បណ្តាប្រទេសមហាអំណាចបានអបអរសាទភ្លាមៗ ចំពោះសាលក្រមប្រឆាំងនឹងជនជាប់ចោទ កាំង ហ្កេចអ៊ាវ ហៅ ឌុច ដែលជាអតីតប្រធានមន្ទីរ ស-២១ ហៅគុកទួលស្លែង នៃរបបកម្ពុជាប្រជាធិបតេយ្យ កាលពីថ្ងៃទី២៦ ខែកក្កដា។ នេះជាសាលក្រមទី១និងជាប្រវត្តិសាស្ត្ររបស់ អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) បន្ទាប់ពីដំណើរការរយៈពេលជាង៤ឆ្នាំក្នុងការស្វែងរកយុត្តិធម៌ជូនប្រជាជនកម្ពុជាដែលជាជនរងគ្រោះនៃរបបខ្មែរក្រហម។
សហរដ្ឋអាមេរិកដែលបានសន្យាផ្តល់ជំនួយជាទឹកប្រាក់ចំនួន ៥លានដុល្លារ ទៀតដល់ អ.វ.ត.ក ភាគីអង្គការ សហប្រជាជាតិ កាលពីឆ្នាំកន្លងទៅ បានហៅការប្រកាសសាលក្រម ឌុច ថាជាសេចក្តីសម្រេចចិត្តជាប្រវត្តិសាស្រ្ត និងជាជោគជ័យនៃការបពា្ចប់រឿងក្តី ០០១។ ថ្លែងនៅក្នុងថ្ងៃទី២៦ ខែកក្កដា នោះដែរ លោក ហ្វ៊ីលីព ក្រូលី ឧបការីរង នៃក្រសួងការបរទេសសហរដ្ឋអាមេរិក បានសង្កត់ធ្ងន់ថាៈ “យើងសូមស្វាគមន៍ចំពោះសេចក្តីសម្រេចចិត្តជាប្រវត្តិសាស្តរបស់អង្គជំនុំជម្រះ និងការបពា្ចប់ដោយជោគជ័យនូវសវនាការប្រឆាំងនឹង កាំង ហ្គេកអ៊ាវ ហៅ ឌុច ។ យើងក៏សូម សម្តែងការស្ងើច សរសើរចំពោះចៅក្រមជាតិនិងអន្តរជាតិចំពោះកិច្ចខិតខំប្រឹងប្រែងធ្វើការងារដោយឆ្លាតវៃនិងដោយ ឯករាជ្យ ដើម្បីលើកកម្ពស់បទដ្ឋានយុត្តិធម៌អន្តរជាតិនិងដើម្បីដំណើរការសមស្របនៃច្បាប់នៅក្នុងរឿងក្តីនេះ។”
ដូចគ្នានេះដែរ ប្រទេសមហាអំណាចនៅអឺរ៉ុបរួមទាំងសហភាពអឺរ៉ុបផង ក៏បានហៅការចេញសាលក្រម ឌុច ថាជាការនាំយកយុត្តិធម៌ជូនជនរងគ្រោះនៃមន្ទីរ ស-២១។ សហគមន៍អឺរ៉ុបចាត់ទុកសាលក្រមនេះជាសារដ៏សំខាន់ សម្រាប់ពិភពលោកថា សហគមន៍អន្តរជាតិមិនបណ្តាយឲ្យបុគ្គលដែលប្រព្រឹត្តឧក្រិដ្ឋកម្មធ្ងន់ធ្ងរបានរួចខ្លួនពីសំណាញ់ ច្បាប់ឡើយ និងបង្ហាញជំនឿថា ដំណើរការនេះនឹងចូលរួមចំណែកក្នុងការផ្សះផ្សារជាតិនិងលើកកម្ពស់ការអនុវត្តន៍ច្បាប់ នៅប្រទេសកម្ពុជា។
