រដ្ឋាភិបាលន័រវែសបានផ្តល់ជំនួយថវិកាបន្ថែមទៀតចំនួន ៦ លាន ន័រវែសក្រោន (ប្រមាណ ១លាន ដុល្លារអាមេរិក) ដល់ភាគីអន្តរជាតិនៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក)។ បូករួមទាំងជំនួយលើកចុងក្រោយនេះផង ជំនួយថវិកាដែល អ.វ.ត.ក ទទួលបានពីប្រទេសន័រវែសមានចំនួនសរុបជាង ៥ លាន ដុល្លារអាមេរិកហើយ។
ឆ្លើយតបនឹងជំនួយសប្បុរសនេះ ឯកឧត្តម ក្រាញ់ តូនី ប្រធានការិយាល័យរដ្ឋបាលស្តីទី និងលោក រ៉ាជីវ គុមរ៉ា មន្ត្រីទទួលបន្ទុកការិយាល័យអនុប្រធានរដ្ឋបាលនៃ អ.វ.ត.ក បានថ្លែងថា៖ “យើងសូមថ្លែងអំណរគុណចំពោះរដ្ឋាភិបាលន័រវែស ដែលបានផ្តល់ជំនួយថវិកានៅក្នុងកាលៈទេសៈដែល អ.វ.ត.ក កំពុងតែប្រឈមមុខនឹងកង្វះខាតថវិកា។ ជំនួយនេះមានសារសំខាន់ក្នុងការធានាថា អ.វ.ត.ក អាចបន្តការងារដើម្បីបំពេញអាណត្តិរបស់ខ្លួនក្នុងការនាំយកយុត្តិធម៌ជូនប្រជាជនកម្ពុជា ដោយពុំមានការផ្អាកជាបន្ទាន់ណាមួយ”។
ប្រទេសន័រវែសបានផ្តល់ការគាំទ្រនិងជំនួយដល់ អ.វ.ត.ក តាំងពីការចាប់ផ្តើមដំបូងនៅឆ្នាំ២០០៦។