ឯកឧត្តម NKUBITO Manzi Bakuramutsa ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋរវ៉ាន់ដា ប្រចាំព្រះរាជាណាចក្រកម្ពុជា ដែលមាននិវេសនដ្ឋាននៅទីក្រុងសេអ៊ូល កាលពីថ្ងៃទី១៣ ខែមីនា ឆ្នាំ២០២៤ បានមកបំពេញទស្សនកិច្ចជាផ្លូវការនៅមជ្ឈមណ្ឌលធនធាន អ.វ.ត.ក. ក្នុងគោលបំណងដើម្បីស្វែងយល់ពីដំណើរការជំនុំជម្រះក្ដី សមិទ្ធផល និងកេរដំណែលរបស់ អ.វ.ត.ក. ដែលទទួលបានពីការជំនុំជម្រះក្ដីលើអតីតមេដឹកនាំជាន់ខ្ពស់នៃរបបខ្មែរក្រហម ក៏ដូចជាស្វែងយល់ពីការងាររបស់ អ.វ.ត.ក. ក្នុងដំណាក់កាលមុខងារសេសសល់។
ក្នុងអំឡុងកិច្ចប្រជុំ ឯកឧត្តម ក្រាញ់ តូនី ប្រធានរដ្ឋបាលស្តីទី អ.វ.ត.ក. លោក ឃ្នុត រ៉ូហ្សិនហ៊ក អនុប្រធានការិយាល័យរដ្ឋបាល ឯកឧត្តម ថោង សុជាតិ មន្ដ្រីគ្រប់គ្រងជាន់ខ្ពស់នៃ អ.វ.ត.ក. បានជម្រាបជូន និង ធ្វើបទបង្ហាញដល់គណៈប្រតិភូអំពីសមិទ្ធិផល កេរដំណែល និង ការងាររបស់ អ.វ.ត.ក. ក្នុងដំណាក់កាលមុខងារសេសសល់។ គណៈគ្រប់គ្រងបានអញ្ជើញឯកឧត្តមឯកអគ្គរដ្ឋទូតសាធារណរដ្ឋរវ៉ាន់ដា ដើម្បីទស្សនា បន្ទប់ពហុបំណង (បន្ទប់សវនាការត្រាប់) បណ្ណាល័យ និង និហិដ្ឋានបណ្ណាសា។ ឯកឧត្តមឯកអគ្គរដ្ឋទូតសាធារណរដ្ឋរវ៉ាន់ដា NKUBITO Manzi Bakuramutsa បានថ្លែងអំណរគុណ និង បានអបអរសាទរដល់ អ.វ.ត.ក សម្រាប់កិច្ចខិតខំប្រឹងប្រែងដ៏អស្ចារ្យក្នុងការផ្តល់យុត្តិធម៌នេះ។
