អ្នកនយោបាយវ័យក្មេងចំនួន៤០នាក់ មកពីការិយាល័យគណបក្សចំនួនពីរក្នុងខេត្តបាត់ដំបងនិងខេត្តសៀមរាប បានមកធ្វើទស្សនកិច្ចនៅអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក.) នៅថ្ងៃ ទី២៥ ខែវិច្ឆិកា ឆ្នាំ២០១០។
ដំណើរទស្សនកិច្ចនេះមានបំណងឲ្យអ្នកនយោបាយវ័យក្មេងទាំងនេះ ដែលនឹងក្លាយជាអ្នកដឹកនាំនៅកម្ពុជា នាពេលអនាគត បានយល់ដឹងអំពីដំណើរការនិងសកម្មភាពរបស់ អ.វ.ត.ក. ក៏ដូចជាអំពីឧបសគ្គនានាពាក់ព័ន្ធ នឹងដំណើរការរបស់អង្គតុលាការនេះក្នុងការស្វែងរកយុត្តិធម៌ជូនប្រជាជនកម្ពុជា។
ដំណើរទស្សនកិច្ចនៅពេលនេះត្រូវបានរៀបចំឡើងដោយ មូលនិធិ ខុនរ៉ាដ អាដិនណាវអ៊ែ ស្ទីវស្តាំង ជាផ្នែក មួយនៃកម្មវិធី “យុវជនក្នុងវិស័យនយោបាយ” ដែលផ្តល់ការបណ្តុះបណ្តាលដល់យុវជនអំពីការអប់រំ នយោបាយ លទ្ធិប្រជាធិបតេយ្យ សិទ្ធិមនុស្ស ការបោះឆ្នោត ការតស៊ូមតិ និងវិមជ្ឈការ។
អ្នកអ្នកនយោបាយវ៏យក្មេងទាំង៤០នាក់មកពីគណបក្សប្រជាជននិងគណបក្សសមរង្ស៊ី ហើយមួយចំនួនគឺជា មន្ត្រីបុគ្គលិកនៃរាជរដ្ឋាភិបាល ដូចជាគ្រូបង្រៀន មន្ត្រីអប់រំ សមាជិកក្រុមប្រឹក្សា ឃុំ/ស្រុក/ខេត្ត និងមួយចំនួនទៀតជានិស្សិតមហាវិទ្យាល័យ។
ក្រុមអ្នកនយោបាយវ័យក្មេងបានជួបសំណេះសំណាលជាមួយតំណាងមកពីការិយាល័យផ្សេងៗនៃ អ.វ.ត.ក. រួមមាន ការិយាល័យសហព្រះរាជអាជ្ញា ការិយាល័យសហចៅក្រមស៊ើបអង្កេត (តំណាងដោយលោកចៅក្រម ម៉ាសែល ឡឺម៉ុង ដែលបញ្ចប់អាណត្តិការងាររបស់លោកនៅ អ.វ.ត.ក. នៅដើមខែធ្នូឆ្នាំ២០១០នេះ) អង្គបុរេជំនុំជម្រះ អង្គភាពគាំពារជនជាប់ចោទ និងផ្នែកកិច្ចការសាធារណៈ និងបានស្តាប់ពន្យល់អំពីតួនាទីនិង ដំណើរការនៃការិយាល័យនីមួយៗនៅក្នុងតុលាការ អំពីការលំបាកដែលជួបប្រទះក្នុងការបំពេញភារកិច្ច អំពីការវិវឌ្ឍនៃរឿងក្តីលេខ០០២ និងរឿងក្តីនានាជាបន្តបន្ទាប់ទៀត។
ជាងនេះទៅទៀត អ្នកចូលរួមមានឧិកាសលើកឡើងនូវសំណួរជាច្រើនដល់តំណាងការិយាល័យនីមួយៗ ហើយដែលសំណួរមួយចំនួនមានលក្ខណៈគួរឲ្យកត់សម្គាល់ ដូចជា៖
-
តើ អ.វ.ត.ក. ឲ្យនិយមន័យទៅលើ “មេដឹកនាំជាន់ខ្ពស់” និង “អ្នកដែលទទួលខុសត្រូវខ្ពស់បំផុត” យ៉ាងដូចម្តេច?
-
ហេតុអ្វីបានជា អ.វ.ត.ក. កាត់ទោស ឌុច មុនគេ ហេតុអ្វីមិនកាត់ទោសអ្នកដឹកនាំដទៃមុន?
-
ហេតុអ្វីកាត់ទោស ឌុច ជាមេគុកទួលស្លែង ប៉ុន្តែមិនកាត់ទោសមេគុកមួយចំនួនទៀតដែលប្រហែល ជាបានធ្វើទារុណកម្មអ្នកទោសក្នុងរូបភាពសាហាវជាង និងសម្លាប់អ្នកទោសច្រើនជាងមន្ទីរ ស-២១?
-
តើនឹងមានការស៊ើបអង្កេតទៅលើសំណុំរឿងលេខ ០០៣ និង ០០៤ ដែរឬទេ?
ដំណើរទស្សកិច្ចនេះត្រូវបានចាត់ទុកថាមានតម្លៃខ្ពស់ ខណៈដែលអ្នកចូលរួមគឺជាអ្នកនយោបាយមកពី គណបក្សកាន់អំណាចនិងគណបក្សប្រឆាំង ប៉ុន្តែបានរួមគ្នាសិក្សាស្វែងយល់អំពីដំណើរការរបស់អង្គជំនុំជម្រះវិសាមញ្ញ និងបានចែករំលែកមតិយោបល់ជាមួយគ្នាប្រកបដោយផ្លែផ្កា។ តំណាងការិយាល័យនីមួយៗ នៃ អ.វ.ត.ក. ដែលបានចូលរួមនៅក្នុងការសំណេះសំណាល ក៏បានចែករំលែកមតិយោបល់និងទទួលចំណេះដឹង អំពីកង្វល់របស់យុវជនក្នុងជួរនយោបាយ ពាក់ព័ន្ធទៅនឹងបញ្ហានយោបាយនិងយុត្តិធម៌សម្រាប់ប្រជាជន កម្ពុជា៕