សំណុំរឿង ០០៤/២
កាលពីថ្ងៃទី០៧ ខែកញ្ញា ឆ្នាំ២០០៩ សហព្រះរាជអាជ្ញាអន្តរជាតិបានដាក់ដីកាសន្និដ្ឋានបញ្ជូនរឿងឲ្យស៊ើបសួរចំនួនពីរ ដោយស្នើឲ្យសហចៅក្រមស៊ើបអង្កេតផ្តួចផ្តើមបើកកិច្ចស៊ើបសួរ ពាក់ព័ន្ធនឹងជនសង្ស័យប្រាំនាក់។ ដីកាសន្និដ្ឋានបញ្ជូនរឿងឲ្យស៊ើបសួរទាំងពីរនេះ ត្រូវបានបំបែកទៅជាសំណុំរឿង ០០៣ និង ០០៤។
សហចៅក្រមស៊ើបអង្កេតអន្តរជាតិចោទប្រកាន់ អោ អាន នៅក្នុងសំណុំរឿង ០០៤ កាលពីថ្ងៃទី២៧ ខែមីនា ឆ្នាំ២០១៥ និងបានពង្រីកបទចោទប្រកាន់ នៅថ្ងៃទី១៤ ខែមីនា ឆ្នាំ២០១៦។ នៅថ្ងៃទី១៦ ខែធ្នូ ឆ្នាំ២០១៦ សហចៅក្រមស៊ើបអង្កេតទាំងពីរបានបញ្ចប់កិច្ចស៊ើបសួរប្រឆាំង អោ អាន ហើយសំណុំរឿងនេះត្រូវបានបំបែកចេញពីគ្នា ដោយបង្កើតបានជាសំណុំរឿង ០០៤/០២។ ការបំបែកសំណុំរឿងនេះត្រូវបានសម្រេចឡើង ដោយសារតែជនជាប់ចោទមានសិទ្ធិទទួលបានការជូនដំណឹងអំពីសេចក្តីសម្រេចលើបទចោទប្រឆាំងនឹងរូបគាត់ ដោយមិនត្រូវឲ្យមានការពន្យារពេលហួសហេតុនោះឡើយ និងដើម្បីចេញដីកាដំណោះស្រាយ នៅក្នុងពេលវេលាមួយសមស្រប ដោយអនុលោមតាមវិធាន ៦៧ និងវិធាន ២១(៤) នៃវិធានផ្ទៃក្នុង ថាតើ វាជាដីកាលើកលែងការចោទប្រកាន់ ឬជាដីកាបញ្ជូនរឿងទៅជំនុំជម្រះ។
នៅថ្ងៃទី១៦ ខែសីហា ឆ្នាំ២០១៨ សហចៅក្រមស៊ើបអង្កេតទាំងពីរបានចេញដីកាដំណោះស្រាយពីរដាច់ដោយឡែកពីគ្នា នៅក្នុងសំណុំរឿងប្រឆាំងនឹង អោ អាន ដោយសារតែការមិនចុះសម្រុងគ្នាថាតើ អោ អាន ស្ថិតនៅក្រោមយុត្តាធិការបុគ្គលរបស់ អ.វ.ត.ក ក្នុងឋានៈជាមេដឹកនាំជាន់ខ្ពស់ ឬជាបុគ្គលម្នាក់ក្នុងចំណោមអ្នកទទួលខុសត្រូវខ្ពស់បំផុត ចំពោះឧក្រិដ្ឋកម្មដែលបានប្រព្រឹត្តឡើងនៅក្នុងរយៈកាលនៃកម្ពុជាប្រជាធិបតេយ្យដែរឬអត់នោះ។
សហចៅក្រមស៊ើបអង្កេតជាតិយល់ឃើញថា អោ អាន មិនស្ថិតក្រោមយុត្តាធិការបុគ្គលរបស់ អ.វ.ត.ក នោះទេ ទោះជាក្នុងប្រភេទបុគ្គលមួយណាក៏ដោយ និងបានច្រានចោលសំណុំរឿងប្រឆាំងនឹង អោ អាន ដោយសារតែ
ហេតុផលនេះឯង។ សហចៅក្រមស៊ើបអង្កេតអន្តរជាតិយល់ឃើញថា អោ អាន ស្ថិតនៅក្រោមយុត្តាធិការបុគ្គលរបស់ អ.វ.ត.ក ក្នុងឋានៈជាអ្នកទទួលខុសត្រូវជាន់ខ្ពស់ម្នាក់ និងថា មានភ័ស្តុតាងគ្រប់គ្រាន់ដើម្បីចោទប្រកាន់គាត់ពីបទប្រល័យពូជសាសន៍ជនជាតិចាម និងឧក្រិដ្ឋកម្មប្រឆាំងមនុស្សជាតិ ក៏ដូចជាបទល្មើសជាតិដែលស្ថិតនៅក្រោមច្បាប់កម្ពុជាផងដែរ។
សហមេធាវីរបស់ អោ អាន និងសហព្រះរាជអាជ្ញាជាតិ បានដាក់បណ្តឹងឧទ្ធរណ៍ប្រឆាំងនឹងដីកាដំណោះស្រាយ (ដីកាបញ្ជូនរឿងទៅជំនុំជម្រះ) របស់សហចៅក្រមស៊ើបអង្កេតអន្តរជាតិ ចំណែកសហព្រះរាជអាជ្ញាអន្តរជាតិបានដាក់បណ្តឹងឧទ្ធរណ៍ប្រឆាំងនឹងដីកាដំណោះស្រាយ (ដីកាសម្រេចលើកលែងការចោទប្រកាន់) របស់សហចៅក្រមស៊ើបអង្កេតជាតិ។ អង្គបុរេជំនុំជម្រះបានបើកសវនាការអសាធារណៈចំនួនបីថ្ងៃ ដើម្បីសម្រេចលើបណ្តឹងឧទ្ធរណ៍នានាប្រឆាំងនឹងដីកាដំណោះស្រាយទាំងពីរ កាលពីថ្ងៃទី១៩, ២០ និង ២១ ខែមិថុនា ឆ្នាំ២០១៩។
នៅថ្ងៃទី១៦ ខែធ្នូ ឆ្នាំ២០១៩ អង្គបុរេជំនុំជម្រះបានដាក់សេចក្តីពិចារណារបស់ខ្លួន លើបណ្តឹងឧទ្ធរណ៍ប្រឆាំងនឹងដីកាដំណោះស្រាយទាំងនេះ។ អង្គបុរេជំនុំជម្រះបានប្រកាសជាឯកច្ឆន្ទថា “ការចេញដីកាដំណោះស្រាយពីរផ្ទុយគ្នារបស់សហចៅក្រមស៊ើបអង្កេតទាំពីរ គឺខុសច្បាប់” ដោយសារតែអង្គបុរេជំនុំជម្រះ “មិនអាចរកសំឡេងគាំទ្រភាគច្រើនលើសលប់ ដែលតម្រូវឲ្យបួនសំឡេង ដើម្បីឈានដល់ការចេញសេចក្តីសម្រេច ផ្អែកលើសំអាងហេតុរួមគ្នាលើអង្គសេចក្តីបាននោះ” ចៅក្រមទាំងទាំងអស់បានភ្ជាប់នូវមតិយោបល់របស់ពួកគាត់រៀងៗខ្លួនជាមួយនឹងសេចក្តីពិចារណាជាឯកច្ឆន្ទនេះ។
