម្ងល់របស់មហាជនអំពីការកាត់ក្ដីលើអតីតមេដឹកនាំខ្មែរក្រហមនេះផងដែរ។
ឯកឧត្តម ក្រាញ់ តូនី មានប្រសាសន៍ថា “ខ្ញុំសូមលើកទឹកចិត្តចំពោះនិស្សិត សាស្ដ្រាចារ្យ និងអ្នកសិក្សាទាំងឡាយ ទៅសិក្សាស្វែងយល់អំពីឯកសារជាងពីរលានទំព័ររបស់សាលាក្ដីខ្មែរក្រហម ដើម្បីទាញយកផលប្រយោជន៍ពីឯកសារទាំងនោះទៅប្រើប្រាស់ជាឯកសារយោង ឬចងក្រងសៀវភៅច្បាប់ ឬសៀវភៅប្រវត្តិសាស្ដ្រ ជាដើម។”
ឯកឧត្តម ក្រាញ់ តូនី បន្ដថា “ចំពោះមជ្ឈមណ្ឌលធនធាន អ.វ.ត.ក. ចល័ត នេះ ត្រូវបានបំពាក់ដោយបច្ចេកវិទ្យាចុងក្រោយដ៏ទំនើប ដើម្បីបង្កភាពងាយស្រួលសម្រាប់អ្នកសិក្សាទាំងអស់ចូលកាន់បណ្ដុំឯកសាររបស់ អ.វ.ត.ក.។” ឯកឧត្តមបន្ថែមទៀតថា៖ “មជ្ឈមណ្ឌលធនធាន អ.វ.ត.ក. ចល័តនេះ នឹងធ្វើដំណើរទូទាំងប្រទេសកម្ពុជា ក្នុង ២៥ ខេត្ត រាជធានី ហើយនឹងឈប់នៅគ្រប់ទីតាំង ដូចជាសាលារៀន សាកលវិទ្យាល័យ ទីតាំងឧក្រិដ្ឋកម្ម និងទីប្រជំុជនជាដើម។”
សូមបញ្ជាក់ថា ក្នុងកម្មវិធីផ្សព្វផ្សាយតាមរយៈមជ្ឈមណ្ឌលធនធាន អ.វ.ត.ក. ចល័ត នៅថ្ងៃនេះ មាននិស្សិតប្រមាណជាង៥០រូប និងសាធារណៈជន បានអញ្ជើញទស្សនាមជ្ឈមណ្ឌលធនធាន អ.វ.ត.ក. ចល័ត តាមរយៈស្ដាប់ការធ្វើបទបង្ហាញពីមន្ត្រី អ.វ.ត.ក. ទាក់ទងនឹងដំណើរការជំនុំជម្រះក្ដី កិច្ចពិភាក្សាអន្ដរជំនាន់ទាក់ទងនឹងអំពើប្រល័យពូជសាសន៍ជនជាតិវៀតណាម ទស្សនាការតាំងពិពណ៌រូបថត ស្វែងយល់អំពីបណ្ដុំឯកសារជំនុំជម្រះក្ដី និងទស្សនាការបញ្ចាំងភាពយន្តអប់រំស្ដីអំពីការសិក្សាអំពីរបបឃោរឃៅខ្មែរក្រហម។
សូមរំឭកថា នេះជាលើកទី២ហើយ ដែល អ.វ.ត.ក. បានរៀបចំកម្មវិធីផ្សព្វផ្សាយតាមរយៈមជ្ឈមណ្ឌលធនធាន អ.វ.ត.ក. ចល័ត ដែល ដែលលើកដំបូងបង្អស់ កម្មវិធីត្រូវបានរៀបចំនៅក្នុងសួនច្បារខាងមុខវត្តបុទុមវតី រាជធានីភ្នំពេញ។ ហើយតាមការគ្រោងទុក សាលាក្ដីខ្មែរក្រហម នឹងបន្ដរៀបចំកម្មវិធីផ្សព្វផ្សាយជាលើកទី៣ នៅល្ងាចថ្ងៃសុក្រ ទី១៧ ខែឧសភា នៅក្នុងសួនច្បារខាងមុខផ្សាររាត្រី រាជធានីភ្នំពេញ ដែលសិស្ស និស្សិត និងសាធារណៈជនទូទៅអាចចូលរួមស្វែងយល់បានដោយសេរី៕
