សៀវភៅសាលក្រម ឌុច បានក្លាយជាប្រភពឯកសារដ៏មានតម្លៃសម្រាប់ចៅក្រម ព្រះរាជអាជ្ញា និងក្រឡាបញ្ជីរនៃសាលាដំបូងខេត្តកណ្តាល បន្ទាប់ពីត្រូវបាននាំយកទៅប្រគល់ជូនដល់សាលា ដំបូងខេត្តកណ្តាលនៅរសៀលថ្ងៃទី១៧ ខែសីហា នេះ។
ពិធីប្រគល់និងទទួលសៀវភៅសាលក្រម ឌុច ប្រព្រឹត្តទៅនៅទីស្នាក់ការសាលាដំបូងខេត្តកណ្តាល ក្រោមអធិបតីភាពឯកឧត្តម ក្រាញ់ តូនី ប្រធានការិយាល័យរដ្ឋបាលស្តីទីនៃ អ.វ.ត.ក និងលោក អិន វ៉ានវិបុល ប្រធានតុលាការសាលាដំបូងខេត្តកណ្តាល។
ពិធីប្រគល់សៀវភៅនៅពេលនេះគឺជានិមិត្តរូបនៃការចែករំលែកបទពិសោធន៍ដល់ប្រព័ន្ធតុលាការ ក្នុងស្រុក ពាក់ព័ន្ធទៅនឹងដំណើរការរបស់តុលាការខ្មែរក្រហមក្នុងការកាត់សេចក្តីលើឧក្រិដ្ឋកម្ម ធ្ងន់ធ្ងរដែលប្រព្រឹត្តឡើងក្នុងអំឡុងរបបខ្មែរក្រហម។ សាលាដំបូងខេត្តកណ្តាលគឺជាស្ថាប័នតុលាការ កម្ពុជាទី១ដែលចាប់អារម្មណ៍មុនគេទៅលើសៀវភៅសាលក្រម ឌុច និងផ្ញើលិខិតស្នើសុំមកកាន់ អ.វ.ត.ក។ ការស្នើសុំនេះមានគោលបំណងឲ្យចៅក្រម ព្រះរាជអាជ្ញា និងបុគ្គលិក សាលាដំបូងខេត្ត កណ្តាល មានឧិកាសបានអានសាលក្រមពេញលេញ ដើម្បីបង្កើនចំណេះដឹងអំពីដំណើរការរឿងក្តីក្នុង បទដ្ឋានអន្តរជាតិ និងដើម្បីធ្វើជាបទដ្ឋានសំអាង សម្រាប់ការងាររបស់សាលាដំបូងនាពេលអនាគត។
មានប្រសាសន៍ក្នុងពិធីប្រគល់និងទទួលសៀវភៅសាលក្រម ឌុច ឯកឧត្តម ក្រាញ់ តូនី បានសម្តែង ក្តីសោមនស្សរីករាយក្នុងការប្រគល់សៀវភៅនេះដល់សាលាដំបូងខេត្តកណ្តាល និងបានលើកឡើងអំពី សារសំខាន់នៃសាលក្រមនេះសម្រាប់អ្នកច្បាប់ អ្នកសិក្សា និងអ្នកស្រាវជ្រាវ ក្នុងការស្វែងយល់អំពី ប្រព័ន្ធតុលាការកូនកាត់ និងអំពីការដំណើរការរឿងក្តីនៅក្នុងបទដ្ឋានយុត្តិធម៌អន្តរជាតិ។ ឯកឧត្តម ក៏បានបន្ថែមថា “សាលក្រម នេះជាផ្នែកមួយនៃឧិសថក្នុងការព្យាបាលរបួសផ្លូវចិត្តសម្រាប់ជនរងគ្រោះដែលរង់ចាំអស់ពេលយ៉ាងយូរ ហើយដែលបានដឹងថានៅទីបំផុត មានសាលក្រមមួយបញ្ជាក់អំពី ពិរុទ្ធភាព និងអំពីការបំបាត់និរទណ្ឌភាព។ តាំងពីថ្ងៃបើកសវនាការដំបូងកាត់ទោស កាំង ហ្គេកអ៊ាវ ហៅ ឌុច នាថ្ងៃទី៣០ ខែមីនា ឆ្នាំ២០០៩ រហូតមកដល់ពេលនេះ ប្រជាជនកម្ពុជាជាង៥ម៉ឺននាក់បាន មកធ្វើជាសាក្សីដោយផ្ទាល់នៃដំណើរការរបស់តុលាការខ្មែរក្រហម ដែលនេះគឺជាផ្នែកមួយនៃការ ផ្សះផ្សារផ្លូវចិត្ត ហើយការចូលរួមនេះក៏ជាការបំបែកឯកត្តកម្មពិភពលោកក្នុងប្រវត្តិសាស្រ្តតុលាការ ព្រហ្មទណ្ឌអន្តរជាតិ។”
