លោកគ្រូ សឿង សុភ័ណ្ឌ បញ្ជាក់ថា “ការមកទស្សនកិច្ចនេះគឺពិតជាមានសារៈសំខាន់ណាស់ ព្រោះធ្វើឱ្យសិស្សានុសិស្សបានយល់ដឹងពីប្រវត្ដិសាស្ដ្រច្បាស់ពិសេសពីរបប ប៉ុល ពត ដែលជាសម័យដ៏សាហាវយង់ខ្នងបំផុត។”
លោក សឿង សុភ័ណ្ឌ ជាគ្រូបង្រៀននៅក្នុងវិទ្យាល័យ សុខា ផល្លី នៅថ្ងៃទី២១ ខែកញ្ញា ឆ្នាំ២០២៣ នេះ បានសហការជាមួយ អ.វ.ត.ក. ដឹកនាំសិស្សានុសិស្សប្រមាណ ១៥០នាក់ ដែលកំពុងសិក្សាក្នុងវិទ្យាល័យ សុខា ផល្លី ក្នុងក្រុងច្បារមន ខេត្តកំពង់ស្ពឺ ទៅទស្សនកិច្ចសិក្សាវិមាន ឈ្នះ-ឈ្នះ និងសារៈមន្ទីរឧក្រិដ្ឋកម្មប្រល័យពូជសាសន៍ទួលស្លែង។ ក្នុងដំណើរទស្សនកិច្ចសិក្សានេះ មន្ដ្រីផ្នែកកិច្ចការ សាធារ ណៈនៃ អ.វ.ត.ក. ក៏បានទទួលស្វាគមន៍ និងធ្វើបទបង្ហាញអំពីសមិទ្ធផល នៃការជំនុំជម្រះក្ដី និងបច្ចុប្បន្នភាពកិច្ចការរបស់ អ.វ.ត.ក. ជូនយុវជនទាំងអស់ផងដែរ។
លោកគ្រូបន្ថែមថា តាមការសង្កេតរបស់លោកគ្រូ សិស្សានុសិស្សទាំងអស់ដែលបានចូលរួមក្នុងដំណើរទស្សនកិច្ចសិក្សានេះបានចាប់អារម្មណ៍យ៉ាងខ្លាំង និងរៀនសូត្របានច្រើនអំពីរឿងរ៉ាវនៅទាក់ទងនឹង របបខ្មែរក្រហម ព្រោះពូកគេបានមកឃើញដោយផ្ទាល់ពីស្ថានភាព និងភស្ដុតាងជាក់ស្ដែងដែលបានបន្សល់ទុកពីរបបខ្មែរក្រហម និងបានស្ដាប់ការពន្យល់យ៉ាងក្បោះក្បាយរបស់មន្ដ្រីជំនាញនៅតាមទីតាំងនីមួយៗ។
យុវតី តាំ ធីយ៉ា ជាសិស្សកំពុងសិក្សាក្នុងវិទ្យាល័យ សុខា ផល្លី ដែលបានមកចូលរួមក្នុងដំណើរទស្សនកិច្ចនេះ បានលើកឡើងថា កញ្ញាទទួលបានចំណេះដឹងយ៉ាងច្រើនទាក់ទងនឹងការធ្វើទារុណកម្មយ៉ាងសាហាវ ភាពឈឺចាប់ វេទនារបស់ប្រជាជនកម្ពុជាក្នុងរបបកម្ពុជាប្រជាធិបតេយ្យ នដឹងអំពីការលះបង់ ការតស៊ូរបស់ថ្នាក់ដឹកនាំកម្ពុជាក្នុងការរំដោះប្រជាជនចេញពីរបបព្រៃផ្សៃនោះ និងការជំនុំជម្រះក្ដីដោយតុលាការខ្មែរក្រហមផងដែរ។
ចំណែក លោក ខុម ម៉េងទី ជាសិស្សរួមវិទ្យាល័យ សុខា ផល្លី ដែរ បានបញ្ជាក់ថា ការចូលរួមក្នុងដំណើរទស្សនកិច្ចនេះ លោករៀនសូត្របានច្រើនអំពីការដាក់ចេញគោលនយោបាយ ឈ្នះ-ឈ្នះ របស់សម្ដេចតេជោ ហ៊ុន សែន ក្នុងការរំដោះប្រជានជនកម្ពុជា ឱ្យរួចផុតពីទុក្ខលំបាកនៅក្នុងរបបខ្មែរក្រហម និងបានផ្ដល់សុខសន្ដិភាព និងការអភិវឌ្ឍជូនប្រទេសកម្ពុជាឱ្យបានរីកចម្រើនរហូតដល់សព្វថ្ងៃនេះ។
សូមបញ្ជាក់ថា ដើម្បីចូលរួមជម្រុញដល់ការចងចាំ និងទប់ស្កាត់ការកើតមានឡើងនូវអំពើឃោរឃៅ ដូចក្នុងរបបខ្មែរក្រហមសាជាថ្មី អ.វ.ត.ក. បានរៀបចំកម្មវិធីទស្សនកិច្ចសិក្សារៀងរាល់សប្ដាហ៍ជូនសិស្សានុសិស្ស និស្សិត យុវជន និងប្រជាពលរដ្ឋ ទៅទស្សនៈកិច្ចសិក្សានៅវិមាន ឈ្នះ-ឈ្នះ សារៈមន្ទីរឧក្រិដ្ឋកម្មប្រល័យពូជសាសន៍ទួលស្លែង និងមជ្ឈមណ្ឌលប្រល័យពូជសាសន៍ជើងឯក។ ចាប់តាំងពីឆ្នាំ២០០៩ រហូតមកដល់ឆ្នាំ ២០២៣ នេះ មានសាធារណៈជនជាតិ និងអន្តរជាតិ ច្រើនជាង ៦០ ម៉ឺននាក់ហើយ ដែលបានចូលរួមក្នុងដំណើរទស្សនកិច្ចសិក្សាក្រោមការសម្របសម្រួល និងរៀបចំដោយផ្នែកកិច្ចការសាធារណៈនៃសាលាក្តីខ្មែរក្រហម៕
