ប្រទេសនូវែលហ្សេឡង់បានប្រកាសសន្យាផ្តល់ជំនួយថវិកាបន្ថែមចំនួន ១ សែនដុល្លារនូវែលហ្សេឡង់ ដល់ភាគីអន្តរជាតិនៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) ។
ការប្រកាសសន្យានេះធ្វើឡើងនៅរាជធានីភ្នំពេញ នៅថ្ងៃទី១២ ខែកក្កដា ឆ្នាំ២០១២ ខណៈដែលលោករដ្ឋមន្ត្រីក្រសួងការបរទេសនូវែលហ្សេឡង់ មូរេ ម៉ាក្ស ឃុលលី ជួបប្រជុំជាមួយរដ្ឋមន្ត្រីការបរទេសកម្ពុជា ឯកឧត្តម ហោ ណាំហុង។
ឯកឧត្តម ក្រាញ់ តូនី ប្រធានការិយាល័យរដ្ឋបាលស្តីទី និងលោក ឃ្នុត រ៉ូសិនហក អនុប្រធានការិយាល័យរដ្ឋបាលនៃ អ.វ.ត.ក បានថ្លែងថា៖ “យើងសូមថ្លែងអំណរគុណចំពោះរដ្ឋាភិបាលនូវែលហ្សេឡង់ ដែលបន្តផ្តល់ការគាំទ្រដល់ អ.វ.ត.ក”។