អ.វ.ត.ក សហការរៀបចំការប្រកួតប្រជែង តុលាការនិម្មិតផ្នែកច្បាប់មនុស្សធម៌អន្តរជាតិរបស់ ICRC នៅវគ្គផ្តាច់ព្រ័ត្រថ្នាក់ជាតិ

កាលពី​ថ្ងៃអាទិត្យ ទី​១១ ខែ​ធ្នូ ឆ្នាំ​២០២២ អង្គជំនុំជម្រះ​វិសាមញ្ញក្នុង​តុលាការកម្ពុជា (អ.វ.ត.ក) បាន​សហ​ការ​រៀបចំការ​ប្រកួត​ប្រជែងតុលាការ​និម្មិតផ្នែក​ច្បាប់​មនុស្សធម៌​អន្តរជាតិ នៅវគ្គផ្តាច់ព្រ័ត្រថ្នាក់ជាតិ ជាមួយ​គណៈ​កម្មា​ធិការ​​កាកបាទ​ក្រហម​អន្តរជាតិ (ICRC) និង​សាកលវិទ្យាល័យនីតិសាស្រ្ត និង​វិទ្យាសាស្រ្ត​សេដ្ឋកិច្ច

បណ្តានិស្សិតដែលបានចូលរួមប្រកួតប្រជែងមានចំនួនបួនក្រុម មក​ពីសាកលវិទ្យាល័យ​នានា​បាន​ឈាន​ទៅ​ដល់​​វគ្គ​ពាក់​កណ្តាល​ផ្តាច់ព្រ័ត្រ និង​វគ្គ​ផ្តាច់​ព្រ័ត្រដែល​ត្រូវ​បានរៀបចំ​នៅក្នុង​បរិវេណ​បន្ទប់​សវនាការ អ.វ.ត.ក។ អ្នក​ប្រកបវិជ្ជាជីវៈច្បាប់​ចំនួនប្រាំពីររូប រួម​ទាំងចៅក្រម Martin KAROPKIN ជាចៅក្រម​នៃអង្គជំនុំជម្រះ​សាលាដំបូង​បាន​​បំពេញ​មុខងារចៅក្រមវិនិច្ឆ័យ​ក្នុង​ការប្រកួតប្រជែង​នេះ។ ក្រុម​ដែល​ទទួលជ័យជម្នះ រួមមាន លោក ស៊ីន ច័ន្ទសុភាព កញ្ញា ថោង រតនវិមាន និងកញ្ញា នីន សុធាវី នឹង​បន្តទៅចូលរួម ​ប្រកួត​ប្រជែងថ្នាក់​តំបន់នៃ​តុលាការ​និម្មិត​ផ្នែក​​ច្បាប់​មនុស្សធម៌​អន្តរជាតិ ក្នុងឆ្នាំ២០២៣ ដែល​រៀបចំនៅទីក្រុងហុង​កុង។

លោកស្រី Dena FISHER ជាប្រធានបេសកកម្មតំណាង ICRC បាន​មាន​ប្រសាសន៍ថា៖ “វាជា​កិត្តិយស​ដ៏ធំ​ធេង​​ណាស់ ​ដែល​យើង​អាច​រៀបចំការប្រកួត​ប្រជែង​តុលាការនិម្មិតផ្នែកច្បាប់​មនុស្សធម៌​អន្តរជាតិ នៅវគ្គផ្តាច់ព្រ័ត្រ​នៅ អ.វ.ត.ក ក្នុងឆ្នាំនេះ។ វាបានផ្តល់ឱកាសពិសេស និង​មាន​អត្ថន័យខ្លឹមសារ​មួយ​ដល់​ក្រុម​ប្រកួតប្រជែង ក្នុង​ការសម្តែង​សមត្ថភាពបង្ហាញទឡ្ហីករណ៍​ផ្នែក​ច្បាប់​របស់ខ្លួន​ចំពោះមុខ​ក្រុម​ចៅក្រម នៅក្នុងបន្ទប់សវនាការ​ជាប្រវត្តិសាស្រ្ត​នេះ។ ខ្ញុំជឿថា ប្អូនៗនិស្សិត​នឹង​ទទួល​បានបទពិសោធន៍   អនុវត្តន៍ជាក់​ស្តែង​ពីការប្រកួតប្រជែង​នេះ ដែល​នឹ​ង​អាច​ជួយ​ឲ្យ​ពួក​គេ​ទទួល​បានជោគជ័យ​ក្នុង​ការសិក្សា និងវិជ្ជាជីវៈនាពេលអនាគត”។