ឯកឧត្តមបានសង្កត់ធ្ងន់ជាចុងក្រោយថា “នេះជាការវិវឌ្ឍន៍ដ៏គួរឲ្យកត់សម្គាល់មួយនៅក្នុងវិស័យច្បាប់ ឆ្លើយតបទៅនឹងកំណែទម្រង់ប្រព័ន្ធយុត្តិធម៌របស់រាជរដ្ឋាភិបាល។ លទ្ធផលជាផ្លែផ្កានេះនឹងដើរតួនាទី ស្នូលក្នុងការពង្រឹងវប្បធម៌គតិយុត្តិ សម្រាប់ផ្តល់យុត្តិធម៌ដល់ជនរងគ្រោះគ្រប់រូប បំបាត់និរទណ្ឌភាព ព្រមទាំងធានាបានផងដែរនូវការពង្រឹងសន្តិភាពជានិរន្តនៅព្រះរាជាណាចក្រកម្ពុជា។”
មានប្រសាសន៍ឆ្លើយតប លោក អិន វ៉ានវិបុល ប្រធានសាលាដំបូងខេត្តកណ្តាល បានសម្តែងក្តីរីករាយ និងថ្លែងអំណរគុណចំពោះសាលាក្តីខ្មែរក្រហមដែលបានផ្តល់សៀវភៅសាលក្រម ឌុច នេះ ដល់ ចៅក្រម ព្រះរាជអាជ្ញា និងបុគ្គលិកនៃសាលាដំបូងខេត្តកណ្តាល និងបានចាត់ទុកការទទួលបាន សៀវភៅសាលក្រមនេះជាកិត្តិយសដ៏ធំធេងសម្រាប់សាលាដំបូងខេត្តកណ្តាល។ សំខាន់ជាងនេះ ទៅទៀត លោកបានលើកឡើងអំពីសារសំខាន់៤យ៉ាងនៃសៀវភៅសាលក្រមនេះថា “សារសំខាន់ទី១ សាលក្រមនេះបានចូលរួមចំណែកបង្ការនិងទប់ស្កាត់ការកើតឡើងម្តងទៀតនៃរបបប្រល័យពូជសាសន៍ដូចជារបបខ្មែរក្រហម ទី២ ជាគំរូសម្រាប់កូនខ្មែរជំនាន់ក្រោយ ទី៣ ការចេញសាលក្រមនេះបាន បង្ហាញឲ្យឃើញថាកម្ពុជាជានីតិរដ្ឋដ៏ពិតប្រាកដ និងទី៤ ជាបទដ្ឋានសំអាងនិងពិភាក្សាសម្រាប់ តុលាការក្នុងស្រុក។” លោកក៏បានបន្ថែមថា នៅសាលាដំបូងខេត្តកណ្តាលនឹងប្រើប្រាស់សៀវភៅនេះ ជាប្រយោជន៍ដល់ការស្វែងយល់បន្ថែមអំពីប្រព័ន្ធតុលាការដែលមានបទដ្ឋានអន្តរជាតិ និងអំពីគន្លឺះដែល អាចយកជាមូលដ្ឋានយុត្តិសាស្រ្តក្នុងការដោះស្រាយរឿងក្តី។
