អង្គជំនុំជម្រះតុលាការកំពូលនឹងបើកសវនាការនៅថ្ងៃអង្គារ៍ ទី១៣ ខែវិច្ឆិកា ឆ្នាំ២០១២ វេលាម៉ោង ៩:៣០ នាទីព្រឹក ដើម្បីស្តាប់ការវែកញែកដោយផ្ទាល់មាត់ ទាក់ទិននឹងបណ្តឹងសាទុក្ខរបស់សហព្រះរាជអាជ្ញា ពាក់ព័ន្ធនឹងលក្ខខណ្ឌនៃការដោះលែង អៀង ធីរិទ្ធ។
សវនាការនេះបើកជាសាធារណៈ ហើយសាធារណជនដែលមានបំណងចូលមើលសវនាការ គួរតែមកដល់ អ.វ.ត.ក ឲ្យបានមុនម៉ោង ៨:៣០ព្រឹក ដើម្បីទុកពេលវេលាគ្រប់គ្រាន់សម្រាប់ការចុះឈ្មោះនិងការត្រួតពិនិត្យសន្តិសុខ។ ព័ត៌មានបន្ថែមសម្រាប់ការចូលរួមរបស់សាធារណជន សូមអាននៅៈhttp://www.eccc.gov.kh/about-eccc/Visitor_Info_Khmer
នៅថ្ងៃទី១៣ ខែកញ្ញា ឆ្នាំ២០១២ អង្គជំនុំជម្រះសាលាដំបូងបានសម្រេចជាថ្មីម្តងទៀតថា អៀង ធីរិទ្ធ ពុំមានកាយសម្បទានិងបញ្ញាស្មារតីគ្រប់គ្រាន់ដើម្បីចូលរួមការជំនុំជម្រះក្តី ដោយសារគាត់មានជំងឺវង្វេងវង្វាន់ដែលទំនងជាជំងឺបាត់ការចងចាំ។ ដោយពុំអាចប្រមើលមើលឃើញលទ្ធភាពណាមួយនាពេលអនាគត ដែលអាចឲ្យ អៀងធីរិទ្ធ ចូលរួមក្នុងការជំនុំជម្រះក្តីបាន និងដោយពុំមានមូលដ្ឋានច្បាប់ណាមួយដើម្បីបន្តឃុំខ្លួនគាត់ អង្គជំនុំជម្រះសាលាដំបូងបានចេញដីកាដោះលែង អៀង ធីរិទ្ធ ជាបន្ទាន់ដោយគ្មានលក្ខខណ្ឌ។ សេចក្តីសម្រេចចិត្តនេះត្រូវបានធ្វើឡើងបន្ទាប់ពីសេចក្តីសម្រេចលើកមុនរបស់អង្គជំនុំជម្រះសាលាដំបូងកាលពីថ្ងៃទី១៦ ខែវិច្ឆិកា ឆ្នាំ២០១១ ដែលកាលនោះ អង្គជំនុំជម្រះសាលាដំបូងយល់ថា អៀង ធីរិទ្ធ ពុំមានកាយសម្បទានិងបញ្ញាស្មារតីគ្រប់គ្រាន់ដើម្បីចូលរួមការជំនុំជម្រះក្តី ហើយបន្ទាប់មកអង្គជំនុំជម្រះតុលាការកំពូលបានសម្រេចលើបណ្តឹងសាទុក្ខរបស់សហព្រះរាជអាជ្ញា ដោយបញ្ជាឲ្យអង្គជំនុំជម្រះសាលាដំបូងស្វែងរកការព្យាបាលវេជ្ជសាស្រ្តបន្ថែមដល់ អៀង ធីរិទ្ធ ដើម្បីជួយឲ្យស្ថានភាពកាយសម្បទានិងបញ្ញាស្មារតីរបស់គាត់បានប្រសើរឡើងវិញ។
