នៅថ្ងៃនេះ អង្គជំនុំជម្រះតុលាការកំពូលក្នុងតុលាការកម្ពុជា (អវតក) បានជូនដំណឹងអំពីសំណៅជាលាយ លក្ខណ៍អក្សរពេញលេញនៃសាលដីកាលើបណ្តឹងសាទុក្ខក្នុងសំណុំរឿង ០០២/០២ ពាក់ព័ន្ធនឹងអតីតប្រមុខរដ្ឋ ខៀវ សំផន។
សាលដីកានេះអាចរកមើលបានជា ភាសាខ្មែរ និង ភាសាអង់គ្លេស ។
នៅថ្ងៃទី២២ ខែកញ្ញា ឆ្នាំ២០២២ អង្គជំនុំជម្រះតុលាការកំពូលបានប្រកាសផ្នែកសម្រេចសេចក្តីនៃសាលដីការបស់ខ្លួនជាសាធារណៈ និងបានអានសេចក្តីសង្ខេបនៃសំអាងហេតុនានារបស់ខ្លួន។ អង្គជំនុំជម្រះបានគូសបញ្ជាក់ថា សំណុំរឿងប្រឆាំង ខៀវ សំផន ពាក់ព័ន្ធនឹង “ព្រឹត្តិការណ៍ព្រៃផ្សៃបំផុតមួយចំនួនដែលបានកើតឡើងក្នុងចំណោមមហា សោកនាដកម្ម និងមហន្តរាយក្នុងប្រវត្តិសាស្រ្តមនុស្សជាតិ” និងបានបញ្ជាក់ថា ខៀវ សំផន បានចូលរួមចំណែកយ៉ាងធំធេងនៅក្នុងគោលនយោបាយឧក្រិដ្ឋ និងអំពើឧក្រិដ្ឋកម្មនានានៃរបបខ្មែរក្រហម។ ជាពិសេស អង្គជំនុំជម្រះបានពិចារណាឃើញថា ខៀវ សំផន បានដឹងអំពីការប្រព្រឹត្តិឧក្រិដ្ឋកម្មក្នុងរបបកម្ពុជាប្រជាធិបតេយ្យ និងមានចេតនារួមជាមួយមេដឹកនាំជាន់ខ្ពស់ផ្សេងទៀត ក្នុងការចូលរួម និងការប្រព្រឹត្តិឧក្រិដ្ឋកម្មចន្លោះពីថ្ងៃទី១៧ ខែមេសា ឆ្នាំ១៩៧៥ រហូតដល់ថ្ងៃទី០៦ ខែមករា ឆ្នាំ១៩៧៩។
អង្គជំនុំជម្រះតុលាការកំពូលបានតម្កល់ការផ្តន្ទាទោសរបស់អង្គជំនុំជម្រះសាលាដំបូង ចំពោះ ខៀវ សំផន ពីអំពើប្រល័យពូជសាសន៍ និងឧក្រិដ្ឋកម្មសង្រ្គាម។ អង្គជំនុំជម្រះបានតម្កល់ការផ្តន្ទាទោសទាំងអស់លើកលែងតែការ ផ្តន្ទាទោសចំនួនពីរ ដែលពាក់ព័ន្ធនឹងឧក្រិដ្ឋកម្មប្រឆាំងមនុស្សជាតិ និង បានរកឃើញបន្ថែមទៀតថា ខៀវ សំផន ទទួលខុសត្រូវចំពោះឧក្រិដ្ឋកម្មដែលពាក់ព័ន្ធនឹងជនរងគ្រោះបុរស នៅក្នុងករណីអាពាហ៍ពិពាហ៍ដោយបង្ខំ។