សិស្សានុសិស្សចំនួន ២៧០នាក់ មកពីវិទ្យាល័យទ័ពមានជ័យ ស្រុកគងពិសី ខេត្តកំពង់ស្ពឺ ចូលរួមកម្មវិធីទស្សនកិច្ចសិក្សារៀបចំដោយអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក.) នៅថ្ងៃទី២៣ ខែសីហា ឆ្នាំ២០២៣។ កម្មវិធីទស្សនកិច្ចសិក្សានេះ ត្រូវបានរៀបចំទៅទស្សនកិច្ចសារៈមន្ទីរឧក្រិដ្ឋកម្មប្រល័យពូជសាសន៍ទួលស្លែង និងវិមានឈ្នះ ឈ្នះ។ គោល បំណងនៃការរៀបចំកម្មវិធីនេះឡើង គឺដើម្បីឱ្យសិស្សានុសិស្សបានស្វែងយល់ឱ្យច្បាស់អំពីសោកនាដកម្មដែលកើតមានឡើងនៅក្នុងរបបឃោរឃៅខ្មែរក្រហម និងចូលរួមទប់ស្កាត់អំពើឃោរឃៅដូចក្នុងរបបខ្មែរក្រហម។
ក្នុងពេលចូលទស្សនកិច្ចសិក្សានៅក្នុងសារៈមន្ទីរទួលស្លែង សិស្សានុសិស្សត្រូវបានទទួលស្វាគមន៍ និងបទបង្ហាញពីមន្ដ្រីផ្នែកកិច្ចការសាធារណៈនៃសាលាក្ដីខ្មែរក្រហម អំពីដំណើរការជំនុំជម្រះក្ដី សមិទ្ធផលដែលទទួលបានពីការជំនុំជម្រះក្ដី និងដំណើរការងារសេសសល់ដែលអង្គជំនុំជម្រះកំពុងអនុវត្តនាពេលបច្ចុប្បន្ននេះ។ មន្ទាប់ពីបំពេញទស្សនកិច្ចនៅសារៈមន្ទីរទួលស្លែង សិស្សានុសិស្សបានបន្ដទៅទស្សនកិច្ចសិក្សានៅវិមានឈ្នះ ឈ្នះ បន្ដទៀត។
ក្រោយពេលបញ្ចប់ទស្សនកិច្ចសិក្សានៅក្នុងមួយថ្ងៃនេះ សិស្សានុសិស្សទាំងអស់ត្រូវបានរំពឹងទុកថា នឹងទទួលបានព័ត៌មាន និងចំណេះដឹងយ៉ាងច្រើនជុំវិញការងារជំនុំជម្រះក្ដីនៅក្នុងសាលាក្ដីខ្មែរក្រហម រឿងរ៉ាវទាក់ទងនឹងការធ្វើទារុណកម្មយ៉ាងព្រៃផ្សៃ និងការកាប់សម្លាប់ប្រជាពលរដ្ឋកម្ពុជានៅក្នុងរបបខ្មែរក្រហម និងការពលីរបស់រាជរដ្ឋាភិបាលកម្ពុជាក្នុងការរំដោះប្រទេសជាតិចេញពីរបបប្រល័យពូជសាសន៍នោះ។
សូមបញ្ជាក់ថា កម្មវិធីទស្សនកិច្ចសិក្សានេះ ត្រូវបានរៀបចំរៀងរាល់សប្ដាហ៍ ជូនសិស្សានុសិស្ស និស្សិត យុវជន និងពលរដ្ឋទូទៅ។ ចាប់តាំងពីឆ្នាំ២០០៩ រហូតមកដល់ឆ្នាំ ២០២៣ នេះ មានសាធារណៈជនជាតិ និងអន្តរជាតិ ជាង ៦០ ម៉ឺននាក់ នាក់ហើយ ដែលបានចូលរួមក្នុងដំណើរទស្សនកិច្ចសិក្សា ក្រោមការសម្របសម្រួល និងរៀបចំដោយផ្នែកកិច្ចការសាធារណៈនៃសាលាក្តីខ្មែរក្រហម៕
