រដ្ឋាភិបាលនៃចក្រភពអង់គ្លេសបានសន្យាផ្តល់ជំនួយថវិកាបន្ថែមចំនួន ១,៤ លានផោន (ប្រមាណ ២,២ លាន ដុល្លារអាមេរិក) ដល់ភាគីអន្តរជាតិនៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក)។
រដ្ឋមន្ត្រីក្រសួងការបរទេសនៃចក្រភពអង់គ្លេស លោក វីល្លៀម ហេក (William Hague) បានប្រកាសអំពីការសន្យាថ្មីនេះ នៅក្នុងសេចក្តីថ្លែងការណ៍ជាលាយលក្ខណ៍អក្សររបស់ក្រសួងការបរទេស ដែលចេញថ្ងៃទី២៥ ខែកុម្ភៈ ឆ្នាំ២០១៣។ ផ្នែកនៃសេចក្តីថ្លែងការណ៍ដែលនិយាយអំពី អ.វ.ត.ក បានសរសេរថា៖ “ចក្រភពអង់គ្លេសប្តេជ្ញាចិត្តបន្តការគាំទ្រដល់ដំណើរការរបស់តុលាការ ហើយជំនួយថ្មីដែលផ្តល់ជូនតាមការគ្រោងទុកនេះនឹងផ្តល់នូវស្ថិរភាពហិរញ្ញវត្ថុនៅក្នុងកាលៈទេសៈដ៏លំបាកនេះ”។ លោក ហេក បានថ្លែងថា “ចក្រភពអង់គ្លេសនឹងបន្តអំពាវនាវដល់បណ្តាប្រទេសជាដៃគូអន្តរជាតិ រួមទាំងរដ្ឋនានាក្នុងតំបន់ ឲ្យចូលរួមផ្តល់ជំនួយដល់តុលាការ”។
ប្រធានការិយាល័យរដ្ឋបាលស្តីទី ឯកឧត្តម ក្រាញ់ តូនី និងលោក ឃ្នុត រ៉ូសិនហក អនុប្រធានការិយាល័យរដ្ឋបាល បានឆ្លើយតបថា៖ “ក្នុងនាម អ.វ.ត.ក យើងខ្ញុំសូមសម្តែងអំណរគុណចំពោះការសន្យាថ្មីនេះ ដែលឆ្លុះបញ្ចាំងទឹកចិត្តសប្បុរសរបស់រដ្ឋាភិបាលអង់គ្លេស”។
ចក្រភពអង់គ្លេសបានផ្តល់ជំនួយថវិកាដល់ អ.វ.ត.ក សរុបចំនួន ៧,៩ លាន ដុល្លារអាមេរិក (ក្នុងនោះ ៦,៤ លានដុល្លារ សម្រាប់ភាគីអន្តរជាតិ និង ១,៥លានដុល្លារ សម្រាប់ភាគីជាតិ) ចាប់តាំងពីពេលចាប់បដិសន្ធិនៃតុលាការនេះ។ បូករួមទាំងការសន្យាថ្មីនេះ ជំនួយសរុបរបស់ចក្រភពអង់គ្លេសឡើងដល់ ១០,១ លានដុល្លារ។