ភ្នំពេញ ប្រទេសកម្ពុជា - អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក.) គណៈកម្មាធិការអន្តរជាតិនៃកាកបាទក្រហម (ICRC) និង សាកលវិទ្យាល័យអាមេរិកាំងភ្នំពេញ (AUPP) បានបើកកិច្ចប្រជុំមួយ នៅថ្ងៃទី១ ខែធ្នូ ឆ្នាំ២០២៣ នេះ សម្រាប់ការរៀបចំការប្រកួតសវនាការប្រឌិតថ្នាក់ជាតិ ស្តីពីនីតិមនុស្សធម៌អន្តរជាតិ។
ឯកឧត្តម ក្រាញ់ តូនី ប្រធានរដ្ឋបាលស្តីទីនៃ អ.វ.ត.ក. មានប្រសាសន៍ថា៖ «យើងពិតជាមានសេចក្តីសោមនស្សរីករាយសម្រាប់អ.វ.ត.ក ក្នុងការធ្វើជាម្ចាស់ផ្ទះ សម្រាប់ការរៀបចំការប្រកួតសវនាការប្រឌិតថ្នាក់ជាតិ ស្តីពីនីតិមនុស្សធម៌អន្តរជាតិ ដោយសហការជាមួយ គណៈកម្មាធិការអន្តរជាតិនៃកាកបាទក្រហម និង សាកលវិទ្យាល័យអាមេរិកាំងភ្នំពេញ។ ការប្រកួតប្រជែងនេះ គឺជាផ្នែកមួយនៃការងាររបស់ អ.វ.ត.ក. ទាក់ទងនឹងការងារផ្សព្វផ្សាយ និងការចែករំលែកចំណេះដឹងដល់សិស្សានុសិស្សតាមរយៈកម្មវិធីអប់រំ»។
លោក Barnabe Reaud ប្រធានបេសកកម្មស្តីទីនៃ ICRC មានប្រសាសន៍ថា៖ «ក្នុងនាម ICRC ខ្ញុំមានកិត្តិយស ដែលបានចូលរួមជាមួយអ្នកនៅថ្ងៃនេះ ក្នុងពិធីបើកការប្រកួតសវនាការប្រឌិតថ្នាក់ជាតិ ស្តីពីនីតិមនុស្សធម៌អន្តរជាតិ។ ពិធីបើកនៅថ្ងៃនេះ គឺជាព្រឹត្តិការណ៍ដ៏សំខាន់មួយនៅក្នុងការខិតខំប្រឹងប្រែងរួមគ្នារបស់យើងក្នុងការរក្សាគោលការណ៍នៃនីតិមនុស្សធម៌អន្តរជាតិ ដែលជាមូលដ្ឋានគ្រឹះ នៃការឆ្លើយតបរបស់មនុស្សជាតិចំពោះជម្លោះប្រដាប់អាវុធ»។
លោក Raymond Leos អនុប្រធានផ្នែកកិច្ចការសិក្សា នៃសាកលវិទ្យាល័យអាមេរិកាំងភ្នំពេញ មានប្រសាសន៍ថា៖ «យើងរីករាយ ដែលបានចូលរួមក្នុងការរៀបចំការប្រកួតសវនាការប្រឌិតថ្នាក់ជាតិ ស្តីពីនីតិមនុស្សធម៌អន្តរជាតិ នៅចុងសប្តាហ៍នេះ ហើយនឹងធ្វើជាម្ចាស់ផ្ទះ សម្រាប់ការប្រកួតជុំទីមួយ នៅថ្ងៃស្អែកក្នុងបរិវេណសាលារបស់យើង។ សវនាការប្រឌិត មានតម្លៃណាស់សម្រាប់និស្សិតច្បាប់។ វាអនុញ្ញាតឱ្យពួកគេបន្តការអភិវឌ្ឍជំនាញរបស់ពួកគេ និងរៀនពីរបៀបដែលល្អបំផុតក្នុងការតវ៉ាករណី (សិក្សា) របស់ពួកគេ»។
ការប្រកួតសវនាការប្រឌិតថ្នាក់ជាតិ ស្តីពីនីតិមនុស្សធម៌អន្តរជាតិ នឹងប្រព្រឹត្តទៅរយៈពេល២ថ្ងៃ គឺនៅថ្ងៃទី២ និងថ្ងៃទី៣ ខែធ្នូ នៅបរិវេណសាកលវិទ្យាល័យអាមេរិកាំងភ្នំពេញ និងនៅបរិវេណនៃបន្ទប់សវនាការរបស់ អ.វ.ត.ក.។ ការរៀបចំព្រឹត្តិការណ៍នេះ មានគោលបំណងលើកកម្ពស់ចំណេះដឹងផ្នែកច្បាប់មនុស្សធម៌អន្តរជាតិ ក្នុងចំណោមនិស្សិត អ្នកសិក្សា និងអ្នកពាក់ព័ន្ធដទៃទៀត។
