ចាប់តាំងពីពេលចូលបំពេញមុខងារនៅ អ.វ.ត.ក មក សហចៅក្រមស៊ើបអង្កេតអន្តរជាតិបម្រុងបានខិតខំប្រឹងប្រែងអស់កម្លាំងកាយចិត្ត រហូតដល់ដំណាក់កាលចុងក្រោយ ដើម្បីបន្តការស៊ើបអង្កេតលើសំណុំរឿង ០០៣ និង០០៤ ដ៏ចម្រូងចម្រាស ដោយគោរពច្បាប់ និងគោរពដល់ជនរងគ្រោះ។ ក្រៅពីការចុះស៊ើបអង្កេតដល់កន្លែង ជនសង្ស័យត្រូវបានជូនដំណឹងអំពីសិទ្ធិរបស់ខ្លួន និងទទួលបានការអនុញ្ញាតឲ្យចូលមើលសំណុំរឿង។ តាមរយៈសេចក្តីសម្រេចស្តីពីសមត្ថកិច្ចរបស់ អ.វ.ត.ក ក្នុងការជំនុំជម្រះសំណុំរឿង ០០៣ អង្គហេតុកំពុងស៊ើបសួរត្រូវបានជូនដំណឹងជាសាធារណៈ ដើម្បីអនុញ្ញាតឲ្យជនរងគ្រោះដឹង និងប្រើប្រាស់សិទ្ធិរបស់ខ្លួន។
ច្បាស់ណាស់ ដោយសារតែហេតុផលនយោបាយនិងហិរញ្ញវត្ថុជាជាងហេតុផលគតិយុត្តិ សហចៅក្រមស៊ើបអង្កេតអន្តរជាតិបម្រុង ដែលបុព្វសិទ្ធិត្រូវបានសហចៅក្រមស៊ើបអង្កេតជាតិជំទាស់ជាប្រចាំដោយគ្មានសំអាងហេតុសមស្របតាមផ្លូវច្បាប់ ត្រូវបានរារាំងយ៉ាងធ្ងន់ធ្ងរក្នុងការបំពេញមុខងាររបស់ខ្លួនដោយស្របច្បាប់ ក្នុងបរិយាកាសពោរពេញដោយអរិភាព ជាហេតុធ្វើឲ្យសហចៅក្រមស៊ើបអង្កេតអន្តរជាតិបម្រុងបានសម្រេចចិត្តដាក់ពាក្យលាឈប់ជូនអគ្គលេខាធិការអង្គការសហប្រជាជាតិ។
ក្រោយពេលបញ្ចប់ការស៊ើបអង្កេតផ្ទៃក្នុងពីបទរំលោភវិធាន ៣៥ នៃវិធានផ្ទៃក្នុង អ.វ.ត.ក សហចៅក្រមស៊ើបអង្កេតអន្តរជាតិបម្រុងមានហេតុផលក្នុងការជឿជាក់ថា បុគ្គលជាច្រើនរូបដែលកំពុងឬបានបំពេញការងារនៅ អ.វ.ត.ក បានជ្រៀតជ្រែកក្នុងការស៊ើបអង្កេតលើសំណុំរឿង ០០៤។ ដូច្នេះ នៅថ្ងៃនោះ សហចៅក្រមស៊ើបអង្កេតអន្តរជាតិបម្រុងបានប្តឹងបរិហាររឿងហេតុទាំងនេះ ទៅអាជ្ញាធរព្រហ្មទណ្ឌនៃព្រះរាជាណាចក្រកម្ពុជា។ ម្យ៉ាងវិញទៀត សហចៅក្រមស៊ើបអង្កេតអន្តរជាតិបម្រុងយល់ឃើញថា តួនាទីរបស់សហចៅក្រមស៊ើបអង្កេតជាតិ ដូចបានលើកឡើងនៅក្នុងកំណត់សម្គាល់ចុះថ្ងៃទី ២១ ខែ មីនា ឆ្នាំ ២០១២ គឺជាការរារាំងយ៉ាងធ្ងន់ធ្ងរដល់ការដឹកនាំកិច្ចស៊ើបសួរលើសំណុំរឿង ០០៣ និង ០០៤ ហើយសហចៅក្រមស៊ើបអង្កេតអន្តរជាតិបម្រុងបានប្តឹងទៅឧត្តមក្រុមប្រឹក្សានៃអង្គចៅក្រមនៃព្រះរាជាណាចក្រកម្ពុជា។
ជាចុងក្រោយ សហចៅក្រមស៊ើបអង្កេតអន្តរជាតិបម្រុងសូមធ្វើការអំពាវនាវដល់អាជ្ញាធរមានសមត្ថកិច្ចនៃព្រះរាជាណាចក្រកម្ពុជា និងអង្គការសហប្រជាជាតិ ឲ្យប្រកាន់ជំហរច្បាស់លាស់ដូចគ្នាចំពោះជោគវាសនានៃសំណុំរឿង ០០៣ និង ០០៤ ដើម្បីផ្តល់ភាពរុងរឿងនិងសេចក្តីថ្លៃថ្នូរដែល អ.វ.ត.ក និងតុលាការអន្តរជាតិស័ក្តិសមនឹងទទួលបាន។