ការបិទបញ្ចប់សវនាការបណ្ដឹងសាទុក្ខរបស់ ខៀវ សំផន ជាប្រវត្តិសាស្ដ្រថ្មីរបស់សាលាក្ដីខ្មែរក្រហមក្នុងការស្វែងរកការពិត និងយុត្តិធម៌

ជាប្រវត្តិសាស្ត្រថ្មីមួយទៀតរបស់សាលាក្តីខ្មែរក្រហមក្នុងបេសសកម្មនាំយកអតីតមេដឹកនាំជាន់ខ្ពស់ និងអ្នកទទួលខុសត្រូវខ្ពស់ក្នុងឧក្រិដ្ឋកម្មធ្ងន់ធ្ងរដែល​បាន​ប្រព្រឹត្តនៅក្នុង​របប​កម្ពុជា​ប្រជាធិបតេយ្យ​មកជំនុំជម្រះក្តី។​ អង្គជំនុំ ជម្រះតុលាការកំពូលនៃអង្គជំនុំជម្រះវិសាមញ្ញក្នុងតុលាការកម្ពុជា បានបិទបញ្ចប់សវនាការលើបណ្តឹងសាទុក្ខក្នុងសំណុំរឿង ០០២/០២ ប្រឆាំងនឹងជនជាប់ចោទ ខៀវ សំផន បន្ទាប់ពីបានដំណើរការអស់រយៈពេល ៤ ថ្ងៃរួចមកគឺពីថ្ងៃទី១៦ ដល់ថ្ងៃទី១៩ ខែសីហា ឆ្នាំ២០២១ នៅសាលសវនាការនៃ អង្គជំនុំជម្រះវិសាមញ្ញក្នុងតុលាការកម្ពុជា។

សវនាការលើបណ្តឹងសាទុក្ខនេះពិតជាមានសារៈសំខាន់សម្រាប់ជនរងគ្រោះ ជនជាប់ចោទ ប្រវត្តិសាស្ដ្រ​របស់​កម្ពុជា ក៏ដូច​ជាសម្រាប់ប្រព័ន្ធយុត្តិធម៌ព្រហ្មទណ្ឌអន្តរជាតិ និងមនុស្សជាតិទាំងមូលផងដែរ។

ការបិទបញ្ចប់សវនាការលើបណ្តឹងសាទុក្ខនេះ ជាមួយនឹងការរំពឹងថាសាលដីកានឹងត្រូវប្រកាសនៅក្ន្ងងពេលវេលាសមស្របខាងមុខ គឺជាការឈានទៅបិទបញ្ចប់សំណុំរឿង ០០២/០២ ប្រឆាំងនឹង ខៀវ សំផន ក៏ដូចជាការឈានទៅបិទបញ្ចប់សំណុំរឿង ០០២ ទាំងមូល ក្រោយពេលដំណើការនីតិវិធីច្បាប់អស់រយៈពេលជាង ១០ ឆ្នាំមកនេះ។

កាលពីថ្ងៃទី១៦ ខែវិច្ឆិកា ឆ្នាំ២០១៨ ខៀវ សំផន ត្រូវបានអង្គជំនុំជម្រះ​សាលាដំបូងសម្រេចផ្តន្ទាទោសដាក់ពន្ធនាគារអស់មួយជីវិតក្នុងសំណុំរឿង ០០២/០២។ លោក ខៀវ សំផន​​ អតីតប្រធានគណៈប្រធានរដ្ឋនៃរបបកម្ពុជាប្រជាធិប​តេយ្យ ឬរបបខ្មែរក្រហម ត្រូវបានអង្គជំនុំជម្រះសាលាដំបូងនៃអង្គជំនុំជម្រះវិសាមញ្ញក្នុងតុលាការកម្ពុជារកឃើញថា មានពិរុទ្ធភាពចំពោះឧក្រិដ្ឋកម្មប្រល័យពូជសាសន៍ ឧក្រិដ្ឋកម្មប្រឆាំងនឹងមនុស្សជាតិ និងឧក្រិដ្ឋកម្មសង្គ្រាម។ ឧក្រិដ្ឋកម្ម​ទាំងនេះបានប្រព្រឹត្ត​នៅតាមទីកន្លែងនានានៅក្នុងប្រទេសកម្ពុជា អំឡុងពេលនៃរបបកម្ពុជាប្រជាធិប​តេយ្យគ្រប់គ្រងប្រទេសពីថ្ងៃទី១៧ ខែមេសា ឆ្នាំ១៩៧៥ ដល់ថ្ងៃទី៦ ខែមករា ឆ្នាំ១៩៧៩។  

អង្គជំនុំជម្រះ​សាលាដំបូងបាន​រកឃើញថា ខៀវ សំផន ដែលជា​ប្រមុខរដ្ឋនៃ​របបកម្ពុជាប្រជាធិបតេយ្យ បាន​ចូលរួម​ក្នុងសហ​ឧក្រិដ្ឋកម្មរួមជាមួយ​មេដឹកនាំជាន់ខ្ពស់ដទៃទៀតនៃ​បក្សកុម្មុយនិស្ត​កម្ពុជា ដោយ​មាន​គោលបំណងអនុវត្ត​បដិវត្តន៍សង្គមនិយមឆាប់រហ័សតាមរយៈ​ការប្រ​​ព្រឹ​ត្តឧក្រិដ្ឋកម្ម​នានា​។​

