កាលពីថ្ងៃទី២៤ ខែមិថុនា ឆ្នាំ២០១៦ អង្គភាពគាំពារជនរងគ្រោះ នៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) បានរៀបចំវេទិកាប្រកបដោយជោគជ័យដោយមានការអញ្ជើញចូលរួមពីសំណាក់ដើមបណ្តឹងរដ្ឋប្បវេណី សហមេធាវីនាំមុខ មេធាវីតំណាងដើមបណ្តឹងរដ្ឋប្បវេណី និង មន្ត្រីមកពី អ.វ.ត.ក និងស្ថានទូតនៃសាធារណរដ្ឋសហ
ព័ន្ធអាឡឺម៉ង់ ព្រមទាំងតំណាងអង្គការជាតិ និងអន្តរជាតិជាច្រើនរូបទៀត។
បន្ទាប់ពីសុន្ទរកថាបើកដោយ ឯកឧត្តម ក្រាញ់ តូនី ប្រធានការិយាល័យរដ្ឋបាលស្តីទី នៃ អ.វ.ត.ក និងលោកស្រីបណ្ឌិត Ludgera Klemp អគ្គកុងស៊ុល និងជាប្រមុខសហប្រតិបត្តិការស្ថានទូតនៃសាធារណ រដ្ឋសហព័ន្ធអាឡឺម៉ង់ប្រចាំប្រទេសកម្ពុជារួចមក វេទិកាបានដំណើរការបន្តដោយការផ្តល់ព័ត៌មានស្តីពីបច្ចុប្បន្នភាពរបស់ អ.វ.ត.ក។ បទបង្ហាញបន្ទាប់ទៀតស្តីពីសំណងក្នុងសំណុំរឿង ០០២/០១ និង០០២/០២ ធ្វើឡើងដោយអង្គភាពគាំពារជនរងគ្រោះ និងអង្គភាពសហមេធាវីនាំមុខ។ តំណាងមកពីមជ្ឈមណ្ឌលតម្កល់ឯកសារច្បាប់ (LDC) អង្គការមនុស្សចាស់កម្ពុជា (HelpAge Cambodia) និងមជ្ឈមណ្ឌលធនធានសោតទស្សន៍បុប្ផាណា (Bophana) ក៏ បានធ្វើបទបង្ហាញស្តីពីគម្រោងសំណងដែលបានស្នើឡើងក្នុងសំណុំរឿង ០០២/០២ ផងដែរ ដោយមានការចូលរួមយ៉ាងសកម្ម និងប្រកបដោយអត្ថន័យ ពីសំណាក់ដើមបណ្តឹងរដ្ឋប្បវេណី និងមេធាវីរបស់ពួកគាត់។
ឯកឧត្តម ក្រាញ់ តូនី បានមានប្រសាសន៍ថា គម្រោងសំណង ១១ ដែលបានដាក់ស្នើក្នុងសុំណុំរឿង ០០២/០១ ត្រូវបានទទួលស្គាល់ដោយអង្គជំនុំជម្រះសាលាដំបូងកាលពីថ្ងៃទី០៧ ខែសីហា ឆ្នាំ២០១៤ ។ ភាគច្រើននៃគម្រោងទាំងនោះ ទទួលបានជំនួយឧបត្ថម្ភ និងអនុវត្តប្រកបដោយជោគជ័យនៅទូទាំងប្រទេស។ ឯកឧត្តមសង្ឃឹមថា សំណងក្នុង
សំណុំរឿង ០០២/០២ នឹងអាចធ្វើដំណើរឆ្ពោះទៅមុខជាថ្មីម្តងទៀតយ៉ាងរលូនសម្រាប់ជាប្រយោជន៍ដល់ជនរងគ្រោះ។ ឯកឧត្តមបានបន្ថែមទៀតថា រាជរដ្ឋាភិបាលកម្ពុជា បាននិងកំពុងគាំទ្រដល់ដំណើរការរបស់ អ.វ.ត.ក និងការអនុវត្តគម្រោងសំណងក្នុងក្របខ័ណ្ឌច្បាប់របស់តុលាការ។
