អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក.) នៅថ្ងៃទី៩ ខែមេសា ឆ្នាំ២០២៤ បានទទួលស្វាគមន៍ចំពោះដំណើរទស្សនកិច្ចរបស់ មន្ត្រីក្រុមប្រឹក្សាអ្នកច្បាប់ចំនួន១២រូប នៃទីស្តីការគណៈរដ្ឋមន្ត្រី មកកាន់ទីតាំងបវិវេណ អ.វ.ត.ក. ដើម្បីសិក្សាស្វែងយល់ពីដំណើរការជំនុំជម្រះក្ដី សមិទ្ធផល និងកេរដំណែលរបស់ អ.វ.ត.ក. ក៏ដូចជាសិក្សាស្វែងយល់ពីការងាររបស់ អ.វ.ត.ក. នៅក្នុងដំណាក់កាលមុខងារសេសសល់។
នៅក្នុងអំឡុងកិច្ចប្រជុំនៃដំណើរទស្សកិច្ចនេះ ឯកឧត្តម ក្រាញ់ តូនី ប្រធានរដ្ឋបាលស្តីទីនៃ អ.វ.ត.ក. បានស្វាគមន៍ និង បានអរគុណដល់គណៈប្រតិភូ ចំពោះវត្តមានមកកាន់មជ្ឈមណ្ឌលធន អ.វ.ត.ក.។ ឯកឧត្តមបានលើកឡើងថា អាណត្តិមុខងារសេសសល់ អ.វ.ត.ក. មានបេសកម្មជាចម្បង គឺការផ្សព្វផ្សាយឱ្យបានទូលំទូលាយដល់សាធារណៈជន ជាពិសេសសិស្ស និស្សិត និងយុវជនជំនាន់ក្រោយ អំពីការងារ សមិទ្ធផល និងកេរដំណែល ដែលទទួលបានពីដំណើរការកាត់សេចក្តីរបស់ អ.វ.ត.ក. ដែលបានចំណាយពេលអស់រយៈពេលជាង១៦ឆ្នាំ ចាប់ពីឆ្នាំ២០០៦ ដល់២០២២។ ឯកឧត្តម បានបន្ថែមទៀតថា៖ «ខ្ញុំសង្ឈឹមថា ដំណើទស្សកិច្ចនេះ នឹងបានជាប្រយោជន៍ដល់ឯកឧត្តម លោកជំទាវ លោក លោកស្រី ជាពិសេស ចំណោះដឹងជាច្រើនពីផ្នែកផ្សេងៗ នៃមជ្ឈមណ្ឌលធនធាន អ.វ.ត.ក. ទាំងចំណោះដឹង ចំណោះធ្វើ ទីកន្លែងស្រាវជ្រាវ និងឱកាសសហការ នាពេលខាងមុខ ដើម្បីរួមចំណែកស្វែងយល់អំពីឧក្រិដ្ឋកម្មធ្ងន់ធ្ងរ ផលវិបាកមកលើជនរងគ្រោះ និងសង្គម រួមទាំងរួមចំណែកក្នុងការកសាងនិងអភិវឌ្ឈន៍ព្រះរាជាណាចក្រកម្ពុជា ឱ្យកាន់តែបានឆាប់រហ័ស»។
កិច្ចប្រជុំនៃដំណើរទស្សនកិច្ចនេះ ត្រូវបានបន្តដោយមានការធ្វើបទបង្ហាញរបស់ ឯកឧត្តម ថោង សុជាតិ មន្ត្រីគ្រប់គ្រងជាន់ខ្ពស់នៃ អ.វ.ត.ក. អំពី «សមិទ្ធផល កេរដំណែល និងការងាររបស់ អ.វ.ត.ក. នៅក្នុងដំណាក់កាលមុខងារសេសសល់»។ បន្ទាប់មកទៀត ឯកឧត្តម ពេជ អង្គ មេធាវីនាំមុខជាតិតំណាងដើមបណ្តឹងរដ្ឋប្បវេណី នៃសំណុំរឿង០០២ បានធ្វើបទបង្ហាញអំពីទិដ្ឋភាពទូទៅនៃការចូលរួមរបស់ដើមបណ្តឹងរដ្ឋប្បវេណីក្នុងអំឡុងពេលសវនាការក្តី។ បន្ទាប់ពីការធ្វើបទបង្ហាញ មានការលើកសំណួរជាច្រើនពីសំណាក់ លោកជំទាវ និងឯកឧត្តមសមាជិកក្រុមប្រឹក្សាអ្នកច្បាប់ ដើម្បីបំភ្លឺបន្ថែមផងដែរ។
