នៅថ្ងៃទី០៧ ខែវិច្ឆិកា ឆ្នាំ២០២៣ សិស្សានុសិស្សប្រមាណ ២០០នាក់ មកពីវិទ្យាល័យ ហ៊ុន សែន ប្រសូត ខេត្តស្វាយរៀង បានអញ្ជើញមកចូលរួមក្នុងកម្មវិធីទស្សនកិច្ចសិក្សារៀបចំឡើងដោយ អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក.) ដើម្បីទៅសិក្សាស្វែងយល់អំពីសោកនាដកម្មដែលបានកើតឡើងនៅក្នុងសារៈមន្ទីរឧក្រិដ្ឋកម្មប្រល័យពូជសាសន៍ទួលស្លែង និងប្រវត្តិសាស្ដ្រនៅក្នុងវិមានឈ្នះ-ឈ្នះ។
ក្នុងដំណើរទស្សនកិច្ចសិក្សានៅក្នុងសារៈមន្ទីរឧក្រិដ្ឋកម្មប្រល័យពូជសាសន៍ទួលស្លែង សិស្សានុសិស្សទាំងអស់ក៏ត្រូវបានទទួលស្វាគមន៍ និងបទបង្ហាញពីមន្ដ្រីផ្នែកកិច្ចការសាធារណៈ នៃ អ.វ.ត.ក. អំពី ដំណើរការជំនុំជម្រះក្ដី និងសមិទ្ធផលដែលទទួលបានពីការជំនុំជម្រះក្ដីលើអតីតមេដឹកនាំជាន់ខ្ពស់នៃរបបខ្មែរក្រហមផងដែរ។ បន្ទាប់ពីទស្សនកិច្ចសិក្សានៅក្នុងអតីតមន្ទីរសន្ដិសុខ ស-២១ រួច យុវជនទាំងអស់បានបន្ដទៅទស្សនកិច្ចសិក្សាស្វែងយល់វិមានឈ្នះ-ឈ្នះ។
លោកគ្រូ អ្នកគ្រូ ដែលបានដឹកនាំសិស្សានុសិស្សមកចូលរួមក្នុងទស្សនកិច្ចសិក្សានេះ បានលើកឡើងថា ដំណើរទស្សនកិច្ចនេះជាផ្នែកមួយដ៏សំខាន់សម្រាប់សិស្សានុសិស្សស្វែងយល់ពីប្រវត្តិសាស្រ្ត ជាពិសេស របបកម្ពុជាប្រជាធិបតេយ្យ ការកាត់ទោសមេដឹកនាំខ្មែរក្រហម។ លោកបន្ដថា ចំណែកការទស្សនាវិមាន ឈ្នះ-ឈ្នះ ក៏ជាចំណែកមួយដែលឲ្យសិស្សានុសិស្សយល់ដឹងពីប្រភពនៃការកើតឡើងនៃរបបខ្មែរក្រហម ការតស៊ូរបស់ថ្នាក់ដឹកនាំក្នុងការរំដោះប្រទេសពីគុកឥតជញ្ជាំងមួយនេះ។
លោកគ្រូអ្នកគ្រូ ក៏បានថ្លែងនូវការកោតសរសើរ និងដឹងគុណដល់គោលនយោបាយ ឈ្នះ-ឈ្នះ របស់រាជរដ្ឋាភិបាលកម្ពុជា ដែលបានដឹកនាំប្រទេសនាំមកនូវសុខសន្ដិភាព ស្ថេរភាពសង្គម និងរីកចម្រើនគ្រប់វិស័យ។ លោកគ្រូអ្នកគ្រូក៏សូមអរគុណដល់ អ.វ.ត.ក. ផងដែរ ដែលបានរៀបចំកម្មវិធីនេះឡើង ដើម្បីឲ្យយុវជនបានយល់ដឹង បានទស្សនាទីតាំងឧក្រិដ្ឋកម្មដែលបន្សល់ទុកពីរបបខ្មែរក្រហម និងបានមកឃើញការអភិវឌ្ឍន៍នៅក្នុងរាជធានីភ្នំពេញនាពេលបច្ចុប្បន្ននេះ។
សូមបញ្ជាក់ថា កម្មវិធីទស្សនកិច្ចសិក្សានេះ ត្រូវបានរៀបចំរៀងរាល់សប្ដាហ៍ ជូនសិស្សានុសិស្ស និស្សិត យុវជន និងពលរដ្ឋទូទៅ ដោយចាប់តាំងពីឆ្នាំ២០០៩ រហូតមកដល់ឆ្នាំ ២០២៣ នេះ មានសាធារណៈជនជាតិ និងអន្តរជាតិ ជាង ៦០ ម៉ឺននាក់ហើយដែលបានចូលរួមក្នុងដំណើរទស្សនកិច្ចសិក្សា ក្រោមការសម្របសម្រួល និងរៀបចំដោយផ្នែកកិច្ចការសាធារណៈនៃសាលាក្តីខ្មែរក្រហម៕
រូបថតដោយ៖ គុណ ចិន្ដា