លោក ញឹម ម៉េង ជាគរុសិស្សឆ្នាំទី២ នៃសាលាគរុកោសល្យ និងវិក្រឹតការ ខេត្តតាកែវ នៅថ្ងៃទី៣ ខែសីហា ឆ្នាំ២០២៣ នេះ បានចូលរួមកម្មវិធីទស្សនកិច្ចសិក្សារៀបចំដោយសាលាក្ដីខ្មែរក្រហម។ ក្នុងពេលចូលរួមនោះ លោកបានលើកឡើងថា លោកមានអារម្មណ៍រីករាយជាពន់ពេកដែលបានមកចូលរួមក្នុងកម្មវិធីទស្សនកិច្ចសិក្សានេះ។ លោកបន្ថែមថា លើសពីការសិក្សានៅក្នុងថ្នាក់រៀន ទស្សនកិច្ចសិក្សានេះ បានធ្វើឱ្យលោកទទួលបានចំនេះដឹងន្ថែមច្រើនអំពីប្រវត្តិសាស្រ្ដនៃរបបឃោរឃៅខ្មែរក្រហម តាមរយៈការទស្សនានូវស្លាកស្នាម រូបថត ទិដ្ឋភាពផ្សេងៗនៅក្នុងសារៈមន្ទីរ និងបានស្ដាប់បទបង្ហាញពីមន្ដ្រីពាក់ព័ន្ធផ្សេងៗ។
គរុសិស្សរូបនេះបញ្ជាក់ថា “ចំពោះខ្ញុំផ្ទាល់ពេលខ្ញុំសិក្សានៅក្នុងសាលាអី មានអារម្មណ៍ថា រៀងស្រពេចស្រពិល ហើយកាលដែលអត់បានឃើញពីទីតាំងនឹង អត់បានស្ដាប់អ្នកជំនាញផ្ទាល់គាត់ណែនាំចឹងហើយ អត់ទាន់មានអារម្មណ៍ប្រាកដប្រជាទេ ប៉ុន្ដែពេលមកដល់ទីនេះហើយ ធ្វើឱ្យយើងមានអារម្មណ៍ថា ច្បាស់ជាងមុនទាក់ទងរឿងរ៉ាវទាំងអស់នឹង ហើយធ្វើឱ្យអារម្មណ៍យើងកាន់តែចង់ដឹងបន្ថែមទៀត”។
ញឹម ម៉េង បន្ថែមថា ការណ៍ដែលទទួលបានចំណេះដឹងពិតប្រាកដអំពីប្រវត្តិសាស្ដ្រដ៏ឃោរឃៅរបស់ខ្មែរក្រហមដែលបានប្រព្រឹត្តមកលើកម្ពុជានេះ ពិតជាមានសារៈសំខាន់ណាស់សម្រាប់រូបលោក និងយុវជនទាំងឡាយ ព្រោះលោកយល់ថា វានឹងអាចជួយទប់ស្ដាត់អំពើឃោរឃៅនោះកុំឱ្យកើតមានឡើងម្ដងជាថ្មីម្ដងទៀតបាន។
ម៉េង បញ្ជាក់ថា “ដើម្បីទប់ស្ដាត់របបឃោរឃៅបែបនេះគឺ ជាទូទៅយើងអត់អាចទប់ស្កាត់អីបានតែម្នាក់ឯកបានទេ គឺយើងត្រូវមានការចូលរួមទាំងអស់គ្នា ហើយចំពោះយុវជនយើងជំនាន់ក្រោយ អីដែលសំខាន់យើងអត់អាចយកបាតដៃទទេទៅទប់ស្កាត់អីមួយបានទេ គឺយើងត្រូវមានចំណេះដឹងជ្រៅជ្រះ ទីមួយយើងត្រូវសិក្សាចំណេះដឹង(ប្រវត្តិសាស្ដ្រ)ឱ្យបានច្បាស់លាស់អំពីប្រវត្តិសាស្ដ្ររបស់យើង ហើយយើងសិក្សាមើលនូវចំណុចអវិជ្ជមានណាខ្លះដែលវានឹងមិនគួរកើតឡើងទៀត ហើយយើងចូលរួមទប់ស្កាត់វាទាំងអស់គ្នា។”
សូមបញ្ជាក់ថា អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក.) នៅថ្ងៃទី៣ ខែសីហា ឆ្នាំ២០២៣ នេះបានរៀបចំដំណើរទស្សនកិច្ចសិក្សាជូនគរុសិស្សចំនួនប្រមាណ១៥០នាក់ មកពីសាលាគរុកោសល្យ និងវិក្រឹតការខេត្តតាកែវ ទៅទស្សនកិច្ចសិក្សានៅសារៈមន្ទីរឧក្រិដ្ឋកម្មប្រល័យពូជសាសន៍ទួលស្លែង និងវិមានឈ្នះ ឈ្នះ។ គរុសិស្សទាំងអស់ក៏ទទួលបានការធ្វើបទបង្ហាញអំពីសមិទ្ធផល និងកេរដំណែលរបស់ អ.វ.ត.ក. ពីមន្ដ្រីផ្នែកកិច្ចការសាធារណៈនៃអង្គជំនុំជម្រះផងដែរ។
ដំណើរទស្សនកិច្ចសិក្សានេះ ត្រូវបានរៀបចំរៀងរាល់សប្ដាហ៍ ជូនសិស្សានុសិស្ស និស្សិត យុវជន និងពលរដ្ឋទូទៅ ដើម្បីជួយជម្រុញដល់ការចងចាំ និងការចូលរួមទប់ស្កាត់ការវិលត្រឡប់មកវិញនូវអំពើឃោរឃៅ ដូចក្នុងរបបខ្មែរក្រហមមកលើទឹកដីកម្ពុជាសាជាថ្មី។ ចាប់តាំងពីតុលាការដំណើរការដំបូង រហូតមកដល់ឆ្នាំ ២០២៣ នេះ សាធារណជនជាតិ និងអន្តរជាតិជាងកន្លះលាននាក់ហើយ បានចូលរួមក្នុងដំណើរទស្សនកិច្ចសិក្សា ក្រោមការសម្របសម្រួល និងរៀបចំដោយផ្នែកកិច្ចការសាធារណៈនៃសាលាក្តីខ្មែរក្រហម៕