ឯកឧត្តម លី ច័ន្ទតុលា អនុប្រធានក្រុមប្រឹក្សាអ្នកច្បាប់ បានថ្លែងអំណរគុណ និងបានកោតសរសើរដល់ អ.វ.ត.ក. ចំពោះការរៀបចំឱ្យមានដំណើរទស្សនកិច្ចដ៏មានសារៈសំខាន់បែបនេះដល់ក្រុមប្រឹក្សាអ្នកច្បាប់ និងអង្គភាពផ្សេងៗទៀតចំណុះទីស្តីការគណៈរដ្ឋមន្រ្តី ដែលមានឱកាសមកសិក្សាស្វែងយល់ពីបេសកកម្ម អាណត្តិ និងសមិទ្ធផលការងាររបស់អ.វ.ត.ក. ជាពិសេសនៅក្នុងអាណត្តិអនុវត្តមុខងារសេសសល់ក្នុងរយៈពេលបីឆ្នាំដំបូងនេះ។ ទន្ទឹមនឹងនេះ ឯកឧត្តម លើកឡើងថាខ្លឹមសារនៃបទបង្ហាញដែលបានរៀបចំឡើងដោយអ.វ.ត.ក. គឺមានលក្ខណៈគ្រប់ជ្រុងជ្រោយនិងស៊ីជម្រៅ ហើយក៏បានសំណូមពរឱ្យមានការធ្វើបទបង្ហាញទៅលើនីតិវិធីនិងការងារការពារក្តីរបស់មេធាវីជនជាប់ចោទ និងតួនាទីបំពេញការងាររបស់អង្គជំនុំជម្រះទាំងបីថ្នាក់ រួមមានអង្គបុរេជំនុំជម្រះ អង្គជំនុំជម្រះសាលាដំបូង និងអង្គជំនុំជម្រះតុលាការកំពូលរបស់អ.វ.ត.ក.។ ឯកឧត្តម បានបន្ថែមទៀតថា៖ «ក្នុងនាមក្រុមប្រឹក្សាអ្នកច្បាប់នៃទីស្តីការគណរដ្ឋមន្ត្រីនិងរូបខ្ញុំផ្ទាល់ ខ្ញុំសូមសម្តែងការគាំទ្រចំពោះការបង្កើតមជ្ឈមណ្ឌលធនធាននេះ។ ជាចុងក្រោយ ឯកឧត្តម ក៏បានថ្លែងអំណរគុណដល់ឯកឧត្តម វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី និងជាប្រធានក្រុមប្រឹក្សាអ្នកច្បាប់ ដែលបានអនុញ្ញាតឯកឧត្តមនិងលោកជំទាវជាសមាជិក សមាជិកា និងជាមន្រ្តីរបស់ក្រុមប្រឹក្សាអ្នកច្បាប់ មកធ្វើទស្សនកិច្ចសិក្សានៅមជ្ឈមណ្ឌលធនធានរបស់អ.វ.ត.ក.។ [...] ដំណើរទស្សកិច្ចនេះ នឹងជួយសមាជិកនិងមន្ត្រីក្រុមប្រឹក្សាអ្នកច្បាប់ ឱ្យទទួលបានចំណេះដឹងកាន់តែស៊ីជម្រៅ និងទទួលបានព័ត៌មានគ្រប់ជ្រុងជ្រោយអំពី អ.វ.ត.ក. ជាពិសេសពាក់ព័ន្ធនឹងការគ្រប់គ្រងផ្នែករដ្ឋបាល ដំណើរការនិងនីតិវិធីជំនុំជម្រះក្តី និងតួនាទីចូលរួមរបស់ដើមបណ្តឹងរដ្ឋប្បវេណីក្នុងអំឡុងពេលសវនាការក្តី»។
