ស្ថានទូតជប៉ុនដែលជាសហប្រធាននៃមិត្តរបស់ អ.វ.ត.ក. បានរៀបចំកិច្ចប្រជុំប្រចាំត្រីមាសលើក ទី១៨ រវាងប្រទេសម្ចាស់ជំនួយសម្រាប់តុលាការខ្មែរក្រហម នៅព្រឹកថ្ងៃទី៧ ខែកញ្ញានេះ នៅទីស្តីការ គណៈរដ្ឋមន្ត្រី។ នេះគឺជាកិច្ចប្រជុំប្រចាំត្រីមាសរវាងប្រទេសម្ចាស់ជំនួយនិងសាលាក្តីខ្មែរក្រហមដែល ធ្វើឡើងរៀងរាល់៣ខែម្តង។ ដោយឡែក កិច្ចប្រជុំលើកនេះមានទ្រង់ទ្រាយធំជាងមុន ដោយសារមាន ការចូលរួមពីតំណាងរបស់បណ្តាប្រទេសម្ចាស់ជំនួយជិត៤០ ប្រទេស និងមានការចូលរួមជា អធិបតីភាពជាលើកទី១ពីឯកឧត្តមបណ្ឌិត សុខ អាន ឧបនាយករដ្ឋមន្ត្រី រដ្ឋមន្រ្តីទទួលបន្ទុកទីស្តីការ គណៈរដ្ឋមន្រ្តី និងជាប្រធានក្រុមការងារជំនាញបង្កើតតុលាការខ្មែរក្រហមរបស់រាជរដ្ឋាភិបាលកម្ពុជា និងលោក គ្លីង វិល្លាមសាន់ អ្នកជំនាញពិសេសរបស់អគ្គលេខាធិការអង្គការសហប្រជាជាតិសម្រាប់ ការកាត់ទោសមេដឹកនាំខ្មែរក្រហម។
ចូលរួមក្នុងកិច្ចប្រជុំនេះមាន រដ្ឋបាលនៃ អ.វ.ត.ក.ក្រុមការងារតំណាងរាជរដ្ឋាភិបាលកម្ពុជាសម្រាប់ សាលាក្តីខ្មែរក្រហម តំណាងពិសេសរបស់អគ្គលេខាធិការអង្គការសហប្រជាជាតិសម្រាប់ការកាត់ ទោសមេដឹកនាំខ្មែរក្រហម ប្រទេសចំនួន២២ជាសមាជិកនៃមិត្តរបស់សាលាក្តីខ្មែរក្រហម និងប្រទេស ជាសមាជិកសហគមន៍អឺរ៉ុប ក្នុងនោះ១៣ប្រទេសតំណាងដោយឯកអគ្គរាជទូតឬឯកអគ្គរដ្ឋទូត។
គោលបំណងនៃកិច្ចប្រជុំនេះគឺដើម្បីសិក្សាស្វែងយល់អំពីការវិវត្តន៍របស់សាលាក្តីខ្មែរក្រហម និងដើម្បីរៃអង្គាសវិភាគទានបន្ថែមសម្រាប់បន្តដំណើរការ របស់សាលាក្តីនេះក្នុងឆ្នាំ២០១០ និងឆ្នាំ២០១១។
ថ្លែងក្នុងឧិកាសនោះ ឯកឧត្តម សុខ អាន បានលើកឡើងអំពីជោគជ័យរបស់សាលាក្តីក្នុងសំណុំរឿង ០០១ ប្រឆាំងនឹងជនជាប់ចោទ កាំង ហ្គេកអ៊ាវ ហៅ ឌុច និងផលប្រយោជន៍ជាវិជ្ជមានរបស់ ដំណើរការនេះក្នុងសង្គមកម្ពុជានិយាយជារួម និងក្នុងប្រព័ន្ធយុត្តិធម៌នៅកម្ពុជានិយាយដោយឡែក។ ឯកឧត្តមសង្កត់ធ្ងន់ទៅលើតួនាទីដ៏សំខាន់របស់តុលាការនេះក្នុងការផ្សះផ្សារជាតិនៅកម្ពុជា និង សារសំខាន់នៃការចាប់យកឧិកាសក្នុងការធ្វើសមាហរណកម្មចំណេះនិងជំនាញពីអង្គតុលាការ កូនកាត់នេះទៅក្នុងប្រព័ន្ធតុលាការក្នុងស្រុក។