ច្បាប់​មនុស្សធម៌​អន្តរជាតិ​ ដែល​មាន​ចែង​ក្នុង​អនុសញ្ញា​ទីក្រុង​ហ្សឺណែវ និងពិធីសារ​នានា ​របស់​     អនុសញ្ញា​ទាំង​​​នេះ គឺជា​បណ្តុំ​វិធាន​នានាដែល​មាន​គោល​បំណង​បញ្ចៀសនូវ​ទុក្ខវេទនា​របស់មនុស្សជាតិ និងទប់​ស្កាត់​មិនឲ្យ​កើត​មានជា​ថ្មី​នូវ​អំពើឃោរឃៅបំផុត​ដោយសារ​សង្រ្គាម។

លោកស្រី Fisher បានបន្ថែម​ថា៖ “ICRC សូមថ្លែង​អំណរគុណយ៉ាង​ជ្រាលជ្រៅ​ដល់ អ.វ.ត.ក ដែល​បន្តឧបត្ថម្ភគាំទ្រ​ដល់​គំនិត​ផ្តួចផ្តើម​នេះ និង​បានផ្តល់​នូវ​បទពិសោធន៍បំផុសស្មារតីដល់​ប្អូនៗនិស្សិត​ដែល​ខិតខំប្រឹង​ប្រែង​ចូលរួម​ការ​ប្រកួត​ប្រជែង​នៅ​ថ្ងៃនេះ។ ខ្ញុំសូមសម្តែង​ការ​អបអរសាទរដល់​អ្នកច្បាប់​វ័យក្មេងទាំងអស់របស់​យើង ដែល​បានជោគ​ជ័យដល់​វគ្គផ្តាច់​ព្រ័ត្រក្នុង​ការប្រកួត​ប្រជែង​នេះ និងសូមជូនពរ​ឲ្យ​ពួកគេទទួល​បានជោគជ័យថែម​ទៀត​នា​ពេល​អនាគត”។

លោកស្រី តាន់ បូរ៉ាវីន មកពី​សាកលវិទ្យាល័យនីតិសាស្រ្ត និង​វិទ្យាសាស្រ្ត​សេដ្ឋកិច្ចបាន​គូសបញ្ជាក់ថា៖ “ការ​ប្រកួត​​ប្រជែង​តុលាការនិម្មិតផ្នែកច្បាប់​មនុស្សធម៌​អន្តរជាតិ គឺជាធាតុមួយយ៉ាង​សំខាន់ សម្រាប់  ​ផ្តល់ជា​បទពិសោធន៍​ផ្នែក​​សិក្សាអប់រំដល់​ប្អូនៗនិស្សិតច្បាប់​កម្ពុជា។ ជាថ្មីម្តងទៀត នៅ​ឆ្នាំនេះ បន្ទប់សវនាការ​នៅ អ.វ.ត.ក ជាកន្លែង​ដែល​បង្កើត​​ឡើង​នូវ​ការចងចាំផ្នែកច្បាប់ និង​ប្រវត្តិសាស្រ្ត​នៅកម្ពុជា  បណ្តានិស្សិតច្បាប់​របស់​យើង​បានបង្ហាញនូវ​ភាព​ជំ​នាញ និង​វិជ្ជាជីវៈ​ផ្នែក​ច្បាប់​របស់​ខ្លួន។ ខ្ញុំ​សង្ឃឹម​ថា នៅឆ្នាំក្រោយៗទៀត ប្អូនៗនិស្សិតដែលមានចំណាប់អារម្មណ៍ និង​​ចង់​ដឹងចង់ឃើញ នឹង​មកចូលរួម​ការប្រកួតប្រជែងនេះ ដើម្បី​បន្តកេរដំណែល​របស់​តុលាការនេះ”។

អ.វ.ត.ក​ សូម​អបអរសាទរ​ដល់​ប្អូនៗនិស្សិតទាំងអស់​ដែល​បាន​ចូលរួម​ និង​បាន​ខិតខំប្រឹង​ប្រែង​លើក​កម្ពស់​គោល​ការណ៍សំខាន់​ៗនៃច្បាប់​មនុស្សធម៌​អន្តរជាតិ និងរង់ចាំបន្តគាំទ្រយ៉ាងសកម្មដល់គំនិតផ្តួចផ្តើម​ទាំង​នេះ ក្នុង​អំឡុង​ពេល​បំពេញ​មុខងារ​សេសសល់របស់ខ្លួន។​

Most read