គម្រោងថវិកាសម្រាប់ឆ្នាំ ២០១២ និង ២០១៣ របស់អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) ដែលត្រូវបានអនុម័តរួចហើយនោះ ត្រូវបានផ្សព្វផ្សាយហើយ ឥឡូវនេះមាននៅលើគេហទំព័រ អ.វ.ត.ក ។
គម្រោងថវិកាឆ្នាំ ២០១២-២០១៣ មានចំនួនសរុប ៨៩,៦ លានដុល្លារអាមេរិក ដែលក្នុងនោះ ៤៥,៧ លានដុល្លារ សម្រាប់ឆ្នាំ ២០១២ និង ៤៣,៩ លានដុល្លារ សម្រាប់ឆ្នាំ ២០១៣។ ថវិកាសម្រាប់ភាគីអន្តរជាតិនៃ អ.វ.ត.ក មានចំនួន ៦៩,៦ លានដុល្លារ ក្នុងនោះ ៣៥,៤ លានដុល្លារ សម្រាប់ឆ្នាំ ២០១២ និង ៣៤,២ លានដុល្លារ សម្រាប់ឆ្នាំ ២០១៣។ ថវិកាភាគីជាតិនៃ អ.វ.ត.ក មានចំនួន ២០ លានដុល្លារ ក្នុងនោះ ១០,៣ លានដុល្លារ សម្រាប់ឆ្នាំ ២០១២ និង ៩,៧ លានដុល្លារសម្រាប់ឆ្នាំ ២០១៣។ តួលេខខាងភាគីអន្តរជាតិរាប់បញ្ចូលទាំងការចំណាយយថាភាពផ្សេងៗផងដែរ។
ប្រទេសផ្តល់ជំនួយបានអនុម័តថវិការបស់ អ.វ.ត.ក រួចហើយ កាលពីសបា្តហ៍មុន ក្រោមលក្ខខណ្ឌពីរ៖
ក) ត្រូវពន្យារពេលអនុវត្តសកម្មភាពទាំងឡាយនៅក្រោមផ្នែក (ឃ) នៃសំណើថវិកាដែលពាក់ព័ន្ធនឹងគម្រោង កេរដំណែលនិងការងារសេសសល់របស់តុលាការ រហូតដល់ពេលណាដែលភាគីជាតិនិងភាគីអន្តរជាតិ មានថវិកាគ្រប់គ្រាន់ ហើយប្រទេសម្ចាស់ជំនួយនឹងមានពេលវេលាបន្ថែមទៀតដើម្បីសិក្សាទៅលើសំណើគម្រោងនេះ ដែលរួមទាំងថវិកាដែលស្នើឡើងដោយភាគីអន្តរជាតិផង។
ខ) តម្រូវការបុគ្គលិកនៃការិយាល័យសហចៅក្រមស៊ើបអង្កេតជាតិនឹងត្រូវពិចារណាឡើងវិញ ក្នុងករណីដែលពុំមានថវិកាគ្រប់គ្រាន់សម្រាប់ដំណើរការសកម្មភាពការងាររបស់ការិយាល័យនេះ។
សម្រាប់ព័ត៌មានបន្ថែម សូមមើល http://www.eccc.gov.kh/en/about-eccc/finances