ឯកឧត្តមក៏មិនភ្លេចលើកឡើងអំពីការគាំទ្រយ៉ាងកក់ក្តៅរបស់រាជរដ្ឋាភិបាលកម្ពុជាចំពោះសាលាក្តី ខ្មែរក្រហម និងអំពីឆន្ទៈដ៏មុតមាំរបស់រាជរដ្ឋាភិបាលក្នុងការបញ្ចប់វប្បធម៌និរទណ្ឌភាពនៅកម្ពុជា។ ជាក់ស្តែង រាជរដ្ឋាភិបាលកម្ពុជាបានសន្យាផ្តល់បដិភាគចំនួន១,១លានដុល្លារអាមេរិកដល់ អ.វ.ត.ក. សម្រាប់ឆ្នាំ២០១១។ ជាមួយគ្នានេះដែរ ឯកឧត្តមបានអំពាវនាវដល់បណ្តាប្រទេសម្ចាស់ជំនួយឲ្យបន្ត ជួយជាវិភាគទានបន្ថែមទៀតដល់សាលាក្តីខ្មែរក្រហម ដើម្បីឲ្យស្ថាប័ននេះអាចបន្តបេសកកម្មរបស់ខ្លួន ទៅលើសំណុំរឿងក្តី ០០២ ដែលគេមើលឃើញថាមានលក្ខណៈកាន់តែស្មុគ្រស្មាញជាងរឿងក្តី ០០១ ដោយសារវ័យនិងចំនួនរបស់ជនជាប់ចោទ និងដោយសារវាមានវិសាលភាពគ្របដណ្តប់ទៅលើ ឧក្រិដ្ឋកម្មច្រើនដែលកើតឡើងនៅទូទាំងប្រទេសកម្ពុជា។
រួមជាមួយរាជរដ្ឋាភិបាលកម្ពុជា លោក គ្លីង វីល្លាមសាន់ តំណាងពិសេសរបស់អគ្គលេខាធិការអង្គការ សហប្រជាជាតិសម្រាប់ការកាត់ទោសមេដឹកនាំខ្មែរក្រហម ដែលទើបតែត្រូវបានតែងតាំងក្នុងពេលថ្មីៗ នេះ បន្តតួនាទីរបស់លោក គៀងគរថវិកាពីប្រទេសនានាលើពិភពលោកដើម្បីទ្រទ្រង់ថវិការបស់ អ.វ.ត.ក.។
បន្ថែមទៅលើប្រសាសន៍របស់ឯកឧត្តមបណ្ឌិត សុខអាន ឯកឧត្តម ចាន់ តានី រដ្ឋលេខាធិការនៃ ទីស្តីការគណៈរដ្ឋមន្ត្រី បានជម្រាបជូនអង្គប្រជុំអំពីដំណើរវិវត្តន៍ផ្នែកច្បាប់នៅក្នុងរឿងក្តីលេខ ០០២ និងអំពីចំនួនថវិកាដែលចាំបាច់ត្រូវតែបំពេញសម្រាប់ការចំណាយក្នុងឆ្នាំ២០១០ និងឆ្នាំ២០១១ខាងមុខនេះ។
