តើមានមេដឹកនាំជាន់ខ្ពស់ខ្មែរក្រហមណាម្នាក់ធ្លាប់ត្រូវបាន ជំនុំជម្រះពីមុនមកដែរឬទេ?
នៅឆ្នាំ១៩៧៩ មានការជំនុំជម្រះក្តីទៅលើអំពើប្រល័យពូជសាសន៍នៅទីក្រុងភ្នំពេញដែលគេស្គាល់ថាជា តុលាការប្រជាជនបដិវត្ដន៍។ តុលាការនេះបានកាត់ទោស ប៉ុល ពត និង អៀង សារី ហើយបានរកឃើញថា អ្នកទាំងពីរមានពិរុទ្ធពីបទឧក្រិដ្ឋកម្មប្រល័យពូជសាសន៍។ ក៏ប៉ុន្តែ ជនជាប់ចោទមិនមានវត្តមាននៅចំពោះមុខតុលាការទេ ហើយក៏មិនបានទទួលទោសដែលតុលាការប្រជាជនបដិវត្តន៍បានសម្រេចនោះដែរ។
ក្រោយមក នៅឆ្នាំ១៩៩៦ ព្រះមហាក្សត្របានប្រទានការលើកលែង ទោសដល់ អៀង សារី ឲ្យរួចផុតពីសាលក្រមផ្តន្ទាទោសរបស់តុលាការប្រជាជនបដិវត្តន៍ពីបទឧក្រិដកម្មប្រល័យពូជសាសន៍។ ចៅក្រមនៃអង្គជំនុំជម្រះវិសាមញ្ញក្នុងតុលាការកម្ពុជា ជាអ្នកសម្រេចទៅលើវិសាលភាពនៃការលើកលែងទោសនេះ។ បន្ថែមលើនេះទៀត ក៏អាចមានបទចោទប្រកាន់ផ្សេងៗទៀតដែលតុលាការអាចលើកឡើងប្រឆាំងនឹងគាត់។ វាអាស្រ័យទៅលើភ័ស្តុតាងដែលតុលាការអាចរកបាន។
នៅឆ្នាំ១៩៩៧ ក្រុមខ្មែរក្រហមខ្លួនឯងផ្ទាល់បានជំនុំជម្រះ ប៉ុល ពតពីបទឧក្រិដ្ឋ ដែលគាត់បានប្រព្រឹត្ដនៅក្នុងរង្វង់អង្គការរបស់គាត់ ក្រោយឆ្នាំ១៩៧៩។ ប៉ុល ពត ស្លាប់នៅឆ្នាំ១៩៩៨។ ដូច្នោះអង្គជំនុំជម្រះវិសាមញ្ញមិនអាចជំនុំជម្រះទោស ប៉ុល ពត បានទេ។