ដោយឡែក លោក ជេរេមី ប្រោន រដ្ឋមន្រ្តីការបរទេសនៃចក្រភពអង់គ្លេស បានទទួលស្គាល់ថាបើទោះជាសាលក្រមនេះអាចគ្រាន់តែជាភាពកក់ក្តៅដ៏តិចតួចប៉ុណ្ណោះសម្រាប់សាច់ញាតិរបស់ជនរងគ្រោះដែលបានបាត់បង់ជីវិតទៅហើយ ក៏ប៉ុន្តែលោកបានសង្កត់ធ្ងន់ថា “ទំនុកចិត្តរបស់តុលាការខ្មែរក្រហមក្នុងការប្រតិបត្តិកិច្ចការកន្លងមក មានតួនាទីសំខាន់ ក្នុងការជួយប្រជាជនកម្ពុជាដោះស្រាយបញ្ហាពីអតីតកាលខណៈដែលគាត់កំពុងតែធ្វើដំណើរទៅមុខជាមួយនឹងការ ផ្សះផ្សាជាតិ។”
ប្រទេសអាល្លឺម៉ង់ក៏មានការយល់ឃើញជាទូទៅមិនខុសពីបណ្តាប្រទេសនៅអឺរ៉ុបប៉ុន្មានដែរ ដូចដែលមន្រ្តីជាន់ខ្ពស់ទទួល បន្ទុកផ្នែកសិទ្ធិមនុស្សនិងមនុស្សធម៌របស់អាល្លឺម៉ង់ លោក ម៉ាគូស លូនីង ដែលបានថ្លែងកាលពីថ្ងៃទី២៧ ខែកក្កដាថា“សាលក្រម ឌុច គឺជាសារដ៏មានអត្ថន័យជូនជនរងគ្រោះនិងក្រុមគ្រួសារថា ការឈឺចាប់របស់អ្នកត្រូវបានយកចិត្តទុកដាក់ និងក៏ជាសារជូនដល់ជនដៃដល់ថា អំពើឧក្រិដ្ឋរបស់អ្នកនឹងមិនអាចគេចផុតពីការទទួលទណ្ឌកម្មតាមផ្លូវច្បាប់ឡើយ។”
នៅទ្វីបអាស៊ី ប្រទេសជប៉ុននិងអូស្រ្តាលី ដែលត្រូវបានចាត់ទុកថាជាប្រទេសដែលឈានមុខក្នុងការ ផ្តល់ជំនួយថវិការដល់ អ.វ.ត.ក ក៏បានសម្តែងការអបអរសាទចំពោះជោគជ័យជាប្រវត្តិសាស្រ្តរបស់ អ.វ.ត.ក។ ជាងនេះទៅទៀត រដ្ឋមន្រ្តី ការបរទេសអូស្រ្តាលី លោក ហន ស្ទេហ្វិន ស្ម៊ីត បានកោតសរសើរចំពាះសាធារណជនកម្ពុជាដែលបានមកចូលរួមក្នុង ដំណីរការសវនាការក្នុងចំនួនដ៏ច្រើនកុះករ ពោលគឺជាង ៣១.០០០នាក់ ក្នុងអំឡុងពេលសវនាការសរុបរយៈពេល៧៧ថ្ងៃ។
នៅរាជធានីភ្នំពេញ ប្រទេសដែលជាមិត្តរបស់ អ.វ.ត.ក ដែលមានស្ថានទូតជប៉ុននិងបារាំងជាសហប្រធាន និងជា តំណាងប្រទេសផ្តល់ជំនួយ បានចេញសេចក្តីថ្លែងការណ៍មួយដោយចាត់ទុកការចេញសាលក្រម ឌុច ជាការបញ្ចប់ ការទន្ទឹងរង់ចាំអស់រយៈពេលដ៏វែងរបស់សាច់ញាតិក្រុមគ្រួសារនៃជនរងគ្រោះ និងជាការចូលរួមចំណែកដ៏សំខាន់មួយ នៅក្នុងដំណើរការសន្តិភាពដ៏ពេញលេញនៅប្រទេសកម្ពុជា។ សេចក្តីថ្លែងការណ៍នេះក៏បានសង្កត់ធ្ងន់ផងដែរថា “រយៈពេល៣០ឆ្នាំបន្ទាប់ពីអំពើយង់ឃ្នង ត្រូវបានប្រព្រឹត្តនៅក្រាមរបបខ្មែរក្រហម សាលក្រម ឌុច ផ្តល់ក្តីសង្ឃឹមថា នៅទីបំផុត អ.