ចំពោះថវិកាសម្រាប់ឆ្នាំ២០១០នេះ ខាងភាគីកម្ពុជានៅខ្វះចំនួន១លានដុល្លារ ខាងអង្គការសហ ប្រជាជាតិនៅខ្វះ ៦,៤លានដុល្លារ។ សម្រាប់ឆ្នាំ២០១១ ខាងមុខ ខាងអង្គការសហប្រជាជាតិនៅខ្វះ ថវិកាចំនួន ២៩,៨ លានដុល្លារ ក្នុងគម្រោងថវិកា៣៥,១លានដុល្លារ ហើយខាងភាគីកម្ពុជានៅខ្វះ ថវិកាចំនួន ៧,៧ លានដុល្លារក្នុងគម្រោងថវិកា១១,៧លានដុល្លារ។
តំណាងរបស់បណ្តាប្រទេសម្ចាស់ជំនួយបានសម្តែងការចាប់អារម្មណ៍យ៉ាងខ្លាំងចំពោះជោគជ័យដែល សាលាក្តីខ្មែរក្រហមសម្រេចបាន និងបានសន្យាថានឹងពាំនាំពត៌មានទាំងនេះនិងសារដ៏មានតម្លៃរបស់ ឯកឧត្តមបណ្ឌិត សុខ អាន ទៅជម្រាបជូនថ្នាក់ដឹកនាំនៃប្រទេសរបស់ខ្លួន។
គួរបញ្ជាក់ដែរថា ដោយសារថវិកាសម្រាប់ទ្រទ្រង់កញ្ចប់ថវិការបស់ អ.វ.ត.ក. បានមកពីវិភាគទាន ស្ម័គ្រចិត្តរបស់បណ្តាប្រទេសនានាលើពិភពលោក ម៉្លោះហើយ អ.វ.ត.ក. តែងតែជួបប្រទះកង្វះថវិកា។ ប៉ុន្តែ ទោះជាយ៉ាងណាក៏ដោយ ប្រទេសជប៉ុនបានផ្តល់ថវិកាចំនួនជាង ៥២លានដុល្លារ ពោលគឺច្រើនជាងគេ និងឈរក្នុងលំដាប់ថ្នាក់លេខ១ ហើយរាជរដ្ឋាភិបាលកម្ពុជាបានផ្តល់បដិភាគ ចំនួន១៥ភាគរយ ឈរក្នុងលំដាប់លេខ២។ ក្រៅពីនេះ យន្តការដែលមានស្រាប់ គឺការប្រជុំរៃអង្គាស ថវិការៀងរាល់ត្រីមាសដែលមានប្រទេសជប៉ុននិងបារាំងជាសហប្រធាននៃមិត្តរបស់ អ.វ.ត.ក. ពិតជាធានាបានការបំពេញបេសកកម្មមួយរបស់ អ.វ.ត.ក. រហូតដល់ទីបញ្ចប់។
អង្គប្រជុំទាំងមូលក៏បានទស្សនាខ្សែភាពយន្តឯកសាររយៈពេល៩នាទី ដែលផលិតដោយ អ.វ.ត.ក. ស្តីអំពីលទ្ធផលដ៏គួរឲ្យមានមោទកនៃការកាត់សេចក្តីក្នុងសំណុំរឿងលេខ ០០១ និងស្តីអំពីកម្មវិធី ផ្សព្វផ្សាយរបស់ផ្នែកកិច្ចការសាធារណៈនៃ អ.វ.ត.ក. នៅតាមបណ្តាខេត្តក្រុងទូទាំងព្រះរាជាណាចក្រ កម្ពុជា។ បន្ទាប់ពីបានទស្សនាភាពយន្តឯកសារនេះ ឯកអគ្គរាជទូតនិងរដ្ឋទូតជាច្រើន ពិសេស លោកស្រី ឃែរ៉ូល រ៉ដលី ឯកអគ្គរដ្ឋទូតសហរដ្ឋអាមេរិក បានកោតសរសើរនិងវាយតម្លៃខ្ពស់ចំពោះ ក្រុមការងារ និងពីផលជាវិជ្ជមានរបស់តុលាការខ្មែរក្រហមក្នុងសង្គមកម្ពុជា ព្រមទាំងស្ថាប័នច្បាប់៕