សំណុំរឿង ០០៤
កាលពីថ្ងៃទី០៧ ខែកញ្ញា ឆ្នាំ២០០៩ សហព្រះរាជអាជ្ញាអន្តរជាតិបានដាក់ដីកាសន្និដ្ឋានបញ្ជូនរឿងឲ្យស៊ើបសួរចំនួនពីរ ដោយស្នើឲ្យសហចៅក្រមស៊ើបអង្កេតផ្តួចផ្តើមបើកកិច្ចស៊ើបសួរ ពាក់ព័ន្ធនឹងជនសង្ស័យប្រាំនាក់។ ដីកាសន្និដ្ឋានបញ្ជូនរឿងឲ្យស៊ើបសួរទាំងពីរនេះ ត្រូវបានបំបែកទៅជាសំណុំរឿង ០០៣ និង ០០៤។
សំណុំរឿង ០០៤ នៅតែជាសំណុំរឿងប្រឆាំងនឹង យឹម ទិត្យ ក្រោយពីការបំបែកសំណុំរឿងនេះរួចមក និងការបង្កើតបានជាសំណុំរឿង ០០៤/០១ (អ៊ឹម ចែម) និងសំណុំរឿង ០០៤/០២ (អោ អាន)។ នៅថ្ងៃទី០៩ ខែធ្នូ ឆ្នាំ២០១៥ សហចៅក្រមស៊ើបអង្កេតអន្តរជាតិបានចោទប្រកាន់ យឹម ទិត្យ នៅក្នុងសំណុំរឿង ០០៤។ នៅថ្ងៃទី០៥ ខែកញ្ញា ឆ្នាំ២០១៧ កិច្ចស៊ើបសួរតាមផ្លូវតុលាការទៅលើសំណុំរឿង ០០៤ ត្រូវបានបិទជាលើកទីពីរ ក្រោយពីការដោះស្រាយលើសំណើសុំបន្ថែមមួយចំនួនពីសំណាក់ភាគីនានារួចមក។
នៅថ្ងៃទី២៨ ខែមិថុនា ឆ្នាំ២០១៩ សហចៅក្រមស៊ើបអង្កេតទាំងពីរ បានចេញដីកាដំណោះស្រាយពីរដាច់ដោយឡែកពីគ្នា នៅក្នុងសំណុំរឿងប្រឆាំងនឹង យឹម ទិត្យ ដោយសារតែការមិនចុះសម្រុងគ្នាថាតើ យឹម ទិត្យ ស្ថិតនៅក្រោម
យុត្តាធិការបុគ្គលរបស់ អ.វ.ត.ក ក្នុងឋានៈជាមេដឹកនាំជាន់ខ្ពស់ ឬជាបុគ្គលម្នាក់ក្នុងចំណោមអ្នកទទួលខុសត្រូវខ្ពស់បំផុតចំពោះឧក្រិដ្ឋកម្មដែលបានប្រព្រឹត្តឡើង នៅក្នុងរយៈកាលនៃកម្ពុជាប្រជាធិបតេយ្យដែរឬយ៉ាងណានោះ។
សហចៅក្រមស៊ើបអង្កេតជាតិយល់ឃើញថា យឹម ទិត្យ មិនស្ថិតក្រោមយុត្តាធិការបុគ្គលរបស់ អ.វ.ត.ក ទេ ទោះបីជាក្នុងប្រភេទបុគ្គលមួយណាក៏ដោយ និងបានច្រានចោលសំណុំរឿងប្រឆាំងនឹង យឹម ទិត្យ ដោយសារតែមូលហេតុនេះឯង។ សហចៅក្រមស៊ើបអង្កេតអន្តរជាតិយល់ឃើញថា យឹម ទិត្យ ស្ថិតនៅក្រោមយុត្តាធិការបុគ្គលរបស់ អ.វ.ត.ក ក្នុងឋានៈជាអ្នកទទួលខុសត្រូវជាន់ខ្ពស់ម្នាក់ និងថា មានភ័ស្តុតាងគ្រប់គ្រាន់ដើម្បីចោទប្រកាន់គាត់ពីបទប្រល័យពូជសាសន៍ ឧក្រិដ្ឋកម្មប្រឆាំងមនុស្សជាតិ ឧក្រិដ្ឋកម្មសង្រ្គាម និងបទល្មើសជាតិដែលស្ថិតនៅក្រោមច្បាប់កម្ពុជា។
សហមេធាវីរបស់ យឹម ទិត្យ និងសហព្រះរាជអាជ្ញាជាតិ បានដាក់បណ្តឹងឧទ្ធរណ៍ប្រឆាំងនឹងដីកាដំណោះស្រាយ (ដីកាបញ្ជូនរឿងទៅជំនុំជម្រះ) របស់សហចៅក្រមស៊ើបអង្កេតអន្តរជាតិ ចំណែកឯសហព្រះរាជអាជ្ញាអន្តរជាតិបានដាក់បណ្តឹងឧទ្ធរណ៍ប្រឆាំងនឹងដីកាដំណោះស្រាយ (ដីកាសម្រេចលើកលែងការចោទប្រកាន់) របស់សហចៅក្រមស៊ើបអង្កេតជាតិ។ សហមេធាវីបានប្តឹងឧទ្ធរណ៍បន្ថែមទៀតប្រឆាំងនឹងការចេញដីកាដំណោះស្រាយពីរដាច់ដោយឡែកពីគ្នានេះ។
