មន្ដ្រីផ្នែកកិច្ចការសាធារណៈនៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក.) នៅថ្ងៃពុធ ទី២ ខែសីហា ឆ្នាំ២០២៣ បានធ្វើបទបង្ហាញអំពីសមិទ្ធផល និងកេរដំណែលរបស់ អ.វ.ត.ក. ជូនសិស្សានុសិស្សប្រមាណ ២៣០ នាក់ មកពីស្រុកព្រះស្ដេច ខេត្ដព្រៃវែង។ បទបង្ហាញនេះធើ្វឡើងនៅក្នុងបរិវេណវិមានឈ្នះ ឈ្នះ នៅខណៈពេលសិស្សានុសិស្សទាំងនោះបានមកចូលរួមក្នុងកម្មវិធីទស្សនកិច្ចសិក្សារៀបចំដោយសាលាក្ដីខ្មែរក្រហម។
មន្ដ្រីផ្នែកកិច្ចការសាធារណៈបានជម្រាបជូនសិស្សានុសិស្សថា អ.វ.ត.ក បាននាំយក អតីតមេដឹកនាំជាន់ខ្ពស់ខ្មែរក្រហមចំនួន ៤ រូប និងអ្នកទទួលខុសត្រូវលើឧក្រិដ្ឋកម្មធ្ងន់ធ្ងរបំផុតចំនួន ១ រូប មកជំនុំជម្រះក្ដី។ លោកបញ្ជាក់ថា ជនទាំង ៥រូប នោះ រួមមាន លោក នួន ជា អតីតប្រធានរដ្ឋសភានៃរបបកម្ពុជាប្រជាធិបតេយ្យ និងជាអនុលេខាបក្សកុម្មុយនីស្តកម្ពុជា លោក ខៀវ សំផន អតីតប្រមុខរដ្ឋនៃរបបកម្ពុជាប្រជាធិបតេយ្យ លោក អៀង សារី អតីតឧបនាយករដ្ឋមន្ត្រី និងរដ្ឋមន្រ្តីក្រសួងការបរទេស អ្នកស្រី អៀង ធីរិទ្ធ អតីតរដ្ឋមន្រ្តីក្រសួងសង្គមកិច្ច និងលោក កាំង ហ្កេកអ៊ាវ ហៅឌុច អតីតប្រធានគុកទួលស្លែង ឬមន្ទីរស២១។
លោកបន្ដថា បន្ទាប់ពីការជំនុំជម្រះក្ដីត្រូវបានបញ្ចប់ អ.វ.ត.ក. ត្រូវអនុវត្ដកិច្ចព្រមព្រៀងបន្ថែមស្តីពីការរៀបចំក្នុងពេលអន្តរកាល និងការបញ្ចប់ការងាររបស់សាលាក្ដី សម្រាប់រយៈពេល៣ឆ្នាំបន្ថែមពីឆ្នាំ២០២៣ ដល់២០២៥។ ការងារទាំងអស់នោះរួមមាន ការងារផ្នែកគតិយុត្តមួយចំនួនរួមទាំងការគ្រប់គ្រង និងការថែរក្សាបណ្ណសារនៃសំណុំរឿងរបស់ អ.វ.ត.ក. ការធ្វើចំណាត់ថ្នាក់ឯកសារសំណុំរឿង ការផ្សព្វផ្សាយស្តីពីសមិទ្ធផលនិងកេរដំណែលរបស់ អ.វ.ត.ក. ឲ្យបានទូលំទូលាយ និងការពិនិត្យតាមដានការអនុវត្តសំណងដែលមានលក្ខណៈផ្លូវចិត្ត និងសមូហភាពដល់ដើមបណ្តឹងរដ្ឋប្បវេណី។
តំណាងសិស្សានុសិស្ស ដែលបានដឹកនាំសិស្សានុសិស្សមកទស្សនកិច្ចបានថ្លែងកោតសរសើរ និងអរគុណដល់សាលាក្ដីខ្មែរក្រហមដែលបានរៀបចំកម្មវិធីទស្សនកិច្ចសិក្សានេះឡើង ដោយលោកថា ទស្សនកិច្ចនេះនឹងជួយឱ្យយុវជនបានស្វែងយល់ អំពីប្រវត្តិសាស្ដ្រពិតប្រាកដនៃរបបឃោរឃៅខ្មែរក្រហម និងយល់ដឹងពីតម្លៃនៃសន្ដិភាព។ លោកក៏បានថ្លែងអំណរគុណដល់ប្រមុខរាជរដ្ឋាភិបាលផងដែរ ដែលលោកបានដឹកនាំប្រទេសកម្ពុជាឱ្យទទួលបានសុខសន្ដិភាព និងបានរីកចម្រើនគ្រប់វិស័យរហូតមកដល់សព្វថ្ងៃនេះ។
សូមបញ្ជាក់ថា ដំណើរទស្សនកិច្ចសិក្សាដែលរៀបចំដោយ អ.វ.ត.ក. នេះ សិស្សានុសិស្សទាំងអស់ត្រូវបានដឹកនាំឱ្យទៅស្វែងយល់រឿងរ៉ាវប្រវត្តិសាស្ដ្រចំនួនបីទីតាំង គឺនៅវិមាន ឈ្នះ ឈ្នះ សារៈមន្ទីរឧក្រិដ្ឋកម្មប្រល័យពូជសាសន៍ទួលស្លែង និងមជ្ឈមណ្ឌលប្រល័យពូជសាសន៍ជើងឯក។
សូមបញ្ជាក់ថា ដំណើរទស្សនកិច្ចសិក្សានេះត្រូវបានរៀបចំដោយផ្នែកកិច្ចការសាធារណៈ រៀងរាល់សប្ដាហ៍ ជូនសិស្សានុសិស្ស និស្សិត យុវជន និងពលរដ្ឋទូទៅ ដើម្បីជួយជម្រុញដល់ការចងចាំ និងការចូលរួមទប់ស្កាត់ការវិលត្រឡប់មកវិញនូវអំពើឃោរឃៅ ដូចក្នុងរបបខ្មែរក្រហមមកលើទឹកដីកម្ពុជាសាជាថ្មី។ ចាប់តាំងពីតុលាការដំណើរការដំបូង រហូតមកដល់ឆ្នាំ ២០២៣ នេះ សាធារណជនជាតិ និងអន្តរជាតិជាងកន្លះលាននាក់ហើយ បានចូលរួមក្នុងដំណើរទស្សនកិច្ចសិក្សា ក្រោមការសម្របសម្រួល និងរៀបចំដោយផ្នែកកិច្ចការសាធារណៈនៃសាលាក្តីខ្មែរក្រហម៕