​ជនជាប់ចោទ ខៀវ សំផន តាមរយៈ​មេធាវី​ការពារ​ក្តី​របស់ខ្លួន បានស្នើ​​អង្គជំនុំជម្រះតុលា​ការ​​កំពូល​មេត្តា​៖ ១-​ជា​ចម្បង​កត់សម្គាល់ពី​មោឃភាព​នៃ​សាលក្រមរបស់​អង្គជំនុំជម្រះសាលាដំបូងដែល​បានប្រកាសនៅ​ថ្ងៃទី​១៦ ខែវិច្ឆិកា ឆ្នាំ​២០១៨ ព្រមទាំង​សំអាង​ហេតុដែល​បាន​ជូនដំណឹងដល់​ភាគីនៅ​ថ្ងៃទី​២៨ ខែមីនា ឆ្នាំ​២០១៩ ដោយ​រំលោភ​លើ​វិធានផ្ទៃក្នុង​។ ២-​ជា​បន្ទាប់បន្សំ ធ្វើ​មោឃ​ភាព​សាលក្រម និង​សំអាង​ហេតុសាលក្រម​នៃ​សាលាដំបូង ដោយ​ចេញ​សាលក្រម​ពី​ការ​គ្មានពិរុទ្ធភាពចំពោះ​បទ​ចោទ​នីមួយៗ និង ៣-​ជា​បន្ទាប់បន្សំ​បំផុត កែប្រែ​ការផ្តន្ទាទោស និង​ប្រកាសដាក់ទោស​ឱ្យ​ជាប់ពន្ធនាគារក្នុង​រយៈពេល​កំណត់​មួយ​។​

​ចំណែក​ការិយាល័យសហ​ព្រះរាជអាជ្ញាមិនបាន​ប្តឹង​សាទុក្ខលើ​ផ្នែក​ពិរុទ្ធភាព​ទេ តែ​បាន​ប្តឹង​សាទុក្ខ ពាក់ព័ន្ធ​នឹង​ការ រៀប​​អា​ពា​ហ៍ដោយ​បង្ខំ។ សហព្រះរាជអាជ្ញាបាន​ស្នើសុំ​អង្គជំនុំជម្រះតុលាការ​កំពូល​​ថា អង្គជំនុំជម្រះ​សាលាដំបូងមាន​កំហុសឆ្គង​នៅពេលដែល​អង្គជំនុំជម្រះសាលាដំបូងបាន​សន្និដ្ឋានថា បុរស​ដែល​ត្រូវបាន​បង្ខំឱ្យ​រួមដំណេកនៅ​ក្នុងអា ពាហ៍ពិពាហ៍ដោយបង្ខំ​​របស់​ពួកគេ មិនមែនជា​ជនរងគ្រោះនៃ​ឧក្រិដ្ឋកម្មប្រឆាំងនឹងមនុស្សជាតិ នៃ​អំពើ​អមនុស្សធម៌ផ្សេងៗ​ទៀត​នោះទេ​។

សហ​ព្រះរាជអាជ្ញាបាន​ស្នើថា ការរកឃើញដោយមាន​កំហុស​នេះទុក​មួយអន្លើ​សិន ហើយ​ការផ្តន្ទាទោសចំពោះ​ឧក្រិដ្ឋកម្មនៃ​អំពើ​អមនុស្សធម៌ផ្សេងទៀត​ ត្រូវ​កែតម្រូវ​ដោយ​រួមបញ្ចូលហិង្សា​ផ្លូវភេទលើ​ជនរងគ្រោះជា​បុរស ដើម្បីឱ្យ​ជន​រង​គ្រោះទាំង​បុរស និង​ទាំង​ស្ត្រីនៃ​អំពើ​បង្ខំឱ្យ​រួមដំណេក​ដូចគ្នានេះ ត្រូវបាន​ទទួលស្គាល់យ៉ាង​ត្រឹមត្រូវ​។

​រីឯ​សហ​មេធាវីនាំមុខ​តំណាង​ដើមបណ្តឹងរដ្ឋប្បវេណី ស្នើសុំ​ដោយ​សេចក្តី​គោរពដល់​អង្គជំនុំជម្រះតុលាការ​កំពូលមេត្តា​៖ ១-​ច្រាន​ចោល​បណ្តឹងសាទុក្ខរបស់​ជនជាប់ចោទ ខៀវ សំផន ទាំងស្រុង ២-​តម្កល់​ពិរុទ្ធភាព ខៀវ សំផន ទាំងអស់ និង ៣-​តម្កល់​ការផ្តន្ទាទោស ខៀវ សំផន ដាក់ពន្ធនាគារអស់​មួយជីវិត​៕

"ផ្នែកកិច្ចការសាធារណៈ "

Most read