លោកស្រីបណ្ឌិត Klemp បានថ្លែងលើកទឹកចិត្តដល់អ្នកចូលរួមទាំងអស់ ឲ្យមានការពិភាក្សាគ្នាផុសផុលស្តីពីដំណើរការវិវឌ្ឍន៍នៃនិតិវិធីរបស់ អ.វ.ត.ក និងសំណង។ លោកស្រីបណ្ឌិតបន្តថា ប្រទេសអាឡឺម៉ង់រួមជាមួយនឹងបណ្តាប្រទេសដទៃទៀត បាននិងកំពុង គាំទ្រដល់សកម្មភាពរបស់ អ.វ.ត.ក។ ប្រទេសអាឡឺម៉ង់បានគាំទ្រដល់គម្រោងនៃវិធានកានានាមិនពាក់ព័ន្ធបច្ចេកទេសតុលាការ និងគម្រោងសំណងជាច្រើនរួចមកហើយក្នុងសំណុំរឿង ០០២/០១ ក្នុងនោះរួមមាន៖ គម្រោងកសាងមជ្ឈមណ្ឌលសិក្សាសន្តិភាពសហគមន៍ ក្រាំង តាចាន់ ស្ថិតនៅខេត្ត តាកែវ ស្តូបរំលឹកវិញ្ញាណក្ខន្ធជនរងគ្រោះពីរបបកម្ពុជាប្រជាធិបតេយ្យនៅសារៈមន្ទីរប្រល័យពូជសាសន៍ទួលស្លែង ការព្យាបាលតាមបែបផ្តល់សក្ខីកម្ម និងក្រុមជួយខ្លួនឯង និងការតាំងពិព័រណ៍ចល័តស្តីពីការជម្លៀសដោយបង្ខំនិងការសម្លាប់នៅទូលពោធិ៍ជ្រៃ។ លោកស្រីបណ្ឌិត Klemp បានបន្តទៀតថា បន្ថែមលើជំនួយមុនៗកន្លងមក ក្នុងពេលថ្មីៗនេះ ប្រទេសអាឡឺម៉ង់ រួមជាមួយ ប្រទេសស្វីស និង អង្គការសហប្រជាជាតិដើម្បីលើកកម្ពស់សមភាពយេនឌ័រ និងផ្តល់ភាពអង់អាចដល់ស្រ្តី (UN Women) បានសម្រេចផ្តល់ជំនួយឧបត្ថម្ភដល់គម្រោង “ផ្កាស្លាក្រោមអង្គការ” ដែលជាគម្រោងមួយបានដាក់ស្នើក្នុងសំណុំរឿង ០០២/០២ និង អនុវត្តដោយ អង្គការក្រៅរដ្ឋាភិបាលមួយក្រុម។ ដើមបណ្តឹងរដ្ឋប្បវេណី ដែលបានចូលរួមវេទិកាមានការពេញចិត្តជាមួយការពិភាក្សា និងបទបង្ហាញស្តីពី គម្រោងសំណងដែលបានស្នើឡើង។ ពួកគាត់យល់ថា តាមក្របខ័ណ្ឌច្បាប់ របស់ អ.វ.ត.ក សំណងមានលក្ខណ:ជា “ផ្លូវចិត្ត និងសមូហភាព” តែប៉ុណ្ណោះ ហើយពួកគាត់បានស្នើសុំឲ្យមានការអនុវត្តគម្រោងសំណងប្រកបដោយប្រសិទ្ធភាព។
វេទិកាដើមបណ្តឹងរដ្ឋប្បវេណី គឺជាកន្លែងមានសុវត្ថិភាពមួយដែលដើមបណ្តឹងរដ្ឋប្បវេណី និងមេធាវីរបស់ពួកគាត់អាចជួបប្រជុំពិភាក្សាគ្នាស្តីពី ដំណើរការវិវឌ្ឍន៍នៃនីតិវិធី អ.វ.ត.ក និងសំណង សម្រាប់ជាប្រយោជន៍ដល់ពួកគាត់ក៏ដូចជា
មនុស្សជំនាន់ក្រោយៗទៀត។
ចាប់តាំងពីដំណើរការដំបូងនៃនិតិវិធីសំណុំរឿងលេខ ០០២/០២ មក អង្គភាពគាំពារជនរងគ្រោះបានរៀបចំវេទិកា
ចំនួន១៣ លើក ហើយមានដើមបណ្តឹងរដ្ឋប្បវេណីប្រមាណជា ១,៤៥៦ នាក់ បានមកចូលរួមក្នុងកិច្ចពិភាក្សា និងបទបង្ហាញផ្សេងៗ។