នៅចុងបញ្ចប់នៃកម្មវិធីដំណើរទស្សនកិច្ចនេះ គណៈគ្រប់គ្រងនៃអ.វ.ត.ក. បានអញ្ជើញគណៈប្រតិភូក្រុមប្រឹក្សាអ្នកច្បាប់ ទៅទស្សនានិងពិនិត្យមើល បណ្ណាល័យ និហិតដ្ឋានបណ្ណសារ មជ្ឈមណ្ឌលធនធានចល័ត (រថយន្តក្រុង) និងបន្ទប់ពហុបំណងដែលអាចប្រើប្រាស់សាលសវនាការតុលាការតា្រប់។
គួរបញ្ជាក់ថា បន្ទាប់ពីបញ្ចប់ដំណើរការកាត់ក្តីរបស់ខ្លួន អ.វ.ត.ក. បានចាប់ផ្តើមនៅខែមករា ឆ្នាំ២០២៣ ដើម្បីអនុវត្តមុខងារសេសសល់សម្រាប់រយៈពេលបីឆ្នាំដំបូង ស្របតាមកិច្ចព្រមព្រៀងបន្ថែមរវាងរាជរដ្ឋាភិបាលកម្ពុជានិងអង្គការសហប្រជាជាតិ។ នៅក្នុងអាណត្តិមុខងារសេសសល់ អ.វ.ត.ក. បានបង្កើតមជ្ឈមណ្ឌលធនធាន ហើយបានដាក់សម្ពោធឱ្យប្រើប្រាស់ជាផ្លូវការកាលពីថ្ងៃទី២៧ ខែកញ្ញា ឆ្នាំ២០២៣ ក្រោមអធិបតីភាពឯកឧត្តម វង្សី វិស្សុត ឧបនាយករដ្ឋមន្ត្រីប្រចាំការរដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងជាប្រធានក្រុមការងារទទួលបន្ទុកការអនុវត្តមុខងារសេសសល់របស់ អ.វ.ត.ក.។
មជ្ឈមណ្ឌលធនធាន អ.វ.ត.ក. មានសមាសភាគសំខាន់ៗ ចំនួន៦ ដែលរួមមាន៖ (ទី១) បណ្ណាល័យនិងកន្លែងស្រាវជ្រាវ (ទី២) បន្ទប់ប្រើប្រាស់ពហុបំណងសម្រាប់រៀបចំសិក្ខាសាលា និងសម្រាប់ប្រកួតតុលាការប្រឌិត (ទី៣) និហិតដ្ឋានបណ្ណសារ ដែលបានសាងសង់រួច និងកំពុងដាក់ឱ្យដំណើរការ (ទី៤) គេហទំព័រថ្មីដែលកំពុងកែលម្អនិងធ្វើបច្ចុប្បន្នភាព ដែលគ្រោងនឹងដាក់ឱ្យដំណើរពាក់កណ្តាលឆ្នាំ២០២៤ រីឯ គម្រោង (ទី៥) បន្ទប់ពិគ្រោះយោបល់របស់ដើមបណ្តឹងរដ្ឋប្បវេណីនិងតាំងពិព័រណ៍ស្តីពីដំណើរការជនុំជម្រះក្តី និង(ទី៦) ឧទ្យានសម្រាប់ការចងចាំ បាននិងកំពុងរៀបចំអនុវត្តនៅឆ្នាំ២០២៤និងឆ្នាំ២០២៥ខាងមុខ។ បន្ថែមពីនេះ កាលពីថ្ងៃទី៣១ ខែមករា ឆ្នាំ២០២៣ អ.វ.ត.ក. បានប្រកាសដាក់ឱ្យដំណើរការមជ្ឈមណ្ឌលធនធានចល័ត ដែលគ្រោងនឹងចាប់ផ្តើមការងារផ្សព្វផ្សាយនៅសាកលវិទ្យាល សាលារៀន ទីតាំងឧក្រិដ្ឋកម្ម និងទីតាំងសាធារណៈផ្សេងទៀតនៅតាម បណ្តារាជធានី ខេត្តទាំងអស់៕