អង្គជំនុំជម្រះសាលាដំបូងបានសន្និដ្ឋានថា ដោយសារតែការបាត់បង់ការចងចាំរយៈពេលខ្លីនិងវែងរបស់គាត់ អៀង ធីរិទ្ធ ទំនងជាពុំអាចយល់ដឹងច្បាស់អំពីដំណើរការនីតិវិធី ដូច្នេះគាត់ពុំមានលទ្ធភាពណែនាំមេធាវីការពារក្តីរបស់គាត់ ក៏ដូចជាពុំមានលទ្ធភាពក្នុងការការពារខ្លួនគាត់នៅចំពោះមុខច្បាប់បានដែរ។ អង្គជំនុំជម្រះសាលាដំបូងក៏បានកត់សម្គាល់ឃើញថា ដោយសារតែស្ថានភាពជំងឺរបស់គាត់ អៀង ធីរិទ្ធ ទំនងជាពុំអាចផ្តល់សក្ខីកម្មនៅក្នុងតុលាការបានទេ។
បើទោះជាសហព្រះរាជអាជ្ញាយល់ស្របជាមួយអង្គជំនុំជម្រះសាលាដំបូងថាគួរតែដោះលែង អៀង ធីរិទ្ធ ក៏ដោយ ក៏ប៉ុន្តែសហព្រះរាជអាជ្ញាស្វែងរកលទ្ធភាពដាក់លក្ខខណ្ឌមួយចំនួនទៅលើការដោះលែងនេះ ដូចជា ដកហូតលិខិតឆ្លងដែននិងអត្តសញ្ញាណប័ណ្ណរបស់ អៀង ធីរិទ្ធ និងទាមទារឲ្យ អៀង ធីរិទ្ធ ត្រូវតែមានវត្តមាននៅក្នុងការចុះត្រួតពិនិត្យប្រចាំសប្តាហ៍របស់មន្ត្រីមានសមត្ថកិច្ច ជាដើម។ សហព្រះរាជអាជ្ញាបានប្តឹងសាទុក្ខប្រឆាំងនឹងដីកាដោះលែងរបស់អង្គជំនុំជម្រះសាលាដំបូង និងបានស្នើសុំឲ្យប្រធានអង្គជំនុំជម្រះតុលាការកំពូលផ្អាកការអនុវត្តដីកាដោះលែងនោះសិន។
ដោយពុំមានការជំទាស់ចំពោះការដោះលែង អៀង ធីរិទ្ធ អង្គជំនុំជម្រះតុលាការកំពូលយល់ឃើញថាពុំមានការចាំបាច់ត្រូវបន្តឃុំខ្លួនគាត់នៅក្នុងមន្ទីរឃុំឃាំងក្នុងអំឡុងដំណើរការដោះស្រាយបណ្តឹងឧទ្ធរណ៍ នៅថ្ងៃទី១៦ ខែកញ្ញា ឆ្នាំ២០១២ អង្គជំនុំជម្រះតុលាការកំពូលបានសម្រេចដោះលែង អៀង ធីរិទ្ធ ក្រោមលក្ខខណ្ឌបណ្តោះអាសន្នមួយចំនួនគឺ៖ ១) ជនជាប់ចោទត្រូវតែផ្តល់អាស័យដ្ឋានដែលគាត់រស់នៅ និងសុំការអនុញ្ញាតពីតុលាការមុននឹងផ្លាស់ទីលំនៅ។ ២) ជនជាប់ចោទមិនត្រូវចាកចេញពីប្រទេសកម្ពុជា និងត្រូវប្រគល់លិខិតឆ្លងដែនរបស់គាត់ដល់តុលាការ។ ៣) ជនជាប់ចោទត្រូវតែចូលខ្លួនប្រសិនបើមានការកោះហៅពីតុលាការ។ ជាងនេះទៅទៀត អៀង ធីរិទ្ធ ត្រូវបានហាមឃាត់មិនឲ្យជ្រៀតជ្រែកចូលក្នុងកិច្ចការរដ្ឋបាលរបស់តុលាការឡើយ។