វ.ត.ក បានបំពេញតាមការសន្យារបស់ខ្លួនក្នុងការធ្វើជាយានឆ្ពោះទៅរកយុត្តិធម៌និងការបង្រួបបង្រួមជាតិ សម្រាប់ប្រជាជនកម្ពុជាទាំងអស់ ហើយម្ចាស់ជំនួយសូមបញ្ជាក់សាជាថ្មីនូវទំនុកចិត្តនិងការគាំទ្ររបស់ខ្លួនចំពោះ អ.វ.ត.ក ក្នុងការផ្តល់យុត្តិធម៌ដល់ប្រជាជនកម្ពុជា និងក្នុងការជួយប្រទេសកម្ពុជាឲ្យពង្រឹងខ្លួនថែមទៀតដើម្បីនីតិរដ្ឋ។” ប្រទេសជប៉ុន បារាំង សហរដ្ឋអាមេរិក អាល្លឺម៉ង់ អូស្រ្តាលី និងចក្រភពអង់គ្លេស គឺជាប្រទេសនាំមុខក្នុងការផ្តល់ជំនួយ ថវិការដល់សាលាក្តីខ្មែរក្រហម។
ក្រៅពីប្រទេសមហាអំណាចដែលបានរៀបរាប់ខាងលើ រាជរដ្ឋាភិបាលកម្ពុជាក៏ឈានមុខទីពីរក្នុងការផ្តល់ជំនួយ ថវិការដល់តុលាការខ្មែរក្រហមដែរ ហើយថ្មីៗនេះ ប្រមុខរាជរដ្ឋាភិបាល សម្តេចតេជោ ហ៊ុន សែន បានសម្តែងការគាំទ្រ ដល់ អ.វ.ត.ក ចំពោះការប្រកាសសាលក្រម ឌុច។ មានប្រសាសន៍នៅក្នុងឧិកាសអញ្ជើញជាអធិបតីភាពដ៏ខ្ពង់ខ្ពស់ក្នុង ពិធីចែកសញ្ញាប័ត្រដល់និស្សិតសាកលវិទ្យាល័យបៀលប្រាយ កាលពីថ្ងៃទី៤ ខែសីហា កន្លងទៅថ្មីៗនេះ សម្តេចបាន បញ្ជាក់ថា រាជរដ្ឋាភិបាលកម្ពុជានិងខ្លួនសម្តេចផ្ទាល់ គោរពសេចក្តីសម្រេចរបស់តុលាការពាក់ព័ន្ធទៅនឹងការចេញ សាលក្រម ឌុច ពីព្រោះតុលាការគឺជាស្ថាប័នឯករាជ្យ ដូច្នេះរាជរដ្ឋាភិបាលមិនដាក់សម្ពាធណាមួយទៅលើតុលាការទេ។
ការគាំទ្រទាំងអស់នេះជាការលើកទឹកចិត្តដល់បុគ្គលិកនិងអ្នកច្បាប់នៅ អ.វ.ត.ក ឲ្យខិតខំធ្វើការងារកាន់តែខ្លាំងក្លា ថែមទៀត ដើម្បីជាប្រយោជន៍ដល់ប្រជាជនកម្ពុជានិងមនុស្សជំនាន់ក្រោយ។ អ.វ.ត.ក សង្ឃឹមយ៉ាងមុតមាំថានឹងនៅតែ ទទួលបានការគាំទ្រយ៉ាងពេញទំហឹងពីសំណាក់រាជរដ្ឋាភិបាលកម្ពុជានិងបណ្តាប្រទេសម្ចាស់ជំនួយ នៅក្នុងដំណើរវិវត្តន៍ ទៅមុខរបស់ អ.វ.ត.ក និងក៏សង្ឃឹមដែរថានឹងមិនជួបប្រទះបញ្ហាកង្វះខាតថវិការទៀតដូចដែលបានជួបប្រទះនាពេល កន្លងមកនោះទេ៕