ឆ្លើយតបទៅនឹងសំណួររបស់អ្នកសារព័ត៌មានជាតិនិងអន្តរជាតិ លោក ឌឹម សុវណ្ណារុំ អ្នកនាំពាក្យ សាលាក្តីខ្មែរក្រហមខាងរាជរដ្ឋាភិបាលកម្ពុជា បានបញ្ចេញយោបល់ថា “សាលក្រមនេះគឺជាប្រទីប មួយជួយបំភ្លឺដល់ការស្វែងយល់អំពីច្បាប់ឲ្យបានត្រឹមត្រូវនិងច្បាស់លាស់ ហើយសារប្រយោជន៍របស់ សៀវភៅសាលក្រមនេះចំពោះប្រព័ន្ធតុលាការក្នុងស្រុកគឺវាអាស្រ័យទៅលើវិធីប្រើប្រាស់របស់បុគ្គលឬ ស្ថាប័នតុលាការនីមួយៗ ឲ្យគាត់ពិនិត្យមើលដោយខ្លួនឯងថាតើចំណុចណាដែលគាត់អាចស្វែងយល់ និងយកមករៀនសូត្របាន។ ចំណុចសំខាន់របស់សាលក្រមនេះគឺស្ថិតនៅត្រង់ វិធីសរសេរសាលក្រម វិធីសម្រេចចិត្ត និងការប្រើប្រាស់រួមគ្នាទាំងច្បាប់ស៊ីវិលនិងច្បាប់អង់ក្លូសាក់សុង និងយុត្តិសាស្រ្តនៃ ដំណោះស្រាយរឿងក្តី។”
លោក ហួត ហ៊ាង ចៅក្រមមួយរូបដែលបានទទួលសៀវភៅសាលក្រមក្នុងឧិកាសនោះដែរ បានបង្ហាញចំណាប់អារម្មណ៍ថា សាលក្រម ឌុច ដែលចេញដោយតុលាការខ្មែរក្រហម មានលក្ខណៈលម្អិតជាងសាលក្រមដែលចេញដោយតុលាការក្នុងស្រុក ដោយសារវាមានធាតុផ្សំទាំង ការសំអាងហេតុ ការលើកអង្គសេចក្តី ច្បាប់ដែលយកមកអនុវត្ត និងវិធានផ្ទៃក្នុងរបស់ អ.វ.ត.ក។ ក្នុងនាមខ្លួនលោកផ្ទាល់ លោកមានសុទិដ្ឋិនិយមថា សៀវភៅសាលក្រមនេះនឹងចូលរួមចំណែកក្នុងការ ពង្រឹងប្រព័ន្ធយុត្តិធម៌ក្នុងស្រុកដែលបាននិងកំពុងធ្វើកំណែទម្រង់ឲ្យកាន់តែប្រសើរឡើងនិងឈានទៅ រកបទដ្ឋានគតិយុត្តិ។ ខ្លួនលោកផ្ទាល់នឹងផ្តោតការយកចិត្តទុកដាក់ទៅលើសៀវភៅសាលក្រមនេះ អំពីវិធីសរសេរសាលក្រម អំពីការលើកហេតុសំអាង និងអំពីវិធីសម្រេចចិត្តនៅក្នុងរឿងក្តី ដើម្បី លើកកម្ពស់គុណភាពនៃការអនុវត្តនៅក្នុងរឿងក្តីនាពេលអនាគត។
ក្រៅពីសាលាដំបូងខេត្តកណ្តាលដែលបានទទួលសៀវភៅសាលក្រមនេះរួចហើយ សាលាដំបូងរាជធានី ភ្នំពេញនិងសាលាឧទ្ធរណ៍ក៏បានផ្ញើលិខិតមកស្នើសុំសៀវភៅសាលក្រមនេះដែរ។ ឯកឧត្តម ក្រាញ់ តូនី បានលើកទឹកចិត្តស្ថាប័នតុលាការនៅតាមបណ្តាខេត្តផ្សេងៗទៀតឲ្យផ្ញើរលិខិតមកសុំជាបន្តបន្ទាប់។ ជាមួយគ្នានេះដែរ ឯកឧត្តមបានអញ្ជើញចៅក្រមនិងព្រះរាជអាជ្ញាទាំងអស់នៃសាលាដំបូង ខេត្តកណ្តាល និងសាលាក្តីផ្សេងៗទៀត មកចូលរួមស្តាប់និងតាមដានដំណើរការរឿងក្តីលេខ០០២ ដែលនឹងចាប់ផ្តើមដំណើរការនៅ៦ខែដើមឆ្នាំ២០១១ ខាងមុខនេះ៕
ថ្ងៃទី ១៨ សីហា ២០១០
សាន់ កល្យាណ
ផ្នែកកិច្ចការសាធារណៈ